24 Jan 2024, 18:21
ފުވައްމުލަކު ސިޓީގައި ކަރަންޓުގެ ޚިދުމަތް ފޯރުކޮށްދޭ އިތުރު ޖަނަރޭޓަރެއް ހަލާކުވެ، އެ ޓްރާންސްފޯމަރުން ކަރަންޓުދޭ ސަރަހައްދުތަކުން ކަރަންޓު ކެނޑިފައިވާ ކަމަށް ފެނަކަ ކޯޕަރޭޝަނުން މިއަދު ބުނެފިއެވެ.
މީގެކުރިން ފެނަކައިން ބުނީ، އެ ސިޓީއަށް ކަރަންޓުގެ ޚިދުމަތް ފޯރުކޮށްދެމުން އަންނަ 800 ކިލޯވޯޓުގެ ޖަނަރޭޓަރަށް މައްސަލަތަކެއް ދިމާވެ، މައިގަނޑު ބައިތަކެއް ހަލާކުވެފައިވާ ކަމަށެވެ.
އެހެންވެ، ހަލާކުވި ޖަނަރޭޓަރު ހެދުމުގެ މަސައްކަތް ކުރަމުން އަންނަ ކަމަށާއި މި މައްސަލައަށް އެދެވޭ ހައްލެއް ގެނައުމަށް 1200 ކިލޯވޯޓްގެ ޖަނަރޭޓަރެއް ހޯދުމަށް ރޭވިފައިވާ ކަމަށް ވެސް ފެނަކައިން ވަނީ ބުނެފައެވެ.
އެ ކޯޕަރޭޝަނުން މިއަދު އެކްސްގައި ކުރި ޕޯސްޓެއްގައި ބުނީ، އެ ސިޓީގައި ކަރަންޓުގެ ޚިދުމަތް ދެމުންދާ 500 ކިލޯވޯޓްގެ ޖަނަރޭޓަރެއް އަނެއްކާ ވެސް ހަލާކުވެ މިއަދު ހަވީރު 15:35 ހާއިރު މުޅި ރަށުން ކަރަންޓު ކެނޑިފައިވާ ކަމަށެވެ.
ނަމަވެސް ހަލާކުވި، ޖަނަރޭޓަރުން ކަރަންޓު ފޯރުކޮށްދޭ ސަރަހައްދު ފިޔަވައި އެހެން ސަރަހައްދުތަކަށް ކަރަންޓު ދެވިފައިވާ ކަމަށާއި މި ވަގުތު ކަރަންޓުގެ ޚިދުމަތް ނުދެވި ހުރީ 150 ގެއަކަށް ކަމަށް ފެނަކައިން ބުނެއެވެ.
އެހެންވެ، ފެނަކައިން ބުނީ ހަލާކުވެފައިވާ 500 ކިލޯވޯޓްގެ ޖަނަރޭޓަރު 1000 ކިލޯވޯޓްގެ ޖަނަރޭޓަރަކަށް ބަދަލުކުރުމުގެ މަސައްކަތް ކުރަމުންދާ ކަމަށެވެ.
"ހަލާކުވި 500 ކިލޯވޯޓްގެ ޓްރާންސްފޯމަރު ނެގުމަށްފަހު 1000ކިލޯވޯޓްގެ ޓްރާންސްފޯމަރެއް އިންސްޓޯލް ކުރުމުގެ މަސައްކަތް ފެށިގެން ކުރިއަށް ދަނީ." ފެނަކައިން ބުންޏެވެ.
ކަރަންޓުގެ ޚިދުމަތް މެދުކަނޑައިލަން ޖެހުނީ ހޫނު ދުވަސް ވަރަަކަށްވާތީ މި މަހުގެ 11 އިން ފެށިގެން ކަރަންޓުގެ ލޯޑު މަތިވާތީ ކަމަށް ފެނަކައިން މީގެކުރިން ވަނީ ބުނެފައެވެ.
އަދި، މިފަދަ މައްސަލަތައް ދިމާވަނީ ނިމިދިޔަ އަހަރުތަކުގެ ތެރޭގައި ޖަނަރޭޓަރުތަކުގެ މެއިންޓެނަސް މަސައްކަތް ހުއްޓިފައި އޮތުމުން ކަމަށް ފެނަކައިން ތުހުމަތު ކުރެއެވެ.
މިކަމާ ގުޅިގެން ފުވައްމުލަކު ސިޓީ ކައުންސިލުގެ ސެކެޓްރީ ޖެނެރަލް އަސްލަމް ރަޝީދު މީގެ ކުރިން "ސަން"އަށް ވިދާޅުވީ، ކޮންމެ ދުވަހަކު ވެސް މެންދުރު ކުރީގެ ވަގުތުތަކުގައި ރަށުގެ ހުރިހާ ސަރަހައްދަކަށް ކަރަންޓު ލިބޭ ކަމަށެވެ.