23 Jan 2024, 11:12
ދިވެހިރާއްޖޭގެ ގައުމީ ޔުނިވާސިޓީގެ ތިން ފެކަލްޓީއެއްގެ ޑީނުން، މަގާމަށް ހަވާލުވެ ހުވައިކުރައްވައިފިއެވެ.
ގައުމީ ޔުނިވާސިޓީގައި މިއަދު ހެނދުނު ބޭއްވި ރަސްމިއްޔާތެއްގައި، ޑީނުން އައްޔަންކޮށްފައިވަނީ ސުކޫލް އޮފް މެޑިސިނާއި، ފެކަލްޓީ އޮފް އެޑިއުކޭޝަނާއި، ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީސަށެވެ.
ވައިސް ޗާންސެލާ ވާހަކަ ދައްކަވަނީ---ފޮޓޯ/ ސަން ނަދީމް
ސުކޫލް އޮފް މެޑިސިންގެ ޑީނަކަށް އައްޔަންކޮށްފައިވަނީ ޑރ. ޝީޒާ އަލީއެވެ. ފެކަލްޓީ އޮފް އެޑިއުކޭޝަންގެ ޑީންގެ މަގާމަށް އައްޔަންކުރީ ނާދިޔާ އަހްމަދެވެ. ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީސްގެ ޑީންކަމުގެ މަގާމަށް އައްޔަންކުރީ ޒީނަތު ޞާލިހެވެ.
ސުކޫލް އޮފް މެޑިސިންގެ ޑީންކަމުގެ ގެ މަގާމަށް ހޮވެފައިވައިވާ ޑރ. ޝީޒާއަކީ 1995 އިން ފެށިގެން ސަރުކާރަށް ޚިދުމަތް ކޮށްދެއްވަމުން ގެންދަވައި، ރާއްޖޭގެ ސިއްޙީ ހިދުމަތް ފުޅާކޮށް ކުރިއެރުމަށް ގިނަ މަސައްކަތްތަކެއް ކޮށްދީފައިވާ ބޭފުޅެކެވެ. ޝީޒާއަކީ ރާއްޖޭގައި ގާއިމު ކުރެވުނު ފުރަތަމަ މެޑިކަލް ސުކޫލުގެ ޑީންކަމުގެ މަގާމު އަދައިކޮށްފައިވާ ބޭފުޅެކެވެ.
ފެކަލްޓީ އޮފް އެޑިއުކޭޝަންގެ ޑީންގެ މަގާމަށް ހޮވައިފަައިވާ ނާދިޔާ އަހްމަދަކީ ޔުނިވާސިޓީގައި ފުރަތަމަ ފަހަރަށް ސެންޓްރަލްކޮށް ބޭއްވުނު އެގްޒަމިނޭޝަންގައި އެގްޒަމިނޭޝަންސް ކޮންޓްރޯލާގެ މަގާމު ވަގުތީ ގޮތުން އަދައިކޮށްފައިވާ ބޭފުޅެކެވެ.
އަދި ޑީން އޮފް ސުޓޫޑެންޓްގެ މަގާމުގައި ވެސް ނާދިޔާ ވަނީ އަގުހުރި މަސައްކަތްތަކެއް ކޮށްދެއްވައިފައެވެ. ހަމައެއާއެކު ނާދިޔާ ވަނީ ސެންޓާ ފޯ ފައުންޑޭޝަން ސްޓަޑީސްގެ ލެކްޗަރާ އަދި ސީނިއާ ލެކްޗަރާގެ މަގާމު އަދައިކޮށްފައެވެ.
ފެކަލްޓީ އޮފް ހޮސްޕިޓާލިޓީ އެންޑް ޓޫރިސަމް ސްޓަޑީސްގެ ޑީން ކަމުގެ މަގާމަށް ހޮވެފައިވާ އަލްފާޞިލާ ޒީނަތު ޞާލިހްއަކީ އެފްއެޗްޓީއެސްގެ ގިނަ މަގާމުތަކެއް އަދާ ކޮށްފައިވާ ތަޖުރިބާ ހުރި ބޭފުޅެކެވެ. ޒީނަތު ވަނީ އެފްއެޗްޓީއެސްގެ ޑީންކަމުގެ މަގާމު އަދައިކުރައްވައިފައެވެ. މިއީ އޭނާގެ ޑީން ކަމުގެ ދެވަނަ ދައުރެވެ.
މި ރަސްމިއްޔާތުގައި މަގާމަށް ހުވާކުރެއްވި ތިން ބޭފުޅުން ވެސް ވަނީ ވާހަކަދައްކަވައިފައެވެ.