23 Jan 2024, 22:19
އެންބީއޭ ބާސްކެޓް ބޯޅަ މުބާރާތުގައި ބޮސްޓަން ސެލްޓިކްސް އާއި ޑެލަސް މެވްރިކްސް ބައްދަލުކުރި މެޗު ސެލްޓިކްސް ކާމިޔާބު ކޮށްފިއެވެ.
ޑެލަސްގެ އެމެރިކަން އެއާލައިންސް ސެންޓާގައި ކުޅުނު މިމެޗު ސެލްޓިކްސްއިން ކާމިޔާބު ކޮށްފައިވަނީ 119 ޕޮއިންޓް 110 ޕޮއިންޓުންނެވެ. މިއީ މިސީޒަންގައި މޮޅު ކުޅުމެއް ދައްކަމުންދާ ސެލްޓިކްސްއިން ކާމިޔާބު ކުރި 34 ވަނަ މެޗެވެ.
ދެ ޓީމްގެ ފަރާތުން ވާދަވެރި ކުޅުމެއް ފެނުނު މިމެޗުގައި ސެލްޓިކްސްގެ ޖޭސަސް ޓެޓުމްވަނީ 39 ޕޮއިންޓް ހޯދައިދީ 11 ރީބައުންޑް ނަގައިދީ ފަސް އެސިސްޓް ކޮށްފައެވެ. އަދި މެވްރިކްސްއަށް އެންމެ ރަނގަޅު ކުޅުމެއް ދެއްކީ 33 ޕޮއިންޓް ހޯދައިދީ 18 ރީބައުންޑް ނަގައިދީ 13 އެސިސްޓް ދީ ޓްރިޕްލް ޑަބަލް ހެދި ލޫކާ ޑޮންޗިޗްއެވެ.
މިމުބާރާތުގައި މިލްވައުކީ ބަކްސް އާއި ޑެޓްރޮއިޓް ޕިސްޓަންސް ބައްދަލުކުރި މެޗު 122 ޕޮއިންޓް 113 ޕޮއިންޓުން ކާމިޔާބު ކުރީ ބަކްސްއެވެ. މިމެޗުގައި ބަކްސްގެ ޖިއާނިސް އެންޓެޓޮކޮއުމްޕޯވަނީ 31 ޕޮއިންޓް ހޯދައިދީ 17 ރީބައުންޑް ނަގައިދީ 10 އެސިސްޓް ކޮށް ޓްރިޕްލް ޑަބަލްއެއްް ހަދައިފައެވެ. އަދި ޕިސްޓަންސްއަށް އެންމެ ރަނގަޅު ކުޅުމެއް ދެއްކީ 19 ޕޮއިންޓް ހޯދައިދީ އަށް ރީބައުންޑް ނަގައިދީ ދެ އެސިސްޓް ދިން އިސާއާ ސްޓޭވާޓްއެވެ.
މީގެއިތުރުން ފިލަޑެލްފިއާ ސެވަންޓީ ސިކްސާސް އާއި ސެން އެންޓޯނިއޯ ސްޕާސް ބައްދަލުކުރި މެޗު 133 ޕޮއިންޓް 123 ޕޮއިންޓުން ކާމިޔާބު ކުރީ ސެވަންޓީ ސިކްސާސްއެވެ. މިމެޗުގައި ސިކްސާސްގެ ޖޮއެލް އެމްބިޑްވަނީ އެ ފްރެންޗައިސްގެ ޕޮއިންޓް ރިކޯޑް އާކޮށްފައެވެ. މިމެޗުގައި އެމްބިޑްވަނީ 70 ޕޮއިންޓް ހޯދައިދީ 18 ރީބައުންޑް ނަގައިދީ ފަސް އެސިސްޓް ކޮށްފައެވެ.
މީގެކުރިން އެއް މެޗެއްގައި ސިކްސާސްއަށް އެންމެ ގިނަ ޕޮއިންޓް ހޯދައިދީފައިވަނީ 1967 ވަނަ އަހަރުގެ ޑިސެމްބަރު މަހު 68 ޕޮއިންޓް ހޯދައިދިން ވިލްޓް ޗެމްބަލެއިންއެވެ. އެންބީއޭ ރިކޯޑް އޮންނަނީވެސް ޗެމްބަލެއިން އަތުގައެވެ. އެއީ 100 ޕޮއިންޓެވެ. ނަމަވެސް އޭނާ އޭރު ކުޅެމުންދިޔައީ ފިލަޑެލްފިއާ ވޮރިއާސް އަށެވެ.
އެމްބިޑްގެ 70 ޕޮއިންޓަކީ މިސީޒަންގައި މިހާތަނަށް ކުޅުންތެރިޔަކު ހޯދި އެންމެ ގިނަ ޕޮއިންޓެވެ. މިމެޗުގައި ސްޕާސްއަށް އެންމެ ގިނަ ޕޮއިންޓް ހޯދައިދިނީ 33 ޕޮއިންޓް ހޯދައިދީ 7 ރީބައުންޑް ނަގައިދީ ދެ އެސިސްޓް ދިން ވިކްޓާ ވެމްބަންޔާމާއެވެ.
މިމުބާރާތުގައި ކުޅުނު އެހެން މެޗުތަކަށް ބަލާރު ކްލީވްލަންޑް ކެވެލިއާސް އާއި އޯލާންޑޯ މެޖިކް ބައްދަލުކުރި މެޗު 126 ޕޮއިންޓް 99 ޕޮއިންޓުން ކެވެލިއާސް ކާމިޔާބު ކުރިއިރު މެމްފިސް ގްރިޒްލީސް އާއި ޓޮރޮންޓޯ ރެޕްޓާސް ބައްދަލުކުރި މެޗު 108 ޕޮއިންޓް 100 ޕޮއިންޓުން ކާމިޔާބު ކުރީ ގްރިޒްލީސްއެވެ.
ޗާލޮޓް ހޯނެޓްސް އާއި މިނެސޯޓާ ޓިމްބާވުލްވްސް ބައްދަލުކުރި މެޗު 128 ޕޮއިންޓް 125 ޕޮއިންޓުން ހޯނެޓްސް ކާމިޔާބު ކުރިއިރު ފީނިކްސް ސަންސް އާއި ޝިކާގޯ ބުލްސް ބައްދަލުކުރި މެޗު 115 ޕޮއިންޓް 113 ޕޮއިންޓުން ކާމިޔާބު ކޮށްފައިވަނީ ސަންސްއެވެ. އަދި ސެކްރެމެންޓޯ ކިންގްސް އާއި އެޓްލާންޓާ ހޯކްސް ބައްދަލުކުރި މެޗު 122 ޕޮއިންޓް 107 ޕޮއިންޓުން ކާމިޔާބު ކުރީ ކިންގްސްއެވެ.