24 Jan 2024, 06:52
މިދިޔަ އަހަރު ބޮކްސް އޮފީހުގައި އެންމެ ބޮޑު ކާމިޔާބީ ހޯދި ފިލްމުތަކުގެ ތެރޭގައި ހިމެނޭ ކްރިސްޓޯފާ ނޯލަންގެ "އޮޕެންހައިމާ" އޮސްކާ ނޯމިނޭޝަން ލިސްޓުގެ އެންމެ ކުރީގައި ހިމެނިއްޖެއެވެ.
ފިލްމީ ދުނިޔޭގައި ލިބޭ އެންމެ ޝަރަފުވެރި އެވޯޑު ކަމަށްވާ އޮސްކާގެ މިދިޔަ އަހަރުގެ ފިލްމުތަކުގެ އެންމެ މޮޅެތި ފިލްމުތައް ހޮވައި ނޯމިނޭޝަން ވަނީ ރޭގައި އިއުލާނުކޮށްފައެވެ.
ބަޔޮގްރަފީއަކަށް ބިނާކޮށް ތައްޔާރުކޮށްފައިވާ މި ޑްރާމާ ފިލްމު ވަނީ އޮސްކާގެ 13 އެވޯޑަކަށް ނޯމިނޭޓް ވެފައެވެ. ލިސްޓުގެ ދެވަނައިގައި ހިމެނެނީ އެމާ ސްޓޯން ލީޑުން ފެންނަ ފެންޓަސީ ފިލްމު "ޕުއާ ތިންގްސް"އެވެ. މި ފިލްމަށް 11 ނޯމިނޭޝަން ލިބުނު އިރު ތިންވަނައިގައި ހިމެނެނީ މާޓިން ސްކޯސޭޒީ ޑައިރެކްޓު ކުރި "ކިލާސް އޮފް ފްލާވާ މޫން" އެވެ. މި ފިލްމު ވަނީ 10 އެވޯޑަކަށް ނޯމިނޭޓް ވެފައެވެ.
މިދިޔަ އަހަރު އެންމެ ގިނަ ބަޔަކު ވާހަކަ ދެއްކި އަދި ބޮކްސް އޮފީހުގައި އެންމެ ބޮޑު ހިޓަކަށް ވި "ބާބީ" ނޮމިނޭޓް ވެފައިވަނީ އަށް އެވޯޑަކަށެވެ.
އެންމެ މޮޅު ފިލްމަށް ވާދަ ކުރާ "ޕުއާ ތިންގްސް" އިން މަންޒަރެއް --
މި ހުރިހާ ފިލްމުތަކަކީ މިދިޔަ އަހަރުގެ އެންމެ މޮޅު ފިލްމުގެ އެވޯޑަށް ވާދަ ކުރާ ފިލްމުތަކެވެ. އެ ލިސްޓުގައި ދެން ހިމެނެނީ "އެމެރިކަން ފިކްޝަން" އާއި "އެނެޓޮމީ އޮފް އަ ފޯލް" އާއި "ދަ ހޯލްޑޯވާސް"ގެ އިތުރުން "މައިސްޓްރޯ" އާއި "ޕާސްޓް ލައިވްސް” އަދި "ދަ ޒޯން އޮފް އިންޓަރެސްޓް" އެވެ.
އެންމެ މޮޅު އެކްޓަރުގެ ކެޓެގަރީގައި "ދަ ހޯލްޑޯވާސް" އިން ހިމެނިފައިވާ އެކްޓަރު ޕޯލް ޖިއަމާތީ --
އެންމެ މޮޅު އެކްޓަރުންގެ ރޯލަށް ނޯމިނޭޓް ވެފައިވަނީ
"މައިސްޓްރޯ" އިން ބްރެޑްލީ ކޫޕާ
- "ރަސްޓިން" އިން ކޯލްމިން ޑޮމިންގޯ
- "ދަ ހޯލްޑޯވާސް" އިން ޕޯލް ޖިއަމާތީ
- "އޮޕެންހައިމާ" އިން ކިލިއަން މާފީ
- "އެމެރިކަން ފިކްޝަން" އިން ޖެފްރީ ރައިޓް އެވެ.
އެންމެ މޮޅު އެކްޓްރެސްގެ ރޯލަށް، "ކިލާސް އޮފް ފްލާވާ މޫން" އިން ނޯމިނޭޓް ވެފައިވާ އެކްޓަރު ލިލީ ގްލެޑްސްޓޯން --
އެންމެ މޮޅު އެކްޓްރެސްގެ ރޯލަށް ނޯމިނޭޓް ވެފައިވަނީ
"ނައިޔެޑް" އިން އެނެޓް ބެނިން
- "ކިލާސް އޮފް ފްލާވާ މޫން" އިން ލިލީ ގްލެޑްސްޓޯން
- "އެނެޓޮމީ އޮފް ފޯލް" އިން ސެންޑްރާ ހިޔުލާ
- "މައިސްޓްރޯ" އިން ކޭރީ މަލިގަން
- "ޕުއާ ތިންގްސް" އިން އެމާ ސްޓޯން އެވެ.
މި އަހަރުގެ އޮސްކާ ދެއްކުމަށް ހަމަޖެހިފައިވަނީ މާޗު މަހުގެ 10 ވަނަ ދުވަހުގައެވެ.