24 Jan 2024, 09:34
މައާލް މަޑުމަޑުން، ވަރަށް ފަރުވާތެރިވެ ހުރެ ރާދިންގެ ޕިންގަރޕްރިންޓުން ފޯނު ހުޅުވާލާފައި ބަލާލުމާއެކު، ފެނުނު އެއްޗަކުން ހައިރާންކަމާއެކު ރާދިންއަށް ބަލާލެވުނެވެ.
އޭގައި އެވަނީ އެމީހުންގެ ކައިވެނީގެ ފުރަތަމަ ރޭ ރާދިން ނަގާފައިވާ ފޮޓޯގަނޑެއްކަން ދެނެގަންނާކަށް އޭނާއަށް އުނދަގުލެއް ނުވެއެވެ. އޭނާގެ ލޯ ކައިރީގައި އަޅާފައިވާ އަނދުންތައް ހުރީ ފޭދިފައެވެ. އެރޭގެ އެވަގުތު އޭނާގެ ފޮޓޯއެއް ނަގަން ރާދިންއަށް ވިސްނުނީ ކިހިނެއްބާއޭ މައާލްގެ ހިތަށް އެރިއެވެ. ރާދިން އޭނާ ދެކެ އޭރު އެހާ ރުޅިއާދެއެވެ. މައާލް ފޯނުން އިތުރު ފޮޓޯގަނޑެއް އަޅުވާލިއެވެ. ދެންވެސް ފެނުނީ އޭނާގެ ފޮޓޯގަނޑެކެވެ. އެއީ އޭނާގެ ބޯ ރާދިން، ކޮށައިދިން ދުވަހުގައި ނަގާފައިވާ ފޮޓޯގަނޑެކެވެ. ހައިރާންކަމާއެކު، އޭނާ އެ ފޯނުގައި ހުރި ފޮޓޯތައް ބަލަމުން ދިޔައެވެ. އެ އަލްބަމުގައި ހުރީ ހުސް އޭނާގެ ފޮޓޯތަކެވެ. އެކި ދުވަސްތަކުގެ މަތިން ރާދިން ނަގާފައިވާ ފޮޓޯތަކެވެ. އެތައް ބައިވަރު ފޮޓޯއެއް ހުއްޓެވެ. އޭނާއާ ރާދިންއާ ދެމެދު ވާހަކަ ދެކެވުނު އެތަކެއް ދުވަހެއްގެ ހަނދާންތަކެއް ރާދިންގެ ފޯނުގައި ރައްކާކުރެވިފައި ހުއްޓެވެ. ހިތަށް ބުނެދޭން ނޭނގޭ ގޮތްތަކެއް ވެގެން ދިޔަ މައާލްއަށް ރާދިންއަށް ބަލާލެވުނެވެ. އޭނާ ފޯނު ސައިޑް ކަބަޑު މަތީގައި ބާއްވަމުން، ރާދިންގެ މޫނަށް ވަރަށް ފަރުވާތެރިކަމާއެކު ބަލާލިއެވެ. ކުޑަކޮށް ގުދުވެލުމަށްފަހު، އެ މޫނުމަތިން ކަމެއް ދެނެގަންނަން މައާލް މަސައްކަތް ކުރާ ފަދައެވެ.
