24 Jan 2024, 13:55
ޣައްޒާ (24 ޖަނަވަރީ 2024): އިސްރާއީލުގެ ސިފައިން ތިން މަސް ވަންދެން ޣައްޒާގެ އެތަން މިތަނަނަށް ބޮންއަޅައި 25 ހާހަށްވުރެ ގިނަ ފަލަސްތީނުގެ އާންމުން މަރައި ހޮސްޕިޓަލްތަކާއި ސްކޫލްތަކާއި އާންމުންގެ ގެދޮރު ބިމާ ހަމަކޮށް އެއްގަމު މަގުން ޣައްޒާއަށް އަރައި ހަނގުރާމަކުރަމުންދާއިރު ވެސް ހަމާސް ޖަމާއަތް ބަލި ނުކުރެވޭތީ ހަމާސްގެ މައްޗަށް ކާމިޔާބު ހޯދުމަކީ އިސްރާއީލަށް ކުރެވޭނެކަމެއް ނޫންކަމަށް އިސްރާއީލުގެ ނޫހެއްކަމަށްވާ "ޖެރޫސަލަމް ޕޯސްޓް"އިން ބުނެފިއެވެ.
އިސްރާއީލުގެ ރިޓަޔަޑް ޖެނެރަލުންނާއި ކުރީގެ ސިފައިންނާއި ކޮމާންޑަރުންނާ ހަވާލާދީ "ޖެރޫސަލަމް ޕޯސްޓް"ގައި ޝާއިއުކޮށްފައިވާ ތަހުލީލީ ރިޕޯޓެއް ބުނާގޮތުން ހަމާސްގެ މުޖާހިދުން ބަލިކުރާނެގޮތެއް އަދި ހަމާސް ނައްތާލުމުގެ ލަނޑުދަނޑި ކާމިޔާބު ކުރާނެ ފޯމިއުލާއެއް އިސްރާއީލު ސިފައިންނަށް ފެންނާކަށް ނެތެވެ. ތިން މަސްވަންދެން ޣައްޒާއަށް ބޮންއެޅި ނަމަވެސް އަދި އެއްގަމުން ހަނގުރާމަ ކުރިނަމަވެސް ހަމާސްގެ މުޖާހިދުން ބަލިކުރެވޭނެކަމުގެ ޔަގީންކަމެއް އިސްރާއީލު ސިފައިންނަކަށް ނެތެވެ.
އިސްރާއީލު ސިފައިން ޣައްޒާއަށް ބޮންއަޅައި އަދި އެއްގަމުން ހަނގުރާމަކުރަނީ އެމެރިކާއާއި ޔޫރަޕްގެ ބޮޑެތި ބާރުތަކުގެ އަސްކަރީ އެހީތެރިކަމާއި ޖާސޫސީ މައުލޫމާތާއި ފައިސާގެ އެހީގައެވެ. މިފަދަ އެއްވެސް އެހީއެއްނެތި ހަމާސްގެ މުޖާހިދުން ބިމުއަޑީގެ ބިންގަރާސްތަކުގައި ތިބެ އިސްރާއީލު ސިފައިންނާ ކުރިމަތިލައި އިސްރާއީލު ސިފައިންގެ އެތައް ސަތޭކަ ބަޔަކު މަރާލައި އެތައް ހާސް ބަޔަކު ޒަޚަމްކޮށް އިސްރާއީލު އަސްކަރިއްޔާ މާޔޫސްކޮށްލުމުގައި ހަމާސްގެ މުޖާހިދުންވަނީ ކާމިޔާބު ހޯދާފައެވެ.
އިސްރާއީލުގެ ރަސްމީ ރޭޑިއޯ ބުނާގޮތުން ހަމާސްގެ މައްޗަށް ކާމިޔާބު ނުހޯދުނު ނަމަވެސް އިތުރު ހަ މަސް ދުވަހަށް ޣައްޒާގެ ހަނގުރާމަ ދިގުދެންމުމަށް އިސްރާއީލުގެ ހަނގުރާމައިގެ ކެބިނެޓުން އިއްޔެވަނީ ނިންމާފައެވެ. އިސްރާއީލުގެ އެހެން ނޫހެއްކަމަށްވާ "ހާއާޓްސް" ބުނާގޮތުން ހަމާސްގެ މައްޗަށް އިސްރާއީލު ސިފައިން ކާމިޔާބު ހޯދާނެކަމަށް ބުނެ އިސްރާއީލުގެ ހަރުކަށި ބޮޑުވަޒީރު ބެންޖަމިން ނަތަންޔާހޫ ހަދާ ދޮގުތައް އިސްރާއީލުގެ ގިނަ އާންމުންގެ މެދުގައިވެސް މިހާރުވަނީ ބޮޑު ޖޯކަކަށް ވެފައެވެ.
ތިންމަސްވަންދެން ޣައްޒާއާ ދެކޮޅަށް ކުރި ހަނގުރާމައިން ޣައްޒާގެ ހަތިޔާރުނެތް އާންމުންގެ 25 ހާސް މީހުން މެރުމާއި މަދަނީ ތަންތަން ހަލާކު ކުރުމާއި މުޖާހިދުންގެ ރައްދު ހަމަލާތަކުގައި އިސްރާއީލު ސިފައިންގެ އެތައް ބަޔަކު މަރުވުމާއި އެތައް ހާސް ސިފައިން ޒަޚަމްވުން ފިޔަވައި ދެން އިސްރާއީލަށް ހާސިލް ކުރެވުނީ ކޮންކަމެއްތޯ ހަމާސްގެ އަތްދަށުގައިވާ އިސްރާއީލުގެ އާއިލާތަކުން ގެންދަނީ ނަތަންޔާހޫ އާ ސުވާލުކުރަމުންނެވެ.
ހަމަލާތައް ހުއްޓާލުމަށްފަހު އިސްރާއީލުން ހައްޔަރުކޮށްފައިވާ ފަލަސްތީނުގެ އަސީރުން މިނިވަންކުރުމުން ހަމާސްގެ އަތްދަށުގައިވާ އިސްރާއީލުގެ ރަހީނުންވެސް މިނިވަންކުރެވެން އެބައޮތެވެ. ހަމާސްއިން ތަކުރާރުކޮށް މިކަންވަނީ ހާމަކޮށްފައެވެ. ޔަހޫދީ ހަރުކަށި ބޮޑުވަޒީރު ނަތަންޔާހޫއާއި އޭނާގެ ހަރުކަށި ސަރުކާރު ގެންދަނީ މިކަން ގަބޫލުނުކޮށް ބާރުގެ ބޭނުންކޮށް ހަމާސް ބަލިކޮށް ގަދަބާރުން އަސީރުން މިނިވަންކުރާނެކަމަށް ބުނެ ގަދަބަސް ބުނަމުންނެވެ.
ނަމަވެސް ބާރުގެ ބޭނުންކޮށްގެން އިސްރާއީލަށް އެންމެ އަސީރަކުވެސް މިހާތަނަށް މިނިވަން ކުރެވިފައެއް ނުވެއެވެ. އަނެއްކޮޅުން އިސްރާއީލުން ޣައްޒާއަށް ދޭ ބޮމުގެ ހަމަލާތަކުގައި އިސްރާއީލުގެ ބައެއް އަސީރުންވެސްވަނީ މަރު ވެފައެވެ.