24 Jan 2024, 17:06
ރޯދަ މަހުގެ ތެރޭ ބާއްވަން ނިންމައިފައިވާ ކުރިއަށް އޮތް ރައްޔިތުންގެ މަޖިލީހުގެ އިންތިޚާބު ފަސްކުރުމަށް، އިންތިޚާބުތަކާ ބެހޭ ގާނޫނަށް އިސްލާހު ގެނައުމަށް ދައުރުން ބޭރުން ޖަލްސާއެއް ހުށަހަޅަން ނިންމައިފައިވާކަމަށް ދަ ޑިމޮކްރެޓްސްގެ ރައީސް ހަސަން ލަތީފް މިއަދު ވިދާޅުވެއްޖެއެވެ.
އެމްޑީޕީއާއި ދަ ޑިމޮކްރެޓްސް ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި މައުލޫމާތު ދެއްވަމުން ހަސަން ވިދާޅުވީ ރޯދަ މަހުގެ ތެރޭ އިންތިޚާބު ބާއްވަން ނިންމުމާއެކު ސިޔާސީ މަސައްކަތްކުރާ މީީހުންގެ ފަރާތުންނާއި، އާންމު ރައްޔިތުންގެ ފަރާތުން ގިނަ ކަންބޮޑުވުންތަކެއް ލިބެމުން އައި ކަމަށެވެ.
އެހެންވެ ދަ ޑިމޮކްރެޓުންނާއި އެމްޑީޕީ އެކުގައި މަޝްވަރާކޮށް ނިންމީ، ދައުރުން ބޭރުން ޖަލްސާއެއް ހުށަހަޅަން ކަމަށް އޭނާ ވިދާޅުވިއެވެ.
"ދައުރުން ބޭރުން ޖަލްސާއެއް ބޭއްވުމަށް އަޅުގަނޑު މި ދެންނެވިހެން އިއްޔެ ވާނީ އަޅުގަނޑުމެން ދެ ޕާޓީއިން [ޑިމޮކްރެޓްސްއާއި އެމްޑީޕީ] މަޝްވަރާކުރުމަށްފަހު ރައްޔިތުންގެ މަޖިލީހަށް ހުށަހަޅައިފައިި،" އޭނާ ވިދާޅުވިއެވެ.
އެމްޑީޕީއާއި ޑިމޮކްރެޓްސް ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގެ ތެރެއިން: ދެ ޕާޓީން ވަނީ ގުޅިގެން ސަރުކާރާ ދެކޮޅަށް މަސައްކަތްކުރަން އެއްބަސްވެފައި -- ސަން ފޮޓޯ: އިންފިނިޓް މޮމެންޓްސް/ މުހައްމަދު މާވީ
ހަސަން ވިދާޅުވީ އެންމެ ބޮޑު އިސްކަމެއް ދެއްވާނީ ވީހާ ވެސް އަވަހަކަަށް އިންތިޚާބުތަކާ ބެހޭ ގާނޫނު އިސްލާހުކުރުމަށް ކަމަށެވެ. އަދި މަޖިލިސް އިންތިޚާބު ބާއްވަން އެންމެ ރަނގަޅީ ރޯދަ މަސް ނިންމައި އީދު ބަންދަށްފަހު ކަމަށް ވެސް އޭނާ ފާހަގަކުރެއްވިއެވެ.
ދެ ޕާޓީން މި ކަން ކުރަން ނިންމައިފައިވާއިރު، ކުރިއަށް އޮތް މަޖިލިސް އިންތިޚާބުގައާއި ސިޔާސީ ކަންކަމުގައި ވެސް ދެ ޕާޓީން ގުޅިގެން މަސައްކަތްކުރަން ވަނީ ނިންމައިފައެވެ.
ނަމަވެސް އެމްޑީޕީންނާއި، ދަ ޑިމޮކްރެޓުން ވާދަކުރާނީ ހުރިހާ ދާއިރާއަކަށް ވަކިންނެވެ.
މަޖިލިސް އިންތިޚާބު ފަސްކުރަން ގާނޫނަށް އިސްލާހު ހުށަހަޅަން ދައުރުން ބޭރުން ޖަލްސާއެއް ބާއްވަން ނިންމިއިރު، އިލެކްޝަންސް ކޮމިޝަން (އީސީ)އިން އިއްޔެ ބޭއްވި ގައުމީ ލަފާދޭ ކޮމިޓީގެ ބައްދަލުވުމުގައި ވެސް ޕާޓީތަކުން ވަނީ އިންތިޚާބު ބާއްވާ ތާރީޚާ ގުޅޭ ގޮތުން ކަންބޮޑުވުން ފާޅުކޮށްފައެވެ.
އެގޮތުން ސަރުކާރު ހިންގާ މައި ކޯލިޝަންގައި އޮތް ޕީޕީއެމްގެ ނައިބު ރައީސް، އަދި ކުރިން މަޖިލީހުގައި ހުންނެވުމަށްފަހު މިހާރު މިނިސްޓަރުކަމުގައި ހުންނެވި އަހްމަދު ޝިޔާމްވަނީ އަދިވެސް ދައުރުން ބޭރުން ޖަލްސާއެއް ބާއްވައިގެން ތާރީޚު ފަސްކުރުމުގެ ފުރުސަތު އޮތްކަމަށް ވިދާޅުވެފައެވެ.
މީގެ ކުރިން އެ ކޮމިޝަންގެ ރައީސް ފުއާދު ތައުފީގު ވިދާޅުވީ ރައްޔިތުންގެ މަޖިލީހުގެ އިންތިޚާބު ރޯދަމަހުގެ ތެރޭ ބާއްވަން މަޖުބޫރުވީ ގާނޫނަށް އިސްލާހު ގެނެވިފައި ނުވުމުންކަމަށެވެ.
ފުއާދު ވިދާޅުވީ، ގަނޫނަށް ބަދަލު ގެނައުމަކީ މަޖިލީހުގެ މެންބަރުން ގަބޫލުކުރައްވާ ކަމެއް ނޫން ކަމަށެވެ.
އެގޮތުން 120 ދުވަސްވީމަ އިއުލާނުކުރުން 140 ދުވަހަށް ބަދަލުކޮށް، 20 ދުވަސް ކުރިން އިންތިޚާބު އިއުލާނުކުރާ ގޮތަށް ގާނޫނު އިސްލާހުކުރެވިއްޖެނަމަ ރަމަޟާން މަހުގެ ކުރިން އިންތިޚާބު ބޭއްވޭނެ ކަމަށް ފުއާދު ވިދާޅުވިއެވެ.