"ރާދިން އަހަރެން ދެކެ އެހާ ލޯބިވާއިރު ކީއްވެ އެގޮތަށް ކަންތައްކުރީ؟ އަހަރެން ވެސް ރާދިން ދެކެ އިންތިހާއަށް ލޯބިވަން. ރާދިންގެ ދެލޮލުން ވޭން ފެންނަ ކޮންމެ ފަހަރަކު އަހަރެންގެ ހިތްވެސް ހީވަނީ ކުދިކުދި ވެދާނެހެން. ނަފްރަތު ކުރަން އުޅުނު ނަމަވެސް އެކަމެއް އަހަންނަކަށް ނުކުރެވުނު. ވެފައި ހުރި ދެރަ ރުޅިވެރިކަމުގެ ސިފައިގައި ބޭރުކުރެވުނު ނަމަވެސް، އަހަރެންގެ ހިތުން ރާދިންއަށް ދެވިފައިވާ މަޤާމަކަށް ބަދަލެއް ނައި. ކީއްވެތަ އަހަރެން ރާދިން ދެކެ މިހާ ލޯބިވަނީ. ރާދިންއާ ވަކިވާކަށް ބޭނުމެއް ނުވޭ. އެކަމަކު…." މައާލް އޭނާގެ އަމިއްލަ ނަފްސާ ވާހަކަ ދައްކަމުން ދިޔައެވެ.ި މަޑުމަޑުން އޭނާ ރާދިންގެ މޫނުގައި ފިރުމާލިއެވެ. ނިދީގައި ރާދިން ކުޑަކޮށް ހަރަކާތްކޮށްލުމާއެކު، މައާލް ވަގުތުން އޭނާގެ އަތް ދަމައިގަތެވެ. އިރުކޮޅަކު ޖެހި ބުދެއްހެންް ހުރުމަށްފަހު، ރާދިން ނުހޭލާކަން ޔަޤީންވުމުން އޭނާ ކޮޓަރިން ނުކުންނަން މިސްރާބުޖެހިއެވެ. މަޑުމަޑުން ކޮޓަރީގެ ދޮރު ލައްޕާލާފައި މައާލް ސިޑިން މައްޗަށް އަރައިގެން ގޮސް އޭނާގެ ކޮޓަރިއަށް ވަދެ އެނދުގައި އޮށޯވެލިއެވެ. އޭރު އޭނާގެ ހަނދާނުގައި ވަނީ ރާދިންގެ ފޯނުގައި ހުރި ފޮޓޯތަކެވެ. އޭނާގެ ލޯ ކައިރީގައި އަނދުންތައް ފޭދިފައި ހުރި ފޮޓޯ މަތިން ހަނދާންވެ މައާލްއަށް ހީނގަނެވުނެވެ. ރާދިންގެ ހިތުގައި ވެސް އޭނާއާ މެދު އިޙްސާސްތަކެއް ވާކަމުގައި މައާލްއަށް ޔަޤީން ކުރެވުނެވެ. ވެދިޔަ ހުރިހާކަމަކަށްފަހުވެސް، ރާދިންއާ މެދު އޭނާގެ ހިތުގައި އުފެދިފައިވާ އިޙްސާސްތައް ބަދަލު ނުވެ ހުރުމުގެ ސިއްރަކީ އޭނާގެ ހިތުން ރާދިންއަށް ދެވިފައިވީ ގަދަރާއި، ލޯބިކަން މައާލްއަށް ޔަޤީންވަމުން ދިޔައެވެ. އެ އިޙްސާސްތަކުގެ ފުންކަމުން، އެއީ އެހާ ފަސޭހައިން އޭނާއަށް ފުރަގަސްދެވިދާނެ އިޙްސާސްތަކެއް ނޫންކަންވެސް މައާލްއަށް ޔަޤީން ކުރެވުނެވެ.
ރާދިންއާ އޭނާގެ ގުޅުން ފެށުނު ގޮތުން ފަށައިގެން މިއަދާ ހިސާބަށް ވެފައި ހުރި ހުރިހާކަމެއް ހީވަނީ މައާލްގެ ސިކުނޑީގައި ކުރެހެމުންދާ ހެންނެވެ. ރާދިންއާއެކު ހޭދަކުރެވުނު އުފާވެރި ވަގުތުތަކާއި ދެކެވިފައި ހުރި ވާހަކަތައް މަތިން އޭނާ ހަނދާންވިއެވެ. އޭނާ ދެރަވެފައި ހުންނަ ވަގުތުތަކުގައި ރާދިން ހތްވަރު ދޭ ގޮތާއި އޭނާއަށްޓަކައި ރާދިން ބަދަލުވީވަރު މައާލްއަށް ވަޒަންކޮށްލެވުނެވެ. ރާދިންގެ އުޅުމުގައި ހުރި ނޭދެވޭ އެތަކެއް ސިފަތަކެއް ވަނީ ބަދަލުވެފައެވެ. ރައްޓެހިންނާއެކު އުޅުނު އުޅުން ރާދިން ދޫކޮށްލިކަން މައާލްއަށް އެނގެއެވެ. އަދި ރާދިންގެ ހުރިހާ އެކުވެރިންނަށް ވުރެ އޭނާއަށް އިސްކަން ދިންކަންވެސް އޭނާއަށް އެނގެއެވެ. އެ ހުރިހާކަމެއް ހެކި ދެނީ ރާދިން އޭނާ ދެކެ ލޯބިވާކަމެވެ. އެހާވަރަށް އޭނާގެ ގާތުގައި އާދޭސްކޮށްފައި ރާދިން، އެރޭ ސަޖާއާއެކު ހިނގި އެއްވެސްކަމެއް ހަނދާނުގައި ނެތްކަމަށް ބުނާއިރު، އެ ދެލޮލުން ވޭނާއި ތެދުވެރިކަން ފާޅުވަމުން ދެއެވެ. މައާލްއަށް އެދޭވަރު ރާދިންގެ ދެލޮލުން ފާޅުވެއެވެ.
