24 Jan 2024, 15:55
ހައުސިން މިނިސްޓްރީއާ ހަވާލުކުރި 11 މަޝްރޫއު ހަވާލު ކުރީ މެނޭޖްކުރަން ކަމަށާއި އެ ޕްރޮޖެކްޓްތައް މުޅިން މިނިސްޓްރީއަށް ބަދަލުކުރީ ނޫން ކަމަށް އާޒިމް މިއަދު ވިދާޅުވެއްޖެއެވެ.
މިއަދު ބޭއްވި މި ބައްދަލުވުމަކީ އާޒިމްގެ މޭޔަރު ކަމުގައި, އޭނާގެ ރިޔާސަތުގައި ބޭއްވި މާލެ ސިޓީ ކައުންސިލްގެ ފުރަތަމަ ބައްދަލުވުމުވެ.
އެ ބައްދަލުވުމުގައި އޭނާ ވިދާޅުވީ، މިމަހުގެ 17ގައި ކައުންސިލުން ބޭއްވި ބައްދަލުވުމުގައި މިނިސްޓްރީއާ ހަވާލުކުރަން ނިންމި މަޝްރޫއުތައް ކުރިއަށްގެންގޮސްފައިވާ ހިސާބާ ގުޅޭ ރިޕޯޓެއް މަހަކު އެއް ފަހަރު މިނިސްޓްރީން ކައުންސިލަށް ހުށަހަޅަން ޖެހޭ ގޮތަށް ފާސްކުރަން، ދެން އޮންނަ ޖަލްސާއަކަށް އެޖެންޑާ ކުރާނެ ކަމަށެވެ.
އާޒިމް ވިދާޅުވީ ސިޓީ ކައުންސިލްތަކުގެ ޒިންމާތައް ނުހިމެނޭ ގޮތަށް، ހައުސިން މިނިސްޓްރީން މެނޭޖު ކުރުމަށް 11 މަޝްރޫއެއް ހަވާލުކުރި ކަމަށެވެ.
އެ މަޝްރޫއުތަކުގެ ތެރޭގައި:
ވިލިމާލޭގައި ކޮމާޝަލް އިމާރާތެއް ހެދުން
- މާލެ ހޯލްސޭލް ސެންޓަރު ހެދުން
- ލޯކަލް މާރުކޭޓު ހުރި ތަނުގައި މާލޭ މިކްސް ލޯކަލް މާރުކޭޓް އިމާރާތް ހެދުން
- 14 ޕާކިން އިމާރާތްތަކެއް އެޅުން
- މަސްވެރިންގެ ޕާކުގައި އޮފީސް އިމާރާތެއް ހެދުން
- މާލޭ ސިޓީ ކައުންސިލް އޮފީސް އިމާރާތް
- ވިލިމާލޭގައި އައުޓްޑޯ ޕާކެއް ހެދުން
- ވިލިމާލޭގެ 500 ހައުސިން ޔުނިޓް މަޝްރޫއު
- 1،500 ޔުނިޓު ހިމެނޭ ގޮތަށް ސިނަމާލެ ފްލެޓްތައް އަލުން ހެދުން
- ވިލިމާލެ ވިމެންސް މާކެޓް އެންޑް ފުޓްސަލް ދަނޑު ޕްރޮޖެކްޓް
- މާލެ ފެސިލިޓީ އަޕްގްރޭޑް ޕްރޮޖެކްޓް
އެ ބައްދަލުވުމުގައި އާޒިމް އިތުރަށް ވިދާޅުވީ، އޭނާގެ ފަރާތުން ސަރުކާރަށް ލިބެންވާ ހުރިހާ އެއްބާރުލުމެއް އެއްވެސް ހުރަހެއްނެތި ސަރުކާރަށް ލިބޭނެ ކަމަށެވެ.
އާޒިމްގެ މޭޔަރު ކަމުގައި އޭނާގެ ރިޔާސަތުގައި މިއަދު ބޭއްވި މާލެ ސިޓީ ކައުންސިލްގެ ފުރަތަމަ ބައްދަލުވުން---ފޮޓޯ/ސިޓީ ކައުންސިލް
"ރައްޔިތުންނަށް ފައިދާވާ ފަސޭހަވާ އަދި ރައްޔިތުންގެ ދިރިއުޅުމަށް ކުރިއެރުމެއް ލިބޭނެ އެއްވެސް ކަމެއްގައި ސަރުކާރަށް ޒައްރެއްގެ މިންވަރަށްވެސް އުނދަގުލެއް ނުކުރާނެ ކަމަށް އަޅުގަނޑު ފުރިހަމަ ޔަގީންކަން އަރުވަން،" އާޒިމް ވިދާޅުވިއެވެ.
އާޒިމް އެދިވަޑައިގަތީ އޭނާގެ މޭޔަރު ކަމުގައި ސިޓީ ކައުންސިލްގެ ސަބަބުން ސަރުކާރަށް އެއްވެސް ކަމެއްގައި ދަތިވާ ކަމަށްވާނަމަ އަދި އެފަދަ ކަމެއް ކައުންސިލަރަކަށް އެނގިވަޑައިގަންނަވާނަމަ ސީދާ އެކަމެއް އޭނާއާ ހިއްސާކުރުމަށެވެ.
ސިޓީ ކައުންސިލުން މުހިންމު މަޝްރޫއުތަކެއް ހަވާލުކުރުމާ ގުޅިގެން، މީގެ ކުރިން އާޒިމް ވަނީ އެކަން ހުއްޓައިލަން ގޮވައިލައްވާފައެވެ. އެގޮތުން، އޭނާ ވިދާޅުވީ މާލޭގެ ކަންކަން ކުރިއަށްގެންދަންވީ ގޮތް މާލޭ ރައްޔިތުން ވޯޓުން ބުނެދީފައިވީ ނަމަވެސް ސަރުކާރުން ނުފޫޒު ފޯރުވައިގެން ނިންމުންތައް ނިންމަމުން އަންނަ ކަމަށެވެ.
މާލެ ސިޓީ ކައުންސިލުން އާންމު ރައްޔިތުންނަށް ދޭންޖެހޭ ޚިދުމަތްތައް ދިނުމުގައިވެސް ފުރިހަމައަށް އެއްބާރުލުން ދެއްވާނެ ކަމުގެ ޔަގީންކަން އޭނާ ވަނީ ދެއްވާފައެވެ.
އާދަމް އާޒިމް މާލޭގެ މޭޔަރަކަށް ހޮވީ އެމްޑީޕީގެ ޓިކެޓްގައެވެ. ނަމަވެސް މާލެ ސިޓީ ކައުންސިލްގެ މެޖޯރިޓީ އޮތީ ޕީޕީއެމް ޕީއެންސީއަށެވެ.