23 Jan 2024, 10:33
އަކްރަމްގެ ކައިރީގައި ހުރުމަށްވުރެ ނުދަންނަ މީހަކާއިއެކު އުޅެންވެސް އެވަގުތު ލިޝާއަށް މާ ރައްކާތެރިއެވެ. އަނެއްކޮޅުން ފުލުހަށް ގޮސްގެން މައްސަލަ އިތުރަށް ގޯސްވާކަށް ލިޝާ ބޭނުމެއް ނުވެއެވެ. އެފަދަ ކަމެއް ހިނގައިގެން އުޅޭކަން އޭނާގެ މަންމަމެންނަށް އެނގިއްޖެނަމަ، ހިތް ހުއްޓިގެން މަރުވެސް ވެދާނެއެވެ. ލިޝާ ބޭނުންވީ އަކްރަމް ހަމަޖެހުމުން، ރީތިކޮށް ވާހަކަ ދައްކައިގެން މައްސަލަ ހައްލުކޮށް، އެނބުރި ގައުމަށް ދާށެވެ. އެކަމަކު، އަކްރަމަކީ ވާހަކަދެއްކޭ ފެންވަރުގެ މީހެއް ހެއްޔެވެ؟ މަސްތުވެގެން ހުރި އަކްރަމްގެ ނުބައިކަން ހައްދުފަހަނަ އަޅައިގެން ދާނޭ ކަމަށް ލިޝާ ހީވެސް ނުކުރެއެވެ. އިތުރު މީހަކާއިއެކު ލިޝާގެ އިއްފަތްތެރިކަން ފޭރިގަންނަން މަސައްކަތް ކުރިއިރު، އިސްލާމްދީނުގެ ރިވެތި އަދަބުތަކުގެ މަތީންވެސް އޭނާ ހަނދާނެއް ނެތެވެ. ލިޝާ އާރިޒްގެ ފައިން ފެށިގެން މޫނަށް ނަޒަރު ހިންގައިލިއެވެ. އާދައިގެ ޓީޝާޓަކާއި ސޯޓެއްގައި ހުރިއިރު، އާރިޒް އަރާފައި ހުރީވެސް އާދައިގެ ފައިވާނަކަށެވެ. ދިގުކޮށްފައިވާ ތުނބުޅިއާއި، ލައިގެން ހުރި ހެދުމުން އާރިޒް ވައްތަރީ ވަރަށް ފަގީރު ދިރިއުޅުމެއް އުޅެމުން އަންނަ މީހަކާއެވެ. އަމިއްލަ ނަފުސަށް މާބޮޑަށް އަޅާލާ މީހެއް ވައްތަރު ނުޖަހައެވެ. ލިޝާގެ ހިތުގައި އުފެދުނު ހަމްދަރުދީ އެހެން ހުރިހާ ކަމެއްގެ މައްޗަށް ބާރުފޯރުވިއެވެ.
********
ސްޓްރޯކެއް ޖެހިގެން މަދީހާ މާލެ ގެންދިޔަ ހަބަރު އޮތީ ސިއްރުކޮށްފައެވެ. އެކުވެރިޔާއަށް އެވަރުގެ ބޮޑު ކަމެއް ސިއްރުކޮށްގެން ހުންނަން ސުމާއަށް އުނދަގޫވިއެވެ. އެތައް ފަހަރަކު ލިޝާއަށް ގުޅިއެވެ. ފޯނު ކަނޑާލުމަށްފަހު ލިޝާ ކުރަނީ މެސެޖެވެ. އެއީ ދުވަހަކުވެސް ލިޝާ ކަންތައް ކުރިގޮތެއް ނޫނެވެ. ހަގީގަތަކީ ލިޝާގެ ފޯނުން މެސެޖުކުރީ އެހެން މީހެއް ކަމެވެ. ލިޝާގެ ޕާސްޕޯޓާއި މުހިއްމު ހުރިހާ އެއްޗެއް ހުރީ އެމީހެއްގެ ބެލުމުގެދަށުގައެވެ. ބޭނުންވި ހުރިހާ މެސެޖެއްކޮށްފައި އެމީހަކު ފޯނު ނިއްވައިލިއެވެ.
"ނައީމު... އަހަންނަށް ހީވަނީ ލިޝާއަށް ކަމެއް ވީހެން..." ކުޑަކޮށް ހަމަޖެހި، ވާހަކަ ދެއްކެން ފެށުމުން މަދީހާ ފެށީ ލިޝާގެ ވާހަކައެވެ.