އެރޭ އޭނާއަށް ނިދުނީވެސް އެފަދަ ޚިޔާލުތަކެއްގައި އޮއްވައެވެ.
*****
ހެނދުނު ހަތެއް ޖަހަން އުޅެނިކޮށް މައާލްއަށް ހޭލެވުނެވެ. އޭނާ ފެންވަރާލައިގެން ތިރިއަށް ދިޔައިރު، ރާދިން ސޯފާގައި އިށީނދެލައިގެން ފޯނާ ކުޅެން އިނެވެ. މައާލް ފެނުމާއެކު އޭނާއަށް މައާލްއާ ދިމާލަށް ބަލަހައްޓައިގެން އިނދެވުނެވެ. ހޭލެވުނުއިރު އޭނާގެ ފޯޏު ސައިޑް ކަބަޑު މަތީގައި ބާއްވާފައި އޮތުމުން އެއީ މައާލްގެ ކަމެއްތޯ ބަލަން އޭނާ ބޭނުންވިއެވެ. އެހެންނަމަވެސް، އެ ސުވާލު ކުރާކަށް ރާދިންއަކަށް ނުކެރުނެވެ. ރާދިން އެބަލާ ސަބަބު އެނގުނު ފަދައަކުން މައާލް އޭނާގެ ނަޒަރު ރާދިންއާ ވާކިކޮށްލިއެވެ.
"ދަނީތަ؟" ރާދިން އިނީ ރީތިވެގެންކަމުން މައާލް ސުވާލުކޮށްލިއެވެ.
"އާނ… ގޮސްލަން ވެގެން ދެން މިއުޅެނީ. ބައްޕަ އަންނަންދެން މަޑުކޮށްލައިގެން މި އިނީ." ރާދިން މައާލްގެ ސުވާލަށް ޖަވާބު ދިނެވެ. އިތުރު ކިތަންމެ ވާހަކައެއް ދައްކަން ބޭނުންވެފައި ހުރިނަމަވެސް، ވާހަކަ ފަށާނެ ގޮތެއް ރާދިންއަކަށް ނޭނގުނެވެ. ހިމޭންކަމުގައި އޭނާ އިންދާ މުނީރު އަތުވެއްޖެއެވެ.
"އަޅުގަނޑު ގޮސްލަނީ އިނގޭ ބައްޕާ." ރާދިން މައާލްއަށްވެސް އަވަސް ނަޒަރެއް ދިނެވެ.
"ސައި ވެސް ނުބޮއިތަ ދަނީ؟ ސައިބޮއިގެނެންނު ދާންވާނީ…" ރާދިންވެސް ދެކޮޅެއް ނުހެދިއެވެ.
"ބޮލުގަ ރިއްސުން ކިހިނެއް މިހާރު؟" މުނީރު ރާދިންއާ ސުވާލުކޮށްލިއެވެ.
"މިހާރު ރަނގަޅު" ރާދިން ޖަވާބު ދިނެވެ.
