24 Jan 2024, 06:39
ހަގީގީ ހާދިސާތަކުގެ މައްޗަށް ބިނާކޮށް ރެޑް ޗިލީޒް ކުންފުނިން ގެނެސްދޭ ކްރައިމް ޑްރާމާ "ބަކްޝަކް" ކުރިއަށް އޮތް ފެބްރުއަރީ މަހުގެ ނުވަވަނަ ދުވަހު ނެޓްފްލިކްސްގައި ރިލީޒް ކުރާނެކަން އިއުލާނު ކޮށްފިއެވެ.
ބަތަލާ ބޫމީ ޕެޑްނެކަރު ތަހުގީގީ ނޫސްވެރިއެއްގެ ރޯލު ކުޅެފައިވާ މި ފިލްމަކީ ގޯރީ ޚާން ޕްރޮޑިއުސްކޮށް ޕުލްކިތު ޑައިރެކްޓް ކޮށްފައިވާ ފިލްމެކެވެ.
އަންހެނުންނާ ދެކޮޅަށް ސިއްރިއްޔާތުގައި ބަޔަކު މީހުން ހިންގާ ޖަރީމާތަކެއްގެ އަނދިރި ފަރާތް މި ފިލްމުން ދައްކުވައިދޭނެއެވެ. މި ޖަރީމާތައް އާއްމުންނަށް ހާމަކޮށްދީ އެ ފަރާތްތަކަށް އިންސާފު ހޯދައިދިނުމަށް އަންހެން ނޫސްވެރިޔަކު ކުރާ މަސައްކަތްތަކުގެ މައްޗަށް ބިނާކޮށް އުފައްދާފައިވާ މި ފިލްމުން ބެލުންތެރިންނަށް ސިހުން ގެނުވާނެ ގިނަ މަންޒަރުތަކެއް ފެންނާނެ ކަމަށް ރެޑް ޗިލީޒްއިން ވަނީ ބުނެފައެވެ.
ފިލްމުގެ ޓީޒާ އާއްމުކުރަމުން ޑައިރެކްޓަރު ޕުލްކިތު ބުނެފައިވަނީ ފިލްމުގައި ދައްކުވައިދޭ ހާދިސާތަކުގެ އަލީގައި މުޖްތަމައަށް ހެޔޮ ބަދަލުތަކެއް އަންނާނެކަމަށް އުއްމީދުކުރާ ކަމަށެވެ. ފިލްމުން ހާސިލުކުރަން ބޭނުންވާ މަގުސަދަކީ ވެސް އެއީ ކަމަށް ޕުލްކިތު ވަނީ ބުނެފައެވެ.
ބަތަލާ ބޫމީ އަދި ފިލްމީ ތަރި އަޔުޝްމާން ކުރާނާ-- ފޮޓޯ/އިންޓަނެޓް
ނެޓްފްލިކްސްއާ ގުޅިގެން މިފަދަ ވާހަކަތައް ބެލުންތެރިންނާ ހަމައަށް ގެނެސްދެވުމަކީ ރެޑްޗިލީޒްއިން ވަރަށް ބޮޑު އިސްކަމެއްދޭ ކަމެއްކަމަށް އެ ކުންފުނިން ވަނީ ފާހަގަކޮށްފައެވެ.
މިދިޔަ އަހަރު ފިލްމު "ބީޅް"، "އަފްވާ" އަދި "ދަ ލޭޑީ ކިލާ" ފަދަ ފިލްމުތަކުން ފެނިފައިވާ ބޫމީ އަންނަނީ އިތުރު ފިލްމެއްގައި ވެސް މަސައްކަތް ކުރަމުންނެވެ. އަރުޖުން ކަޕޫރު ޑިނޯ މޯރިއާ އަދި ރަކުލް ޕްރީތް ސިންގް މުހިއްމު ރޯލުތަކުން ފެންނާނެ މި ފިލްމަކީ ޑައިރެކްޓަރު މުދައްސަރު އަޒީޒްގެ ފިލްމެކެވެ.