24 Jan 2024, 12:18
އެސްޖޭ ކޮންސްޓުރަކްޝަންގެ ޚަރަދުގައި ޒިކުރާ މިސްކިތް ތިން ބުރިއަށް އިމާރާތްކުރުމުގެ އެއްބަސްވުމެއްގައި މިއަދު ސޮއިކޮށްފިއެވެ.
މި އެއްބަސްވުމުގައި ސޮއި ކޮށްފައިވަނީ މިއަދު ހެނދުނު، ހިލޭ އެހީގެ ދަށުން މިސްކިތްތައް އިމާރާތް ކުރުމަށްޓަކައި އިސްލާމީ ކަންތައްތަކާ ބެހޭ ވުޒާރާއިން ތިން ކުންފުންޏަކާ އެކު އެއްބަސްވުމުގައި ސޮއިކުރަން ބޭއްވި ރަސްމިއްޔާތުގައެވެ. މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ ވަޒީރު ޑރ. މުހައްމަދު ޝަހީމް އަލީ ސައީދެވެ. އެސްޖޭގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ ޑިރެކްޓަރު ޝިހާދު އިބްރާހިމެވެ.
އެސްޖޭ ކޮންސްޓުރަކްޝަންގެ ފަރާތުން ޒިކުރާ މިސްކިތް ތިން ބުރިއަށް މަރާމާތު ކުރުމުމަށް ނިންމާފައިވަނީ އެ ކުންފުނީގެ އަމިއްލަ ޚަރަދުގައެވެ.
ޒިކުރާގެ މިސްކިތުގެ އިތުރުން ވެސް، އަމިއްލަ ޚަރަދުގައި އިތުރު ދެ މިސްކިތެއް އިމާރާތްކުރަން މިއަދު ވަނީ އެއްބަސްވުމުގައި ސޮއިކޮށްފައެވެ. ހުޅުމާލޭގައި އިމާރާތްކުރާ އެ ދެ މިސްކިތުގެ މަސައްކަތް ކުރަން އެއްބަސްވުމުގައި ސޮއިކުރީ އަލީމް ފައުންޑޭޝަނާއި ލިސާ މޯލްޑިވްސްއެވެ.
ހުޅުމާލޭގައި އިމާރާތްކުރާ ދެ މިސްކިތަކީ 2،000 ނުވަތަ 3،000 މީހުންގެ ޖާގައިގައި މިސްކިތްތަކެއް ކަމަށް ޝަހީމް މިއަދު ވިދާޅުވިއެވެ.
ވަޒީރު ޑރ. މުހައްމަދު ޝަހީމް އަލީ ސައީދު އެއްބަސްވުމުގައި ސޮއި ކުރައްވަނީ -- ސަން ފޮޓޯ: އިންފިނިޓް މޮމެންޓްސް/ މުހައްމަދު މާވީ
ޝަހީމް ވިދާޅުވީ ޒިކުރާ މިސްކިތް ހުރި ސަރަހައްދަކީ ވަރަށް ގިނަ މީހުން އެ ސަރަހައްދުގައި އާބާދުވެފައިވާ ސަރަހައްދެއް ކަމުން އެ މިސްކިތް ބޮޑު ކުރުމަކީ ވަރަށް ބޭނުންތެރި ކަމެއް ކަމަށެވެ.
ޝަހީމް ވަނީ މި ކުންފުނިތައް އަމިއްލަ ޚަރަދުގައި މިސްކިތްތައް އަޅަން އިސްނެންގެވީތީވެ އެ ކަމަށް އުފާކުރާކަން ފާހަގަކުރައްވައިފައެވެ.
ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި 2018 ވަނަ އަހަރު ވެސް ޒިކުރާ މިސްކިތް ހުރި ބިމުގައި މިސްކިތަކާ އެކު 10 ބުރީގެ އޮފީސް އިމާރާތެއް އަޅަން ހަވާލުކުރިއެވެ. އެކަމަކު، އެ އެއްބަސްވުން ނިމުނު ސަރުކާރުގައި ވަނީ ބާތިލުކޮށްފައެވެ.
ކުރީ ސަރުކާރުން އޭރު ޒިކުރާ މިސްކިތް ހަދަން ހެދި އެއްބަސްވުން ބާތިލުކުރީ ކޮރަޕްޝަންގެ މައްސަލަތަކެއް އުޅޭ ކަމަށް ތުހުމަތު ކުރެވިގެންނެވެ. އެކަމަކު، އެ މައްސަލަ ސާބިތުވެފައެއް ނުވެއެވެ.
ޒިކުރާ މިސްކިތް އެޅުމަށް އެސްޖޭއާ ހަވާލުކުރުމުން ޔާމީން ސަރުކާރުގައި އެ ކުންފުންޏަށް ވަނީ އިކުއިޒިޝަންގެ ގޮތުގައި 30 މިލިއަން ރުފިޔާ ދީފައެވެ. އެއްބަސްވުން ބާތިލުކުރުމުން ގެއްލުމުގެ ބަދަލު ހޯދަން އެސްޖޭއިން ދައުވާ ކުރުމުން ދައުލަތުން ވެސް އެސްޖޭއަށް ދިން 30 މިލިއަން އަނބުރާ ހޯދަން ދައުވާ ކުރިއެވެ.
ފަހުން، ދެ ފަރާތުން ވަނީ ބަދަލުގައި ހުޅުމާލޭގައި މިސްކިތެއް އަޅާގޮތަށް އެ މައްސަލަ ކޯޓުން ބޭރުގައި ނިންމައިފައެވެ.