މުނީރުގެ ފަހަތުން މައާލްގެ އިތުރުން ރާދިންވެސް ހިގައިގަތެވެ. ތިން މީހުން ގޮސް މޭޒު ދޮށުގައި އިށީނެވެ. ކެއުން ފަށައިގެން ކުރިއަށް ދިޔައިރުވެސް ރާދިންއާ މައާލް އިރުއިރުކޮޅަކާ އެކަކު އަނެކަކަށް ބަލާލައެވެ. ދެމީހުންގެ ނަޒަރު ސީދާ ވާ ފަހަރަކު ވެއްޖެއްޔާ ދެމީހުންވެސް ނިކަން އަވަސް އަވަހަށް ދުރުބަލާލައެވެ. ހީވަނީ ދައްކަން ބޭނުންވާ ވާހަކަތައް ހުރިނަމަވެސް ނުބުނެވިގެން އުޅޭ ދެމީހުން ހެންނެވެ.
ސައި ބޮއިގެން މުނީރު ދިޔައީ އެލިޒެތްއާ ހަވާލުވާ މީހުންނާއެކު ބައްދަލުވުމަކަށް ދާން ޖެހިގެންނެވެ. ރާދިންއަށްވެސް އިތުރަށް މަޑުކުރާކަށް ނުކެރުނެވެ. މައާލް އޭނާގެ ގާތުގައި މަޑު ކުރާށޭ ބުނާނެނަމައޭ އެތަކެއް ފަހަރު ރާދިންގެ ހިތަށް އެރިއެވެ. ގެއިން ނުކުމެގެން ދާން ފެށުމުންވެސް މައާލް އެއްޗެއް ނުބުނުމުން އޭނާގެ ހިތަށް އުނދަގޫވިއެވެ. މައާލްގެ ހިތުގައިވާ އެއްޗެއް ދެނެގަންނަން ރާދިން ނުކުޅެދުނެވެ.
ރާދިން ދިޔަ މަންޒަރު ބަލަން ހުރުމަށްފަހު، މައާލްވެސް ގޮސް ވަނީ އޭނާ ކުރަހާ ކޮޓަރިއަށެވެ. ކެންވަސްއެއް ނަގާ އޭގައި އަނެއްކާވެސް ކުރަހަން ފެށިއެވެ.
އެ ދުވަހު މުނީރު އައިއިރުވެސް މައާލް އުޅުނީ ކުރަހާ ކޮޓަރީގައެވެ. އެމާގެ ފަރާތުން އެކަން އެނގުނު މުނީރުގެ ހިތަށް ފިނިކަމެއް ލިބުނެވެ. މައާލް ކުރީގެ ދިރިއުޅުމަށް އަލުން ރުޖޫއަ ވުމަކީ އޭނާ އެންމެ ބޭނުންވާ ގޮތެވެ. އޭނާ ކޮޓަރިއާ ހިސާބަށް ގޮސްފައި ކުޑަކޮށް ހުޅުވިފައި ހުރި ދޮރުން އެތެރެ ބަލާލިއެވެ. އޭރު މައާލް ފަރުވާތެރިވެ، އިނދެ މަސައްކަތް ކުރަމުން ދިޔައެވެ. އެތަން ބަލަން ހުރެފައި މުނީރުވެސް ދިޔައީ ކޮޓަރިއަށެވެ.
*****
ފުލުހުންގެ އިދާރާއަށް ހާޟިރުވުމަށް ފުލުހުން ރާދިންމެންނަށް އެންގީ އޭގެ ތިން ދުވަސް ފަހުންނެވެ. ސްޓޭޝަނަށް ތިން މީހުންވެސް ދިޔައީ އެކީގައެވެ. އެ ކޭސްއާ ހަވާލުވެގެން ހުރި އޮރިސަރު ނީލް އެ ތިން މީހުން ގޮވައިގެން ގޮސް ވަކިން ހުރި ކޮޓަރިއަކަށް ވަނެވެ. މީޓިން ރޫމެއް ހެން ހުރި އެ ކޮޓަރިތެރޭގައި ހުރި މޭޒު ކައިރީގައި ހަތަރު ގޮނޑި ބަހައްޓާފައި ހުއްޓެވެ.
