23 Jan 2024, 11:04
ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ)ގެ 600 އަށްވުރެ ގިނަ މުވައްޒަފުން، މާލެ ސިޓީ ކައުންސިލަށް ބަދަލުކުރަން ނިންމާފައިވާކަމަށް އެ ކައުންސިލުން މިއަދު ބުނެފިއެވެ.
މާލެ ސިޓީ ކައުންސިލުގެ މީޑިއާ އޮފިޝަލް އާމިނަތު ޝަތުފާ މިއަދު "ސަން"އަށް ވިދާޅުވީ، މިއީ ހުޅުމާލޭގެ މުނިސިޕަލް މަސައްކަތްތައް މާލެ ސިޓީ ކައުންސިލަށް ބަދަލުވުމާ ގުޅިގެން އަންނަ ބަދަލުތަކެއް ކަމަށެވެ.
އެގޮތުން ކައުންސިލަށް ބަދަލުކުރާނީ އެޗްޑީސީގެ މުނިސިޕަލް މަސައްކަތްތައް ކުރާ މުވައްޒަފުން ކަމަށާއި، މިހާރު ހިއުމަން ރިސޯސަސް ޑިޕާޓްމަންޓުން އެ މަސައްކަތްކުރަން ފަށާފައިފައިވާ ކަމަށް ޝަތުފާ ވިދާޅުވިއެވެ.
އެޗްޑީސީން ކައުންސިލަށް ބަދަލުކުރާ މުވައްޒަފުންގެ ސީދާ އަދަދު އަދި ނޭނގުނު ނަމަވެސް، އެ އަދަދު 600 އަށްވުރެ ގިނަވާނެ ކަމަށް އޭނާ މައުލޫމާތު ދެއްވިއެވެ.
މާލެ ސިޓީގެ މުނިސިޕަލް ހުރިހާ ޚިދުމަތްތަކެއް، މާލެ ސިޓީ ކައުންސިލަށް ބަދަލުކުރެއްވުމަކީ ރައީސް ޑރ. މުހައްމަދު މުއިއްޒު ރިޔާސީ އިންތިޚާބުގެ ތެރޭ ވެވަޑައިގެންނެވި ރިޔާސީ ވައުދުފުޅެކެވެ.
އަދި، މުނިސިޕަލް ޚިދުމަތްތައް މާލޭ ސިޓީ ކައުންސިލުގެ ދަށަށް ބަދަލުކުރި ނަމަވެސް އެ ޚިދުމަތާ އެކު ސިޓީ ކައުންސިލަށް ބަދަލުކުރާ އެއްވެސް މުވައްޒަފެއްގެ މުސާރައާއި އިނާޔަތްތައް ކުޑަނުވާނެކަމުގެ ޔަޤީންކަން ރައީސް ވަނީ ދެއްވާފައެވެ.
އެޗްޑީސީން ފޯރުކޮށްދޭ ރަށްވެެހިކަމުގެ ޚިދުމަތްތައް މާލެ ސިޓީ ކައުންސިލްގެ ދަށަށް ބަދަލުކުރުމަށް ފިނޭންސް މިނިސްޓްރީއާ އެޗްޑީސީއާ މާލެ ސިޓީ ކައުންސިލާއި ދެމެދު އެމްއޯޔޫއެއްގައި ސޮއިކުރީ މި މަހު ހަތަރެއްގައެވެ.
މި އެމްއޯޔޫގެ ދަށުން އިދާރީ ދާއިރާތައް ލާމާރުކަޒީ އުސޫލުން ހިންގުމުގެ ގާނޫނޫގެ ތެރެއިން އެޗްޑީސީން ހުޅުމާލޭގައި ދެމުން އަންނަ ރަށްވެހިކަމުގެ ޚިދުމަތްތައް އެއް މަސް ދުވަސް ތެރޭ ހުއްޓައިލަން ޖެހެއެވެ.