23 Jan 2024, 13:56
ރާއްޖޭގެ ފަތުރުވެރިކަމުގެ މާކެޓުގައި އިންޑިއާ ފަހަތަށް ޖައްސައިލުމަށް ފަހު، ހަތަރުވަނަ މާކެޓަކަށް ޗައިނާ ވެފައިވާ ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.
ޓޫރިޒަމް މިނިސްޓްރީން އިއްޔެ ނެރުނު ތަފާސްހިސާބުތަކުން ދައްކާ ގޮތުގައި ޗައިނާ، ރާއްޖޭގެ މާކެޓުގެ ހަތަރުވަނައަށް އަރައި އިންޑިއާ މިހާރު އޮތީ ފަސްވަނައިގައެވެ.
އާދިއްތަ ދުވަހާ ހަމައަށް ރާއްޖެއަށް 128،548 ފަތުރުވެރިން ވަނީ ޒިޔާރަތްކޮށްފައެވެ.
ޓޫރިޒަމް މިނިސްޓްރީން ބުނީ އާދިއްތަ ދުވަހާ ހަމައަށް ޗައިނާއިން 10،113 ފަތުރުވެރިން އައިސްފައިވާއިރު އިންޑިއާއިން ރާއްޖެ އައިސްފައިވަނީ 9،744 ފަތުރުވެރިން ކަމަށެވެ.
މީގެ ކުރިން މި މަހުގެ 17 ވަނަ ދުވަހު އެ މިނިސްޓްރީން ނެރުނު ތަފާސްހިސާބުތަކުން ދައްކާގޮތުގައި ރާއްޖޭގެ މާކެޓުގައި ޗައިނާ އޮތީ އިންޑިއާއަށް ވުރެ ދެ ރޭންކު ދަށުގައެވެ. އޭރު އިންޑިއާ އެއްވަނައިގައި އޮތްއިރު ޗައިނާ އޮތީ ތިން ވަނައިގައެވެ.
އިއްޔެ ނެރުނު ތަފާސްހިސާބުތަކުގައި މިހާރު އެއްވަނައިގައި އޮތީ އިނގިރޭސިވިލާތެވެ. އަދި, ދެވަނައިގައި ރަޝިއާ އޮތްއިރު ތިންވަނައިގައި އޮތީ ޖަރުމަނެވެ.
މި ފަހުން ރައީސް ޑރ. މުހައްމަދު މުއިއްޒު ޗައިނާއަށް ކުރެއްވި ފުރަމާނަ ދަތުރުފުޅުގައި ޗައިނާގެ އެކި ސަރަހައްދުތަކުން ރާއްޖެއަށް ސީދާ ދަތުރުކުރާ ފްލައިޓުތަކުގެ އަދަދު އިތުރުކުރުމަށް ވެސް ވަނީ މަޝްވަރާކޮށްފައެވެ. އަދި، މި ދަތުރުފުޅުގައި އެ މަނިކުފާނު ވަނީ، ޗައިނާއަކީ ރާއްޖެއަށް އެންމެ ގިނައިން ފަތުރުވެރިން އަންނަ އެއްވަނަ ގައުމަށް ހަދައިދިނުމަށް އެދިވަޑައިގެންފައެވެ.
މީގެ ކުރިން އެމްއެމްޕީއާރްސީގެ މެނޭޖިން ޑިރެކްޓަރު ފާތިމަތު ތައުފީގު ވަނީ ޗައިނާއާ އެކު މި ސަރުކާރުން ހެދި އާ އެއްބަސްވުންތަކާ އެކު ކޮވިޑް-19 ބަލިމަޑުކަމުގެ ކުރިން ޗައިނާ މާކެޓު އޮތް ހިސާބަށް މި އަހަރު އަރާނެ ކަމަށް ލަފާކުރެވޭ ކަމަށް ވިދާޅުވެފައެވެ.