"އިށީނދޭ…" ނީލް ގޮނޑިތަކަށް އިޝާރާތްކޮށްލިއެވެ. ޝުކުރު އަދާކޮށްފައި ތިން މީހުންވެސް އިށީނދެލިއެވެ.
"ފަށަމާ.. މިއަދު މިގެނައީ އަސްލު އަޕްޑޭޓެއް ދޭންވެގެން. ކުރިން ވެސް އަހަރެމެން ބުނިހެން ފުއާދު އަތުލައިގަތީ މަސްތުވާތަކެއްޗާއެކު ފުރަން އުޅުނު ބޯޓަކުން. ތަހުޤީޤަށް ހެންރީ ދިން ބަޔާންތަކުގެ އަލީފައި ފުއާދުގެ މައްޗަށް ވަރަށް ގިނަ ކަންތައްތަކަށް ތުހުމަތު ކުރެވޭ. ފުއާދު ޝާކިރުމެން މަރާލުމަށް ކަންތައްކުރި ގޮތުގެ ތަފްސީލް އަހަރެމެންނަށް ވަނީ ލިބިފަ. އެކަން ހިނގައިދިޔައީ ހެންރީ ރާދިންމެންނަށް ވެސް ކިޔައިދިން ގޮތަށް. އެކަމަކު ތަހުގީގުގެ ތެރެއިން އަހަރެމެންނަށް އިތުރު ކަންތައްތަކެއް ވެސް ފާހަގަ ކުރެވިއްޖެ. މިކޮޅުގައި ފުއާދުގެ ލޯބިވެރިއެއް ހުރޭ." އެ ހިސާބަށް ބުނެފައި ނީލް މަޑުޖެހިލިއެވެ. އޭނާ ވާހަކަ ދެއްކީ އިނގިރޭސިންނެވެ.
"ލޯބިވެރިއެކޭ…" މުނީރަށް ހައިރާންކަން ލިބުނެވެ. ފުއާދަކީ މީހަކާ އިނދެގެން އުޅޭ މީހެކެވެ. ވީއިރު ލަންޑަންގައި ފުއާދުގެ ލޯބިވެރިއެއް ހުންނަން ވީ ކީއްވެހެއްޔެވެ؟
"ލޯބިވެރިއެކޭ… ހީ އިޒް މެރީޑް." މުނީރު ހަމަ ރަނގަޅަށްވެސް ހައިރާންވެއްޖެއެވެ.
"ބެލި ބެލުމުން އަޅުގަނޑުމެންނަށް އެނގުނު އެއްޗެއް ތިއީ. އެކަމަކު އޭނާގެ ލޯބިވެރިއެއް މިކޮޅުގައިވެސް އެބަ ހުރި. އޭނާއަށް ކިޔަނީ ކެތްރީން. އެއްވެސް އިރެއްގައި މިނަން ތިއިން އެއްވެސް ބޭފުޅަކަށް އަޑު އިވުނުތޯ؟" ނީލް ސުވާލުކޮށްލިއެވެ.
"ނޫން…" މުނީރު ބުނެލިއެވެ. ރާދިންއާއި މައާލްވެސް ނޫނެކޭ ބުނެލިއެވެ.
"ކެތްރީންގެ އަތެއްވެސް މިކަމުގައި ވަނީތޯ؟" މުނީރަށް ސުވާލުކޮށްލެވުނެވެ.
