23 Jan 2024, 17:10
ރާއްޖޭގައި ބަނދަރުކުރުމަށް އަންނަ ޗައިނާގެ ސާވޭ އުޅަނދު، ރާއްޖޭގެ ސަރަހައްދުގައި އެއްވެސް ދިރާސާއެއް ނުކުރާނެ ކަމަށް ފޮރިން މިނިސްޓްރީން މިއަދު ބުނެފިއެވެ.
އެ މިނިސްޓްރީން ނެރުނު ބަޔާނެއްގައިވާ ގޮތުން، ޝިއަން ޔަންގް ހޮންގް 3، ރާއްޖޭގައި ބަނދަރު ކުރުމުގެ ހުއްދައަށް ޗައިނާ ސަރުކާރުން ވަނީ އެދިފައެވެ. އެއީ އުޅަނދުގެ ސްޓޮކް އާ ކުރުމަށާއި މީހުން ބަދަލުކުރުމަށް ކަމަށް އެ ބަޔާނުގައިވެއެވެ.
ފޮރިން މިނިސްޓްރީން ބުނީ، ރާއްޖެއަކީ އެކުވެރި ގައުމުތަކުގެ އުޅަނދުތަކަށް މަރުހަބާ ކިޔާ ގައުމެއް ކަމަށާއި ސުލްހަވެރިކޮށް އަންނަ އަސްކަރީ އުޅަނދުތަކާއި އާންމުން ދަތުރުކުރާ އުޅަނދުތަކަށް ވެސް ބަނދަރު ކުރުމަށް ފުރުސަތު ދޭ ކަމަށެވެ.
"އެގޮތަށް އުޅަނދުތައް ބަނދަރު ކުރުމުން އެގައުމާއި ރާއްޖޭގެ ގުޅުން ބަދަހިވުމުގެ އިތުރުން، އެކުވެރި ގައުމުތަކުގެ އުޅަނދުތަކަށް ރާއްޖެއިން މަރުހަބާ ކިޔުމުގެ ޒަމާންވީ ސަގާފަތް ދައްކުވައިދޭ،" ފޮރިން މިނިސްޓްރީގެ ބަޔާނުގައިވެއެވެ.
ބޭރުގެ އުޅަނދުތައް އަންނަ ހާލަތްތަކުގެ ރާއްޖެއިން ބައިނަލްއަގުވާމީ އެންމެ މަތީ މިންގަނޑުތަކަށާއި، ކަމާ ގުޅުންހުރި ބައިނަލްއަގުވާމީ މެރިޓައިމް ގާނޫނުތަކަށް އަމަލުކުރާ ކަމަށް އެ މިނިސްޓްރީން ބުންޏެވެ.
ކަނޑުގެ އަޑީގެ ސާވޭތައް ހަދާ ޗައިނާގެ އުޅަނދެއް ރާއްޖެއަށް މިސްރާބު ޖަހާފައިވާ ކަމަށް އިންޑިއާގެ ނޫސްތަކުގައި ވަނީ ރިޕޯޓުކޮށްފައެވެ.
އެ ގައުމުގެ ނޫސްތަކުން ރިޕޯޓުކުރާ ގޮތުގައި މި އުޅަނދު ރާއްޖެ އަންނާނީ މި ފެށޭ މަހުގެ ކުރީ ކޮޅެވެ. ކަނޑު އުޅަނދުފަހަރުގެ ހަރަކާތްތައް މޮނީޓަރުކުރާ ކަނޑުމަތީގެ ޓްރެފިކް ހަރަކާތްތައް ބަލައި ސައިޓުތަކުން ވެސް ދައްކައި ގޮތުގައި މި އުޅަނދު މިސްރާބު ޖަހައިފައިވަނީ ރާއްޖެއަށެވެ.
މި އުޅަނދާ ގުޅޭ ގޮތުން އެމްއެންޑީއެފާ ސުވާލު ކުރި ނަމަވެސް މިހާތަނަށް ޖަވާބެއް ދީފައެއް ނުވެއެވެ.
ޗައިނާގެ ރިސާޗް އުޅަނދުތައް އިންޑިއާ ކަނޑުގެ ސަރަހައްދަށް ވަނުމާ އެންމެ ދެކޮޅު، އެންމެ ކަންބޮޑުވާ އެއް ގައުމަކީ އިންޑިއާއެވެ. މިއީ އަސްކަރީ ކަމަކަށް ބޭނުންކުރާ އުޅަނދުތަކެއް ނޫން ނަމަވެސް އެ ގައުމުން ތުހުމަތުކުރާ ގޮތުގައި މި ރިސާޗްތަކުގައި އެއްކުރާ މައުލޫމާތު ބޭނުންކުރަނީ އަސްކަރީ ބޭނުންތަކަށެވެ.
މީގެ ކުރިން މި އުޅަނދު ލަންކާއަށް އެތެރެވެ، އެ ގައުމުގައި 'ޑީޕް ވޯޓާ އެކްސްޕްލޮރޭޝަން' ރިސާޗް މަސައްކަތެއް ކުރަން އުޅުނެވެ. ނަމަވެސް އިންޑިއާއިން ފާޅުކުރި ކަންބޮޑުވުންތަކާ އެކު ލަންކާއިން ވަނީ އެއް އަހަރު ދުވަހުގެ މުއްދަތަކަށް ބޭރު އެއްވެސް ގައުމެއްގެ ސާވޭ އުޅަނދެއް އެ ގައުމުގެ ކަނޑުގެ ސަރަހައްދަށް އެތެެރެވުން މަނާކޮށްފައެވެ.
މި ފަދަ އުޅަނދެއް ރާއްޖެ އަންނަކަމުގެ ރިޕޯޓުތައް ފެތުރެން ފަށައިފައިވާއިރު، ރައީސް ޑރ. މުޙައްމަދު މުއިއްޒުގެ އާ ސަރުކާރުންވަނީ އިންޑިއާގެ އަސްކަރީ އުޅަނދުތައް ބޭނުންކޮށްގެން، ރާއްޖޭގެ ކަނޑުގެ ހައިޑްރޮގްރަފީ ސާވޭ ހެދުމުގެ ކަންކަން ކުރިއަށް ގެންދަން ބޭނުންނުވާކަން ހާމަކުރައްވައި، އެ އެއްބަސްވުން އުވައިލަން ނޯޓިސް ވެސް ދީފައެވެ.