23 Jan 2024, 14:19
އަދިވެސް، ކުރިއަށް އޮތް ރައްޔިތުންގެ މަޖިލީހުގެ އިންތިޚާބު ރޯދަމަހާ ބައްދަލުނުވާހެން ބޭއްވޭނެ ގޮތަކަށް ތާރީޚުތައް ބަދަލުކުރުމުގެ ފުރުސަތު އެބަ އޮތްކަމަށް ޕީޕީއެމްގެ ނައިބު ރައީސް، މިނިސްޓަރު އަހްމަދު ޝިޔާމް މިއަދު ވިދާޅުވެއްޖެއެވެ.
އިލެކްޝަންސް ކޮމިޝަނުން މިހާރު ތައްޔާރުވަމުން އަންނަނީ މާޗު 17ގައި މަޖިލިސް އިންތިޚާބު ބާއްވާށެވެ.
އެ އިންތިޚާބާ ދިމާކޮށް އީސީއިން އެކުލަވައިލި ގައުމީ ލަފާދޭ ކޮމިޓީން މިއަދު ބޭއްވި ބައްދަލުވުމުގައި ޝިޔާމް ވިދާޅުވީ، ސިޔާސީ އެއްވެސް ޕާޓީއަކުން މާޗު 17ވަނަ ދުވަހު މަޖިލިސް އިންތިޚާބު ބާއްވަން އެއްބަސްނުވާ ކަމަށެވެ.
އަދި މިހާރު ވެސް އެ ތާރީޚު ބަދަލުކުރުމުގެ ފުރުސަތު އެބައޮތްކަމަށް ފާހަގަކުރެއްވިއެވެ.
"އެ ދުވަސް ބަދަލުކުރެވޭނެ ޖާގަ ވެސް އަދިވެސް އެބައޮތް، އަދިވެސް އެބައޮތް. އެއީ ހަމަ ރައްޔިތުންގެ މަޖިލީހުން އެ ކަން ކުރެވޭނެ. ޚާއްސަ ޖަލްސާތަކާ އެއްޗެހި ދައުރުން ބޭރުން ބާއްވައިގެން ކުރާ ކަންކަން އެބަކުރެވޭ،" ޝިޔާމް ވިދާޅުވިއެވެ.
އޭނާ ވިދާޅުވީ ރައްޔިތުންގެ ކަންބޮޑުވުން މި ކަމުގައި އޮތުމާއެކު ދައުރުން ބޭރުން ޖަލްސާއެއް ބާއްވައިގެން ނަމަވެސް ގާނޫނަށް އިސްލާހު ގެނެސް ތާރީޚު ބަދަލުކުރެވޭނެ ގޮތެއް ހޯދުން މުހިންމު ކަމަކަށެވެ.
ރައްޔިތުންނަށް ފަސޭހަވާނެހެން އިންތިޒާމުތައް ހަަމަޖެއްސުމަކީ ޕީޕީއެމުން ތާއީދުކުރާނެ ކަމެއްކަަމަށް ވެސް އޭނާ ވިދާޅުވިއެވެ.
"އަޅުގަނޑުމެން ވެސް ބޭނުމެއް ނުވޭ ރަމަޟާން މަހުގެ ތެރެއަށް އިންތިޚާބު ވަންނާކަށް. ވަކިން ޚާއްސަކޮށް ވޯޓުލާ ދުވަސް،" ޝިޔާމް ވިދާޅުވިއެވެ.
ޝިޔާމް ވިދާޅުވީ ރޯދަ މަސް ގާތްވަމުން އަންނަ ވަރަކަށް ދިވެހީން ސިޔާސީ ހަރަކާތްތަކުގައި ހޭދަކުރާ ވަގުތާއި މިންވަރު މަދުވާކަމަށެވެ. އަދި ގިނަ ވަގުތު ހޭދަކުރާނީ ރޯދަ މަހަށް ތައްޔާރުވުމަށް ކަމަށް ވެސް ވިދާޅުވިއެވެ.
އެހެންކަމުން ރޯދަ މަހާ ދިމާކޮށް އިންތިޚާބެއް ބޭއްވުމަކީ ސިޔާސީ ގޮތުން އެކަށީގެންވާ މަސައްކަތެއް ކުރެވި ރަނގަޅު ނަތީޖާއެއް ނިކުމެދާނެކަމެއްތޯ ސުވާލު އުފައްދަންޖެހޭކަމަށް ވެސް ޝިޔާމް ވިދާޅުވިއެވެ.
"އަޅުގަނޑަށް ހީވަނީ ދިވެހިރާއްޖޭގައި ސިޔާސީ މަސައްކަތެއް ކޮށްގެން އިންތިޚާބުތަކާ ކުރިމަތިލާއިރު މިއީ އަޅުގަނޑުމެން ވިސްނައިލަން ޖެހޭކަމެއް،" އޭނާ ފާހަގަކުރެއްވިއެވެ.
މީގެ ކުރިން އެ ކޮމިޝަންގެ ރައީސް ފުއާދު ތައުފީގު ވިދާޅުވީ ރައްޔިތުންގެ މަޖިލީހުގެ އިންތިޚާބު ރޯދަމަހުގެ ތެރޭ ބާއްވަން މަޖުބޫރުވީ ގާނޫނަށް އިސްލާހު ގެނެވިފައި ނުވުމުންކަމަށެވެ.
ފުއާދު ވިދާޅުވީ، ގަނޫނަށް ބަދަލު ގެނައުމަކީ މަޖިލީހުގެ މެންބަރުން ގަބޫލުކުރައްވާ ކަމެއް ނޫން ކަމަށެވެ.
އެގޮތުން 120 ދުވަސްވީމަ އިއުލާނުކުރުން 140 ދުވަހަށް ބަދަލުކޮށް، 20 ދުވަސް ކުރިން އިންތިޚާބު އިއުލާނުކުރާ ގޮތަށް ގާނޫނު އިސްލާހުކުރެވިއްޖެނަމަ ރަމަޟާން މަހުގެ ކުރިން އިންތިޚާބު ބޭއްވޭނެ ކަމަށް ފުއާދު ވިދާޅުވިއެވެ