"ޝާކިރުމެން މަރާލުމުގައި ކެތްރީންގެ އަތެއް ނުވޭ. އެކަމަކު ފުއާދުގެ ބައެއްކަންތައްތަކުގައި ކެތްރީންގެ ބައިވެރިވުން އޮވެދާނެކަމަށް އަޅުގަނޑުމެންނަށް ޝައްކުރެވޭ ސަބަބުތައް އެބަހުރި." ނީލް ބުނެލިއެވެ. އިވެމުން ދިޔަ ހަޤީގަތް ތަކުގެ ސަބަބުން މައާލްއާ ރާދިންގެ އިތުރުން މުނީރަށްވެސް ވަނީ ހައިރާންކަން ލިބިފައެވެ. ފުއާދުގެ މަކަރުވެރިކަން އެނގި ފާޅުވަމުން ދިޔައިރު، އެމީހުންނަށް ފުއާދު އެ ދައްކަމުން ދިޔައީ ކޮންފަދަ މައުސޫމްކަމެއް ބާއޭ މުނީރުގެ ހިތަށް އެރިއެވެ. ފުއާދުގެ އެ ސޫރައިގެ ފަހަތުގައި ފޮރުވިގެން ހުރީ ކޮން ފަދަ ރަހުމު ކުޑަ އިންސާނެއްހެއްޔެވެ؟
"ކެތްރީންގެ އެކައުންޓަށް ކޮންމެ މަހަކު، އެތައް ލައްކަ ފައިސާއެއް ޖަމާވޭ… އެއީ ޝާކިރުގެ ކުންފުނިން އެ އެކައުންޓަށް ޖަމާކުރާ ފައިސާއެއް. އެހެންނަމަވެސް، އެ ފައިސާ އޭނާއަށް ޖަމާކުރަން ޖެހޭ އެއްވެސް ސަބަބެއް އަޅުގަނޑުމެންނަކަށް އަދި ސާފެއް ނުވޭ. މީގެ އެއްވެސް މައުލޫމާތެއް އެނގިލައްވާތޯ؟ ޝާކިރުގެ ވިޔަފާރިތައް މިކޮޅުގައިވެސް ހުންނާތީ، ކުންފުނީގެ ހުރިހާ މުދަލަކާއި މުޅި ކުންފުނިވެސް މިހާރު ވަނީ މައާލްގެ ނަން މަތީގައިކަން ހޯދާކަށް އަޅުގަނޑުމެންނަށް މާ އުނދަގުލެއް ނުވި. މައާލް ބުނެލަދެއްވަފާނަންތޯ އެހާ ބައިވަރު ފައިސާ ކެތްރީންގެ އެކައުންޓަށް ފޮނުވަން ޖެހޭ ސަަބަބެއް." ނީލް ސުވާލުކޮށްލުމާއެކު، މައާލްއަށް ބަލައިލެވުނީ މުނީރާ ދިމާލަށެވެ. ދެން ރާދިންއަށެވެ. މިވާނުވާއެއް އެއްގޮތަކަށްވެސް އޭނާއަކަށް ނޭނގުނެވެ.
"އޯ ގޯޑް..." އިސްތަށިގަނޑުގެ ތެރެއަށް އަތް މަހާލަމުން ރާދިންއަށް ބުނެވުނެވެ. އޭނާއަށް ހުރިހާކަމެއްވެސް އެނގި ސާފުވެއްޖެއެވެ.
ޝާކިރު ދުނިޔޭގައި ހުރިއިރުވެސް، ކުންފުނީގެ ފަރާތުން އެ ފައިސާ ފުއާދަށް ޖަމާކުރަމުން ދިޔަ. މިކަމާ ބެހޭގޮތުން ކެތްރީންއާ ސުވާލުކުރުމުގެ ކަންތައްތައް ކުރިއަށް ދަނީ. އިތުރު މައުލޫމާތި ލިބޭނީ އޭރުން. އެކަމަކު އޭގެ ކުރިން ތި ތިން މީހުން ކުރެ އެއްވެސް މީހަކަށް މިކަމުގެ މައުލޫމާތެއް އެނގޭނަމަ ހިއްސާކޮށްލާ. އެ ފައިސާ ފޮނުވަނީ ކީއްވެކަމާއި އިތުރު ތަފްސީލެއް އަޅުގަނޑުމެންނަކަށް ނުލިބޭ. އެކަމަކު ލަފާ ކުރެވެނީ ބްލެކްމެއިލިން ކޭސް އެއް ގޮތުގައި. މިހުރިހާކަމެއް މިހާރު ދަނީ ވަަރަށް ސީރިއަސް މައްސަލަތަކެއްގެ ގޮތުގައި ބަލަމުން." ނީލް ބުނެލިއެވެ. ގައިގަނޑަކަށް ތިރީސް ވަރަކަށް މިނެޓަށް އެ ބައްދަލުވުން ކުރިއަށް ދިޔައެވެ.