"ތިހާވަރަށް ނުވިސްނަބަލަ... ސުމާ ދެންމެވެސް އެއައީ އެމަންޖެއަށް ގުޅާފައޭ... ދޯ ސުމާ؟..." ނައީމު އޭނާގެ ކައިރީގައި ހުރި ސުމާއަށް ބަލައިލަމުން ބުންޏެވެ. މަދީހާއަށް ނުފެންނާނޭހެން ސުމާއަށް އިޝާރާތެއް ކުރިއެވެ.
މަދީހާމެންނާއިއެކު ސުމާ މާލެ ދިޔައީ، ނައީމުގެ އެދުމުގެ މަތިންނެވެ. ލިޝާވެސް ނެތުމާއިއެކު، އެހީތެރިވާން ކައިރީގައި ހުންނާނެ އިތުރު މީހަކު ނެތުމުންނެވެ.
"އާނ ދައްތާ... އެހާވަރަށް ނުވިސްނާ... ލިޝް ވަރަށް އަވަހަށް ދައްތައަށްވެސް ގުޅާނެ... އަދި އެ އުޅެނީ އެކޮޅަށް ގޮސް ހަމަޖެހިނުލެވިގެން... އަހަރެން ގުޅީމަވެސް ބުނީ އެހެން..." ލިޝާއާއި ވާހަކަ ދެއްކިއްޖެކަމަށް ބުނެ، ސުމާ ހެދީ ދޮގެކެވެ.
ސުމާގެ ފޯނު ރިންގްވާން ފެށިއެވެ. މަދީހާ ހީކުރީ ލިޝާ ކަމަށެވެ. ވަގުތުން ފޯނު ދޭން އެދުނެވެ. އެހެން މީހެއް ކަމަށް ބުނެ، ލިޝާ ވޯޑުން ބޭރަށް ނުކުތެވެ.
"ކީކޭ ޝަފް؟..." ޝަފާޒް ގުޅީ ކީއްވެކަން އެނގޭ ހާލުގައިވެސް ސުމާ ސުވާލުކުރިއެވެ.
"މަދީހައްތަ ކިހިނެއްތޯ ބަލާލަންވެގެން..." ޝަފާޒް އަހައިލިއެވެ.
"މިހާރު ވަރަށް ރަނގަޅު... ވާހަކަދައްކާ... އަތްފައިވެސް މޫވް ކުރެވޭ... ހީވަނީ ދެތިން ދުވަހެއް ތެރޭ ދޫކޮށްލާނެހެން..." ސުމާ ތަފްސީލް ދިނެވެ.
"ލިޝްގެ ކަންތަކާ ދައްތަ މާ ބޮޑަށް ވިސްނަނީބާ؟..." ޝަފާޒް އަހައިލިއެވެ.
"ވެދާނެ ތިހެންކަމަށް..." ސުމާއަށްވެސް ވިސްނުނީ ޝަފާޒަށް ވިސްނުނު ފަދައިންނެވެ. "ހުރިހާ ކަމެއް އެހާ ކުއްލިއަކަށް ނިމުނީ... ކައިވެނިވެސް، މާލެދިޔުން، ދެން އަނެއްކާ އިންޑިޔާއަށްވެސް އެދިޔައީ އެސްފިޔަ ޖަހާލާހާ މަދު ވަގުތުކޮޅެއްގެ ތެރޭގަ..."
"ލިޝްގެ ހަބަރެއްވިތަ؟..." ޝަފާޒް ވަރަށް ނޫންކަމަށް ހަދާފައި ސުވާލުކުރިއެވެ.
"މަދީހައްތައޭ ކިޔާފަ އެވަރަކުން ލިޝްގެ ހަބަރުކޮޅެއް ބަލާނުލެވިގެންދޯ ތި ގުޅީ؟..." ސުމާ ޖަހައިލީ ލުއި ހިނިގަނޑެކެވެ. ޝަފާޒްގެ ހިތުގެ ހާލު އެނގޭ ހާލުގައިވެސް ދިމާކޮށްނުލާ ސުމާ ހިތްހަމައެއް ނުޖެހުނެވެ.
"ލިޝް އަހަރެންމަތިން ހަނދާން ނައްތާލިޔަސް އަހަންނަކަށް ފަސޭހައެއް ނޫނޭ އެކަން ކުރާކަށް..." ޝަފާޒްގެ ރާގު ބަދަލުވިއެވެ. އެ އަޑުގައިވި ހިތާމަ ސިއްރެއް ނުވެއެވެ. ސުމާއަށް އަމިއްލަ ނަފުސު ކުށްވެރިކުރެވުނެވެ.
