24 Jan 2024, 06:46
ބޮލީވުޑްގެ އެކްޓަރު ސަލްމާން ޚާން ލީޑު ރޯލު ކުޅޭ ފިލްމު "ދަ ބުލް"ގެ މަސައްކަތް ކުރިއަށް އޮތް ފެބްރުއަރީ މަހު ފަށަން ތައްޔާރުވެފައިވަނިކޮށް ފިލްމުގެ މަސައްކަތް މަޑުޖައްސާލައިފިއެވެ.
މި ފިލްމަކީ، ދިވެހިރާއްޖެއަށް ކުރިމަތިވި ނޮވެމްބަރު ތިނެއްގެ އުދުވާނީ ހަމަލާއިން ރާއްޖެ ސަލާމަތް ކުރުމަށް އިންޑިއާގެ އަސްކަރިއްޔާއިން ހިންގި މަޝްހޫރު އޮޕަރޭޝަން ކެކްޓަސްގެ މައްޗަށް ބިނާކޮށް އުފައްދާ ފިލްމެކެވެ.
ސަލްމާން ޚާން ލީޑު ރޯލު ކުޅެން ހަމަޖެހިފައިވާ މި ފިލްމުގެ މަސައްކަތް މަޑުޖައްސައިލަން ނިންމާފައިވަނީ އިންޑިއާއާއި ރާއްޖެއާ ދެމެދު އުފެދިފައިވާ ހަމަނުޖެހުންތަކުގެ ސަބަބުން ކަމަށް އިންޑިއާގެ ފިލްމީ ޚަބަރުތައް ގެނެސްދޭ ބޮލީވުޑް ހަންގާމާއިން ވަނީ ބުނެފައެވެ. އިންޑިއާގެ ފިލްމީ ޖަމާއަތަކުން ބޮލީވުޑްގެ ފިލްމުތަކުގެ ޝޫޓިންތައް ރާއްޖޭގައި ނުނެގުމަށް ގޮވާލާފައިވާއިރު ދަރުމާ ޕްރޮޑަކްޝަންސްގެ މި ފިލްމުގެ ޝޫޓިން ޝެޑިއުލް ފަސްކުރެވިފައިވަނީ ދެ މަސް ދުވަހުގެ މުއްދަތަކަށެވެ.
ސަލްމާން ޚާން ބަތަލާ ކެޓްރީނާ ކައިފާއެކު ފިލްމު "ޓައިގާ3"ގެ މަންޒަރެއްގައި-- ފޮޓޯ/އިންޓަނެޓް
ދެ ޤައުމުގެ ގުޅުން ރަނގަޅުވެ، ހަމަޔަކަށް އެޅުމުން ފިލްމުގެ މަސައްކަތް އަލުން ފަށާނެ ކަމަށް ރިޕޯޓުތަކުން ވަނީ ބުނެފައެވެ. މި ފިލްމުގެ ފެބްރުއަރީ މަހުގެ ޝެޑިއުލް ފެށުމަށް ސަލްމާން ވަނީ ވަރަށް ހާއްސަ ތަމްރީނުތަކެއް ފުރިހަމަކޮށް ހަށިގަނޑަށް ބޮޑު ބަދަލުތަކެއް ވެސް ގެނެސްފައެވެ.
ޕްރޮޑިއުސަރު ކަރަން ޖޯހަރާ އެކު ސަލްމާން ޚާން 25 އަހަރަށް ފަހު އެކީގައި މަސައްކަތް ކުރަން ނިންމާފައިވާ މި ފިލްމުގައި އެކްޓަރު ފެންނާނީ، ނޮވެމްބަރު ތިނެއްގެ ޓެރަރިސްޓު ހަމަލާގައި ބާޣީންގެ އަތުން ދިވެހި އަސީރުން ސަލާމަތް ކުރުމަށް އިންޑިއާއިން ހިންގި 'އޮޕަރޭޝަން ކެކްޓަސް'ގެ އިސް އޮފިސަރުގެ ރޯލުންނެވެ.