"ފުއާދު ކޮން ކަމަކުބާ ބައްޕައަށް ބްލެކްމެއިލް ކުރާނީ.؟" މައާލްއަށް އެ ސުވާލު ކޮށްލެވުނީ ބޭރަށް ނުކުމެފައެވެ.
"އެބަ އަންނަން އިނގޭ." ނުކުންނަން ގޮސްފައި ރާދިން މުނީރަށް އަވަސް ނަޒަރެއް ދީފައި ނީލްއާ ދިމާލަށް ހިނގައިގަތެވެ. ރާދިން އެ ދާ ސަބަބު މުނީރަށް އެނގޭތީ އޭނާ އެއްޗެއް ނުބުނެއެވެ.
"މައާލް ދެން މާ ބޮޑަށް ނުވިސްނައްޗޭ. މިހާރު ފުއާދު އެހުރީ ފުލުހުންގެ ބެލުމުގެ ދަށުގަ. ދެން އިރާދުކުރެއްވިއްޔާ ހުރިހާ ކަމެއް ހާމަވާނެ. ހުރިހާ ހަޤީގަތެއްވެސް އެނގޭނެ. އަދި ފުއާދަށް ހައްޤު އަދަބުވެސް ލިބޭނެ." މުނީރަށް މައާލްގެ ނުތަނަވަސްކަން ފާހަގަވަމުން ދިޔައީތީ އޭނާ ބެލީ މައާލް ހަމައަކަށް އެޅުވޭތޯއެވެ. ފަސް އެނބުރި މައާލް ބަލައިލިއިރު، ނީލްއާއެކު ރާދިން ގޮސް ކުރިން ވަތް މީޓިން ރޫމަށް ވަންނަނީއެވެ. އެއާއެކު މައާލްއަށް ކުޑަ ހައިރާންކަމެއް ލިބުނެވެ. މުނީރާ ސުވާލުކޮށްލަން އުޅެފައިވެސް އޭނާ ފަސްޖެހުނެވެ. ރާދިންމެން އޭނާއަށް ވަރަށް ގިނަ ކަންތައްތައް ސިއްރުކުރަމުންދާކަން މައާލްއަށް އެނގެއެވެ. އެ ހުރިހާކަމެއް ރާދިންމެން އެކުރަނީ އޭނާއަށް ކުރާނެ އަސަރުތައް ވަޒަންކޮށްލެވޭތީ ކަމުގައި މައާލްގެ ހިތް ބުނި ނަމަވެސް، ކަންތައްތައް ފޮރުވާތީ އޭނާގެ ހިތުގައި މަޑު ރިހުމެއް ވެއެވެ.
"އަޅުގަނޑު އަދި އިތުރު ވާހަކަތަކެއް ބުނަން ބޭނުން." ކޮޓަރިއަށް ވަދެލާފައި ރާދިން ބުނެލިއެވެ. ނީލް ކުރިއަށް ގެންދާށޭ ބުނެލުމުން ރާދިން އޭނާގެ ވާހަކަ ފެށިއެވެ. މައާލްގެ ހަޤީގަތް ކިޔައިދީފައި އެކަމުގެ ފައިދާ ބެލެކްމެއިލް ކޮށްގެން ފުއާދު ނަގަނީކަމުގައި ރާދިން ނީލްއަށް ކިޔައިދިނެވެ. އެއަށްފަހު އޭނާ ނީލް ގާތުން މާފަށް އެދުނެވެ.
"ސޮރީ! އަސްލު މައާލްއަށް ހަޤީޤަތް އެނގެން ބޭނުން ނުވާތީ އެ ގަޑީގައި ނުބުނެވުނީ. އަޅުގަނޑުމެން ބޭނުމެއް ނުވޭ އަދި އެއްވެސް ސްޓްރެސްއެއް މައާލްއަށް ދޭކަށް." ރާދިން އޮޅުން ފިލުވައިދިނެވެ.