"ވަރަށް އެހެން ކަހަލަ ވާހަކައެއް ބުނަންތަ؟..." ސުމާ ހުރީ ދެފިކުރެއްގައެވެ. ޝަފާޒްގެ ކައިރީގައި ބުނެވޭ ވާހަކައަކުން ކަންތައް ވެދާނެގޮތެއް ނޭނގޭތީއެވެ. ލިޝާގެ ކަމެއްގައި ޝަފާޒް ކަންތައް ބޮޑުވާނެވަރު އޭނާއަށްވުރެ ރަނގަޅަށް އެނގޭނޭ އިތުރު އިންސާނަކު ނުހުންނާނެއެވެ.
"ކިހިނެއްވީ؟... ލިޝްއަށް ކަމެއްވީތަ؟..." ޝަފާޒް ކަންބޮޑުވިއެވެ.
"ތިއެއްނު ނޭނގިގެން މިއުޅެނީ...." ޗޮކެއް ކަނޑައިލަމުން ސުމާ ބުންޏެވެ. "އަހަރެން ވައިބާއިން ގުޅީމަ ބިޒީކުރަނީ... އެކަމަކު މެސެޖަށް ރިޕްލައިކުރޭ... ލިޝްގެ ފޯނު އޮތް ކޮންމެ މީހަކަށްވެސް އެކަން ކުރެވޭނެ ދޯ... އަހަންނަށް ހީވަނީ އަކްރަމް..."
"އަހަންނަށް އޭރުވެސް ހީވިޔޭ ތި އަކްރަމަކީ ރަނގަޅު މީހެއް ނޫނޭ..." ސުމާގެ ޖުމުލަ ނުނިމެނީސް، ޝަފާޒް ހިތްހަމަނުޖެހިފައި ބުނެލިއެވެ.
"އޭތް އޭތް... ހަމަޖެހިބަލަ... އަދި ނޭނގެއެއްނު ހަގީގަތަކީ ކޮބައިކަމެއް..." ޝަފާޒަށް ވީގޮތުން ސުމާ ކަންބޮޑުވިއެވެ. "އަހަރެން މާދަމާ އަދި ލިޝްއަށް ގުޅާނަން... ހަނީމޫނަށް ޓައިމްވެސް ދޭންޖެހޭނެއެއްނު..."
********
"އޮޓޯ..." އާރިޒް ޓެކްސީއެއް ހުއްޓުވިއެވެ.
ދެމީހުން ޓެކްސީއަށް އެރިއިރު، އަތުގައި ފައިސާ ނެތްކަންވެސް އާރިޒްގެ ހަނދާނުގައި ނެތެވެ. އާރިޒްގެ މުޅި ހަޔާތުގައިވެސް އެފަދަ ދުއްވާ އެއްޗަކަށް އެރި އެއީ ފުރަތަމަ ފަހަރެވެ. އާރިޒަކީ އަތުގައި ފައިސާ ގެންގުޅޭ މީހެއް ނޫނެވެ. ދުވަހަކުވެސް އެފަދަ ކަމަކަށް އޭނާ ފައިސާ ދައްކާކަށް ނުޖެހެއެވެ. އޭނާ އެކަން ކުރީ ލިޝާ އާއިމެދުގައި ވިސްނާފައެވެ. ލިޝާ ފައިވާނަށް ނާރާ ހުރުމުން، އުނދަގޫވީ އާރިޒަށެވެ.
"މީ މިއަންހެންކުއްޖާއަށް ވާ ހަމްދަރުދީއެއް ނޫން... މީ އިންސާނިއްޔަތުކަން..." އާރިޒް ވާހަކަ ދެއްކީ އަމިއްލަ ނަފުސާއެވެ.
ޓެކްސީ މަންޒިލަށް ހުއްޓުމުން، ދެމީހުން އެކުގައި ފޭބިއެވެ. ޑްރައިވަރު ފައިސާ ދިނުމަށް އެދުމުން ހަދާނެގޮތެއް ނޭނގިގެން އާރިޒް ތެޅިގަތެވެ. އެއިން ހިސާބެއްގައި ސަޗިން ފެންނަން ހުރިތޯ އަވަސް ނަޒަރެއް ދިނެވެ. ލިޝާއަށް އެމަންޒަރު ފެނުމުން ކުރިއަށްވުރެ ބޮޑަށް ހިތުގައި ހަމްދަރުދީ އުފެދުނެވެ. ޓެކްސީއަށް ދައްކާނެ ވަރަށްވެސް އާރިޒްގެ އަތުގައި ފައިސާ ނެތީ ހެއްޔެވެ؟ އާރިޒަކީ ހަމަ ހަގީގަތުގައިވެސް އެހާ ފަގީރު މީހެއް ހެއްޔެވެ؟ ލިޝާ ދެރަވީ އެހުރިހާ ކަމަކާއިއެކު ލިޝާއަށް އެހީވާން އާރިޒް ތައްޔާރަށް ހުރީމައެވެ. ލިޝާގެ ސަބަބުން އާރިޒަށް ތަކުލީފު ނޫން އެއްޗެއް ނުލިބޭނެއެވެ. ލިޝާ ދޫކޮށްލީ ފުން ނޭވާއެކެވެ. ހިތާއި ދެކޮޅަށް ނިންމޭނެ އެންމެ ބޮޑު ނިންމުން ސިކުންތުކޮޅެއްގެ ތެރޭގައި ނިންމިއެވެ. އޭނާ އަޅައިގެން ހުރި ރަން އަނގޮޓި ނެގިއެވެ. އެއީ އޭނާގެ މަންމަގެ ހަދިޔާއެކެވެ. ދުވަހަކުވެސް އެ އަނގޮޓި ގެއްލެން ބޭނުންނުވާ ލިޝާއަށް މިއަދު އިތުރު ގޮތެއް ނެތެވެ. ހިތް ކުދިކުދިވަމުންދިޔަ ހާލު ލިޝާ އަލުން ޓެކްސީއަށް އެރިއެވެ. އަނގޮޓި ވިއްކާލާފައި ލިބުނު ފައިސާއިން ޓެކްސީއަށް ދައްކާފައި، ބާކީ އާރިޒަށް ދިނެވެ.
