24 Jan 2024, 22:09
ވަޒީރުންނަށް ރުހުން ދިނުމުގެ މަސައްކަތާއި، މަޖިލިސް އިންތިޚާބު ފަސްކުރަން ގާނޫނަށް އިސްލާހު ހުށަހަޅަން ދައުރުން ބޭރު ޖަލްސާއެއް އާދިއްތަ ދުވަހަށް މަޖިލީހުން އެޖެންޑާކޮށްފިއެވެ.
މި ޖަލްސާގެ ތެރެއިން ވަޒީރުންނަށް ރުހުން ދިނުމާ ގުޅޭގޮތުން މަޖިލީހުގެ ކޮމިޓީން ނިންމި ގޮތުގެ ރިޕޯޓު ހުށަހެޅުމާއި، ރޯދަމަހު އިންތިޚާބުތައް ނުބޭއްވޭ ގޮތަށް ގާނޫނު ބަދަލުކުރުމަށް އިސްލާހު ހުށަހެޅުން ވަނީ އެޖެންޑާކޮށްފައެވެ.
އެގޮތުން އިހަވަންދޫ ދާއިރާގެ މެންބަރު މުޙައްމަދު ޝިފާއު ހުށަހަޅުއްވާފައިވާ ބިލުގެ ފުރަތަމަ ކިޔުން އިއްވުން ވެސް އެޖެންޑާކޮށްފައިވެއެވެ.
ހަމައެހެންމެ، ބިމާބެހޭ ގާނޫނު ބަދަލުކުރުމަށް ގަލޮޅު ދެކުނު ދާއިރާގެ މެންބަރު މީކާއީލު އަޙްމަދު ނަސީމް ހުށަހެޅުއްވި ބިލުގެ ފުރަތަމަ ކިޔުން އިއްވުން މި ޖަލްސާއިގައި ވަނީ ތާވަލްކޮށްފައެވެ.
ދައުރުން ބޭރު ޖަލްސާ އެޖެންޑާ ކޮށްފައި މިވަނީ އެމްޑީޕީއާއި ދަ ޑިމޮކްރެޓްސް ގުޅިގެން އެ ކަމަށް އެދިފައިވާކަމަށް މިއަދު ބޭއްވި ނޫސްވެރިންގެ ބައްދަލުވުމުގައި ބުނެފައިވަނިކަމަށެވެ.
އިންތިޚާބުތަކާއި ބެހޭ ގާނޫނު ބަދަލުކުރަން ޝިފާއު ބިލު ހުށަހެޅީ މާޗް މަހުގެ 17 ގައި އިންތިޚާބު ބާއްވާގޮތަށް އިލެކްޝަންސް ކޮމިޝަން(އީސީ) އިން ނިންމާފައިވަނިކޮށެވެ.
އެކަމާ ހުރިހާ ޕާޓީތަކުން ވެސް ދެކޮޅެވެ.
ނިމުނު 2023 ވަނަ އަހަރުގެ ދައުރު ނިމުމުން މަޖިލީހުގެ މެންބަރުން ޗުއްޓީގައި ތިއްބެވިއިރު، އަލުން ޖަލްސާތައް ފަށަން ތާވާލުކޮށްފައިވަނީ އަންނަ މަހުގެ ފަހެއްގައެވެ.