"ޝުކުރިއްޔާ ރާދިން… ތަހުޤީގު ވަރަށް ބާރަށް ކުރިއަށް ދާނެ ކަމުގެ ޔަޤީންކަން އަޅުގަނޑުމެން ދެން. އަދި ފުއާދަށް ހައްޤު އަދަބު ލިބޭނެކަމުގެ ފުރިހަމަ ޔަޤީންކަންވެސް ދެން. ހެންރީގެ ހެކިބަސް ބަދަލުނުވާހާ ހިނދަކު ފުއާދަށް ސަލާމަތެއް ނުވެވޭނެ. އޭނަ ހޯދަން އިއުލާނު ކުރުމުން، ފިލުމުން އެކަމަށްވެސް އޭނާއަށް ހުކުމް އަންނާނެ." ނީލް ވާހަކަ ދެއްކިއެވެ.
"ހެންރީއާ ބައްދަލުކުރެވިދާނެތަ؟" ރާދިން ނީލްއަށް ބަލާލިއެވެ.
"ހެންރީއާ ބައްދަލުކޮށްލެވިދާނެ. އެކަމަކު ތަހުގީގީ މަރުހަލާ ވީމަ މާގިނަ ވަގުތެއް ނުދެވޭނެ...... ފަސް ވަރަކަށް މިނެޓު ދެވިދާނެ." ނީލް ބުނެލިއެވެ. ރާދިން އެއްބަސްވުމުން އޭނާ، ރާދިން ގެންދިޔައީ ހެންރީއާ ބައްދަލުކުރުމަށް ވަކިން ކޮޓަރިއަކަށެވެ. ހެންރީ ބަންދުކޮށްފައި ހުރި ގޮޅިއާ ހަވާލުވެގެން ހުރި ފުލުހުންގެ އޮފިސަރަށް ގުޅުމަށްފަހު، ހެންރީ ގެނައުމަށް ނީލް އެދުނެވެ.
ކުޑަ އެ ކޮޓަރީގެ މަތީގައި ދިއްލާފައިހުރި ލައިޓުން ތަނަށް އަލިވެއެވެ. ދެ މޭޒު ދެކޮޅުގައި ހުރިއިރު، ކޮންމެ މޭޒެއްގެ ކައިރީގައި ވެސް ގޮނޑިއެއްހުއްޓެވެ. ރާދިން އެއްފަރާތު ގޮނޑީގައި އިށީނދެލިއެވެ. ހެންރީ ގެނައުމުން ނީލް އޭނާ ގެންގޮސް އަނެއް މޭޒު ދޮށުގައި ބެއިންދިއެވެ. ހެންރީގެ އަތުގައިވަނީ ބިޑި އަޅުވާފައެވެ. ލާފައިހުރީ އެތަނުގެ ކުށްވެރިންލާ މަޑު ފެހިކުލައިގެ ޔުނީ ފޯމެކެވެ. ރާދިން ފެނުމުން ހެންރީ އިސްޖަހާލިއެވެ.
"އަހަންނަށް ހެންރީއާ އެކަނި ވާހަކަ ދައްކާލެވިދާނެތަ؟" ރާދިން ނީލް ގާތުން އެދުނެވެ.
"އޯކޭ. އެކަމަކު އަހަރެމެން ތިބޭނަން މިތަން ފެންނަހެން ބޭރުގަ." ލޯގަނޑަށް އިޝާރާތްކޮށްލަމުން ނީލް ބުނެލިއެވެ. ރާދިން ބޯ ޖަހާލުމުން ހެންރީ ގޮވައިގެން އައި އޮފިސަރާއެކު ނީލް ނުކުމެލިއެވެ.
"އެލިޒެތް… އެލިޒެތް ކިހިނެއް؟" ހެންރީ ސުވާލުކޮށްލިއެވެ.
"އަހަރެން ހުރިހާކަމަކަށް އެއްބަސްވެއްޖައިން. އަހަރެންގެ އެލިޒެތް ސަލާމަތްކޮށްދީ." ރާދިން އެއްޗެއް ނުބުނުމުން އިސް އުފުލާލާފައި ހެންރީ އަނެއްކާވެސް ބުނެލިއެވެ. ހެންރީގެ މޫނުމައްޗަށް އަރާފައިބަމުންދިޔަ އަސަރުތައް ބަލަން އިނުމަށްފަހު ރާދިން ވާހަކަ ދެއްކިއެވެ.
(ނުނިމޭ)