23 Jan 2024, 13:42
އަންނަ މާޗު މަހުގެ 11ވަނަ ދުވަހު ބާއްވާ 20ވަނަ ރައްޔިތުންގެ މަޖިލީހުގެ އިންތިޚާބުގައި، މިދިޔަ ރިޔާސީ އިންތިޚާބާ ޚިލާފަށް، ބާތިލު ވޯޓު އިތުރުނުވާނެކަމަށް އިލެކްޝަންސް ކޮމިޝަން (އީސީ)ގެ ނައިބު ރައީސް އިސްމާއީލް ހަބީބް މިއަދު ވިދާޅުވެއްޖެއެވެ.
މަޖިލިސް އިންތިޚާބާ ގުޅޭގޮތުން އިލެކްޝަންސް ކޮމިޝަނުން ކުރަމުން ގެންދާ މަސައްކަތްތައް އިންތިޚާބުގެ ގައުމީ ލަފާދޭ ކޮމިޓީއާ ހިއްސާކުރުމަށް މިއަދު ބޭއްވި ބައްދަލުވުމުގައި ވާހަކަދައްކަވަމުން ހަބީބު ވިދާޅުވީ، މީހެއްގެ ނިޔަތް ދެނެގަނެވޭނެ ގޮތަށް އޮންނަ ސައްހަ ވޯޓުތައް، ސައްހަ ވޯޓުގެ ގޮތުގައި ބަލައިގަންނާނެ ކަމަށާއި، ގާނޫނުގައި އޮތް މަގްސަދަކީ ވެސް އެއީ ކަމަށެވެ.
އެގޮތުން، ފަހުން ބޭއްވި އިންތިޚާބުތަކުގައި ބާތިލު ވޯޓު އިތުރުވީ 2018ވަނަ އަހަރު އިންތިޚާބުތަކާ ބެހޭ އާއްމު ގާނޫނަށް ގެނައި ބަދަލުގައި ވޯޓު ކަރުދާހުގައި ރަނގަޅު ފާހަގައިގެ އިތުރުން، އެހެން ފާހަގައެއް، ނިޝާނެއް، ކުރެހުމެއް ނުވަތަ ލިޔުމެއް އޮވެއްޖެނަމަ، އެ ވޯޓު ބާތިލުވާނެކަމަށް ކަނޑައަޅައިފައި އޮތުން މާ ހަރުކަށިކޮށް ނެގުމުންކަމަށް ހަބީބް ވިދާޅުވިއެވެ.
ކޮމިޝަނުގެ ދިރާސާއިން ފާހަގަވީ، އެ އިބާރާތް ތަންކޮޅެއް ހަރުކަށިކޮށް ގެންދެވިއްޖެކަމަށާއި ވަރަށް ބޮޑަށް ފަވައިލައިފައި ހުންނަ ފާހަގަތައް ވެސް ވޯޓުގެ ސިއްރުކަން ގެއްލިދާނެކަމަށް ކަނޑައަޅައި ބާތިލުކުރެވުނުކަން ކަމަށް އޭނާ ވިދާޅުވިއެވެ.
"ކޮމިޝަނުގެ ދިރާސާގެ އަަލީގައި ކޮމިޝަނަށް ވެސް ފެނުނީ އެހެން ހުރި ބައެއް ކަންކަން އެބަޖެހޭ އިސްލާކުރަން. އެހެންވީމާ، އިރާދަކުރެއްވިއްޔާ މި އިންތިޚާބުގައި ބާތިލު ވޯޓުގެ އަދަދު އެހާ ބޮޑުތަން އިތުރެއް ނުވާނެ،" ހަބީބު ވިދާޅުވިއެވެ.
ނިމިދިޔަ ރިޔާސީ އިންތިޚާބުގައި ދެބުރު އެއްކޮށް، 12،723 ވޯޓު ބާތިލުވެފައި ވެއެވެ.
މި ބައްދަލުމުގައި އިތުރަށް ކުރެވުނު މަޝްވަރާގެ ތެރޭގައި، އިންތިހާބުގެ ވޯޓުލުން އެ ދުވަހުގެ ހެނދުނު 09:00 އިން ހަވީރު 17:00 އަށް ކުރިއަށް ގެންދިއުމަށް ކޮމިޓީން ވަނީ ލަފާދީފައެވެ.
އެއީ، އިންތިޚާބު އޮންނަނީ ރޯދަ މަހުގެ ތެރޭގައި ކަމަށްވުމާއެކު، އެހެން މަސްތަކާ އާންމު ދިރިއުޅުމުގެ ވަގުތުތައް ތަފާތުވާނެތީ ކަމަށް ބުނެއެވެ.
އަދި، އިންތިޚާބުގެ އޮފިޝަލުންނަށާއި ހަރަކާތްތެރިވާ އެންމެހާ ފަރާތްތަކަށް ރޯދަ ވީއްލުމަށް ވަގުތު ދިނުމުގެ ގޮތުން، ވޯޓުލުން ބަންދުވާ ގަޑި އިތުރަށް ފަސްނުކުރުމަށް ވެސް ވަނީ ހުށަހަޅައިފައެވެ.
މަޖިލިސް އިންތިޚާބުގައި ވޯޓުލުމުގެ ހައްގު ލިބިފައިވަނީ 284،327 މީހުންނަށެވެ. ވޯޓު ދިނުމުގެ ހައްގު ލިބިފައިވާ މީހުންގެ ލިސްޓަށް، ޖުމުލަ 746 ޝަކުވާ ލިބިފައިވާ ކަމަށް އިލެކްޝަންސް ކޮމިޝަނުން މީގެ ކުރިން ވަނީ ބުނެފައެވެ.