24 Jan 2024, 06:35
ދާދި ފަހުން ރިލީޒްކުރި ފިލްމު "ކޯ ގަޔޭ ހަމް ކަހާ"ގެ ބަތަލާ އަނަނިޔާ ޕާންޑޭ އިންޑިއާގެ ފެޝަން ޝޯތައް ފަތަހަ ކުރުމަށް ފަހު ބައިނަލްއަޤުވާމީ ފުރަތަމަ ޝޯގައި ބައިވެރިވެއްޖެއެވެ.
ފްރާންސްގެ ޕެރިސްގައި ކުރިއަށްދިޔަ 'ޕެރިސް ކޯޗާ ވީކް' ޝޯއަކީ އަނަނިޔާ ބައިނަލްއަޤުވާމީ ސްޓޭޖެއްގައި ހިނގާލި ފުރަތަމަ ސްޓޭޖް ނުވަތަ ރޭމްޕް ވޯކެވެ.
ދުނިޔޭގެ މަޝްހޫރު ބޮޑެތި ބްރޭންތަކުގެ އާ ކަލެކްޝަން އާއްމުންނަށް ތަޢާރަފުކުރާ ޕެރިސް ފެޝަން ވީކްގައި ބައިވެރިވުމަކީ އަނަނިޔާގެ ކެރިއަރުގައި ހާސިލުކުރަން ބޭނުންވި ވަރަށް މުހިއްމު އެއް ހަރުފަތް ކަމަށް ބަތަލާ ވަނީ ބުނެފައެވެ. އިންޑިއާގެ ފެޝަން ޑިޒައިނަރު ރާހުލް މިޝްރާގެ ކަލެކްޝަން އަނަނިޔާ ތަޢާރަފުކުރިއިރު މި ފަހަރުގެ ކަލެކްޝަން ހާއްސަކޮށްފައިވަނީ ނެތެމުންދާ އެކި ބާވަތްތަކުގެ ޖަނަވާރުތަކަށެވެ.
ފިލްމު "ސްޓޫޑަން އޮފް ދަ އިއާ 2"އިން ބޮލީވުޑަށް ތައާރަފުވި ބަތަލާ ވަނީ ޕެރިސް ފެޝަން ޝޯގެ ބައެއް މަންޒަރުތައް ފެންނަ ފޮޓޯތަކާއި ވީޑިއޯތައް އަމިއްލަ އިންސްޓަގްރާމްގައި ހިއްސާކޮށްފައެވެ.
އަނަނިޔާ ޕެރިސްގެ ފެޝަން ވީކްގައި-- ފޮޓޯ/އިންޓަނެޓް
ބޮލީވުޑްގެ އެންމެ އުއްމީދީ ބަތަލާއިންގެ ތެރޭ ހިމެނޭ އަނަނިޔާ އެންމެ ފަހުން އިންޑިއާގައި ބައިވެރިވި ލެކްމޭ ފެޝަން ޝޯވްއަށް ފަހު ވަރަށް ގިނަ ބަޔަކު ވަނީ އަނަނިޔާގެ ރޭމްޕް ވޯކަށް ތައުރީފުކޮށްފައެވެ. ފިލްމީ ދާއިރާއަށްވުރެ ބޮޑަށް އަނަނިޔާ މޮޑެލިން ދާއިރާއިން ކުރިއަށްދާން ވިސްނައިފިނަމަ އެ ކެރިއަރު މާ ކާމިޔާބުވާނެކަމަށް ވެސް ގިނަބަޔަކު ވަނީ ބުނެފައެވެ.
ފިލްމު "ގެހެރައިޔާން" އަދި "ޑްރީމް ގާލް 2"ފަދަ ފިލްމުތަކުން މޮޅު އެކްޓިން ހުނަރު ދެއްކި ބަތަލާ އަންނަނީ މި އަހަރު ދެ ފިލްމެއްގައި މަސައްކަތް ކުރަމުންނެވެ.
މީގެ އިތުރުން "ކޯލް މީ ބޭ"ގެ ނަމުގައި އުފައްދާ ވެބް ސީރީޒެއްގައި ވެސް އަނަނިޔާ އަންނަނީ މަސައްކަތް ކުރަމުންނެވެ. އެމޭޒަން ޕްރައިމްގައި ޕްރިމިއަކުރާ މި ވެބް ސީރީސް ރިލީޒްކުރާނެ ދުވަހެއް އަދި އިއުލާނެއް ނުކުރެއެވެ.