24 Jan 2024, 23:19
ޣައްޒާގެ ދެކުނުގައި އޮންނަ ޚާން ޔޫނިސްގައި ހުންނަ އަލް ނަސީރު ހޮސްޕިޓަލަށް އަމާޒުކޮށް އިސްރާއީލުން ހަމަލާ ދީފިއެވެ. ފަލަސްތީނުގެ ސިއްހީ ވުޒާރާއިން ބުނީ ހަމަލާތަކުގެ ސަބަބުން އެ ހޮސްޕިޓަލުގައި ތިބި އާންމުން ތިބީ ބިރުވެރިކަމެއްގެ ތެރޭގައި ކަމަށެވެ.
އެ ހަމަލާތަކުގެ ސަބަބުން ގިނަ ބަޔަކު ޒަޚަމްވެފައިވާ ކަމަށް ބެލެވޭ ކަމަށް ވެސް އެ ވުޒާރާއިން ނެރުނު ބަޔާނެއްގައި ބުނެފައިވެއެވެ.
ފަހަކަށް އައިސް ޚާން ޔޫނިސް ވެފައިވަނީ އިސްރާއީލުން އެންމެ ވަރުގަދައަށް ހަމަލާދޭ އެ ސަރައްހައްދަށެވެ. އެގޮތުން ޚާން ޔޫނިސްގައި ހުރި މީހުން ދިރިއުޅޭ ވަގުތީ ހިޔަލަކަށް ހޯމަ ދުވަހު ވެސް ވަރުގަދަ ހަމަލާތަކެއް އަމާޒުކޮށްފައިވާ ކަމަށް ފަލަސްތީނު ރެފިއުޖީންނާ ބެހޭ އދ.ގެ އިދާރާއިން ބުނެއެވެ.
އެ ހަމަލާތަކުގައި ގާތްގަނޑަކަށް ހަ މީހުންގެ ގެދޮރު ގެއްލި އެތައް ބަޔަކު ވަނީ ޒަޚަމްވެފައެވެ.
ޣައްޒާގެ ދެކުނަށް އިސްރާއީލު ފައުޖުތަކުން ޣައްޒާއަށް ދެމުންގެންދާ ހަމަލާތަކުގެ ސަބަބުން ޣައްޒާގެ މިލިއަނަކަށްވުރެ ގިނަ މީހުން މިހާރު ތިބީ ޣައްޒާއާއި މިސްރުގުޅޭ ސަރަހައްދީ ރޮނގުގެ މިސްރު ފަޅީގައި އޮންނަ ރަފަޙް ސިޓީގައެވެ.
އޮކްޓޫބަރު ހަތް ވަނަ ދުވަހުން ފެށިގެން އިސްރާއީލު ފައުޖުތަކުން ޣައްޒާއަށް ދެމުންގެންދާ އުދުވާނީ ހަމަލާތަކުގައި މިހާތަނަށް ގާތްގަޑަނކަށް 25،500 މީހުން ވަނީ ޝަހީދުކޮށްލައިފައެވެ. އޭގެ ތެރޭގައި ގިނައީ ކުޑަކުދިންނާއި އަންހެނުންނަނެވެ.