24 Jan 2024, 09:32

އޮސްޓްރޭލިއަން އޯޕަން ޓެނިސް މުބާރާތުގެ ފިރިހެން ސިންގަލްސްގެ ސެމީ ފައިނަލުން މުބާރާތުގެ އެންމެ ފަހުގެ ޗެމްޕިއަން އަދި މި މުބާރާތުގައި އެއްވަނައަށް ރޭންކް ކުރެވިފައިވާ ސާބިއާގެ ނޯވަކް ޖޯކޮވިޗް ޖާގަ ހޯދައިފިއެވެ.

ސެމީ ފައިނަލުން ޖޯކޮވިޗް ޖާގަ ހޯދީ ކުއާޓާ ފައިނަލްގައި މުބާރާތުގައި 12 ވަނައަށް ސީޑު ކުރެވިފައިވާ އެމެރިކާގެ ޓޭލާ ފްރިޓްޒްއާ ބައްދަލުކުރި މެޗު ތިން ސެޓް އެއް ސެޓުން ކާމިޔާބު ކޮށްގެންނެވެ.

މެޗުގެ ފުރަތަމަ ސެޓް ދިޔައީ ވަރަށް ހަމަހަމަ ކޮށެެވެ. މިގޮތުން ދެކުޅުންތެރިން 6-6 އިން އެއްވަރުވެ، ޓައިބްރޭކަކަށް ގޮސް ޖޯކޮވިޗް ކުރި ހޯދީ 7-3 އިންނެވެ. ނަމަވެސް ޖެހިގެން އައި ސެޓުގައި ފްރިޓްޒްވަނީ 4-6 ސެޓު ކާމިޔާބުކޮށް އެއްވަރުކޮށްފައެވެ. މެޗުގެ ފަހު ދެ ސެޓުގައި ފްރިޓްޒް ފެނިގެންދިޔައީ ވަރުބަލިކޮށެވެ. މިގޮތުން ދެ ސެޓު ޖޯކޮވިޗް ވަނީ ފަސޭހަކަމާ އެކު 6-2 އަދި 6-3 އިން ކާމިޔާބުކޮށް ސެމީ ފައިނަލްގެ ޖާގައެއް ކަށަވަރުކޮށްފައެވެ.

މެޗަށް ފަހު ވާހަކަދައްކަމުން ޖޯކޮވިޗް ބުނީ މެޗުގެ ފުރަތަމަ ދެ ސެޓުގައި އޭނާއަށް ގިނަ މައްސަލަތަކަކާ ކުރިމަތިލާން ޖެހުނު ކަމަށެވެ. އަދި، ދެ ސެޓު އެއްގޮތަކަށް ވެސް ފަސޭހަ ނޫންކަން އޭނާ ފާހަގަ ކުރިއެވެ.

މުބާރާތުގެ ސެމީފައިނަލްގައި ޖޯކޮވިޗް ބައްދަލުކުރާނީ މުބާރާތުގައި ހަތަރުވަނައަށް ސީޑު ކުރެވިފައިވާ އިޓަލީވިލާތުގެ ޔަނިކް ސިނާއެވެ.

ސިނާ މިމުބާރާތުގެ ސެމީފައިނަލުން ޖާގަ ހޯދީ ކުއާޓާ ފައިނަލްގައި ފަސްވަނައަށް ސީޑު ކުރެވިފައިވާ ރަޝިއާގެ އަންޑްރޭ ރުބްލޭވްއާ ބައްދަލުކުރި މެޗު ސީދާ ތިން ސެޓުން ކާމިޔާބު ކޮށްގެންނެވެ. ނަމަވެސް އެ މެޗުގެ ފުރަތަމަ ދެ ސެޓް ދިޔައީ ވަރަށް ވާދަވެރިކޮށެވެ. މިގޮތުން ދިގު ރެލީތަކެއް މި ދެ ސެޓްގައި ފެނިގެން ގޮސްފައިވެއެވެ.

މެޗުގެ ފުރަތަމަ ސެޓު 6-4 އިން ސިނާ ކާމިޔާބު ކުރިއިރު ދެވަނަ ސެޓު ވަނީ ޓައި ބްރޭކަކަށް ގޮސްފައެވެ. އަދި ޓައި ބްރޭކްގައި ރުބްލޭވްވަނީ 5-1 ގެ ލީޑެއް ވެސް ނާގަފައެވެ. ނަމަވެސް ސިނާ ވަނީ ފަހަތުން އަރައި ޖެހިޖެހިގެން ހަ ޕޮއިންޓް ހޯދައި މި ޓައިބްރޭކް 7-5 އިން ކާމިޔާބު ކޮށްފައެވެ. ފަހު ސެޓު ސިނާ ކާމިޔާބު ކުރީ 6-3 އިންނެވެ.

މެޗުން ބަލިވުމާ އެކު ރުބްލޭވް ވަނީ އޭނާ މިހާތަނަށް ކުޅުނު ގްރޭން ސްލޭމްގެ ކުއާޓާ ފައިނަލުގެ 10 މެޗުން ވެސް ބަލިވެފައެވެ.

ހުކުރު ދުވަހު ޖޯކޮވިޗާ ދެކޮޅަށް ކުޅުމަށް ހަމަޖެހިފައިވާ ސެމީފައިނަލް މެޗާ ގުޅޭގޮތުން ވާހަކަ ދައްކަމުން ސިނާ ވަނީ ދުނިޔޭގެ އެއްވަނަ ކުޅުންތެރިޔާއާ ވާދަކޮށްލަން ލިބޭތީ އުފާކުރާ ކަމަށް ބުނެފައެވެ. އަދި، ޖޯކޮވިޗާ އެކު ކުޅެން ލިބޭ ކޮންމެ ފުރުސަތަކީ ވެސް އޭނާއަށް ވަރަށް ހާއްސަ ކަމެއްގެ ގޮތުގައި ސިނާ ފާހަގަކުރިއެވެ.

މިދިޔަ އަހަރުގެ މުބާރާތުގައި ސިނާ ވަނީ ސެމީފައިނަލްގައި ޖޯކޮވިޗް އަތުން ބަލިވެފައެވެ.