"ހާސްނުވޭ... އަހަރެން އެނބުރި ގައުމަށް ދާނީ އެ އަނގޮޓި ހިފައިގެން..." އާރިޒް ފާޑަކަށް ބަލަން ހުރުމުން، ލިޝާ ބުނެލިއެވެ.
ހިތް ހަލާކުވެފައިވާ ހާލުގައިވެސް ލިޝާ ހުރީ ހިނިތުންވެގެންނެވެ. އެ އަނގޮޓިއަކީ ލިޝާއަށް ކިހާ މުހިއްމު އެއްޗެއްކަން އާރިޒަށް އެނގުނީ ލިޝާގެ މޫނުމަތީގެ އަސަރުތަކުންނެވެ. ކިތަންމެ ސިއްރުކުރަން އުޅުނަސް، އެ އަސަރުތައް ހުރީ އެމޫނުން އެނގޭށެވެ. އަނގޮޓި ވިއްކާލި ވަގުތު، އެ ހިތުގެ އިހުސާސްތައް އާރިޒަށް އެނގުނީ ފަރުވާތެރިކަމާއިއެކު އެމޫނަށް ބަލަން ހުރީމައެވެ. ކެތްތެރި އަންހެންކުއްޖެކެވެ. އެހެން މީހުންގެ ކުރިމަތީގައި އިހުސާސްތައް ވަންހަނާކުރަން ކުޅަދާނައެވެ. ލިޝާ ދިން ފައިސާގައި ހިފާކަށް އާރިޒް ބޭނުމެއް ނޫނެވެ. އެކަމަކު، އިތުރުގޮތެއް ނެތުމުން އޭގައި ހިފިއެވެ.
އާރިޒް ޑްރައިވަރާއި ސިއްރުން ވާހަކަތަކެއް ދެއްކުމަށްފަހު ޑްރައިވަރު ފޮނުވައިލިއެވެ. އޭނާ އެނބުރުނުއިރު، ލިޝާ ހުރީ ގޭގެ ދޮރުމަތީގައެވެ. ގެ ފެނިފައިވެސް އާރިޒްގެ ބޮލަށް އެނބުރުން އަރައިގަތެވެ. ސަޗިން އާއިއެކު އެހާ ދުވަހު އުޅުނު އިރުވެސް، ސަޗިންގެ ގެއެއް އޭނާ ނުދެކެއެވެ. ސަޗިންގެ ގެ ހަމަޖައްސަން މެސެޖުކުރިއިރު އެތަން އެފަދަ ހާލަތެއްގައި ހުރެދާނެ ކަމަށް އޭނާ ހީވެސް ނުކުރެއެވެ.
ސަޗިންގެ ގެއަކީ ކުޑަ ގެއެކެވެ. ގޭގެ ބޭރުގައި އާދައިގެ ގޮތަކަށް ސިމެންތި ޖަހާ ކުލަލާފައިވީނަމަވެސް، ގެ ހުރީ ވަރަށް ބޮޑަށް ބާވެ ވީރާނާވާން ކައިރިވެފައެވެ. ކުލަތައް ފޮޅި، ފާރުތަކުގައި ފެހިޖަހާފައެވެ. ވަށާފާރެއް ނެތެވެ. ގެއަށް ވަންނަން ހުރި ދޮރުގައިވާ ބާގަނޑުތައް ބެއްދުމަށް ފިލާކޮޅުތަކެއް ޖަހާފައި ހުއްޓެވެ. ކުޑަދޮރުގެ ގޮތުގައި ކަނޑާފައިވާ ތަންތަން ބައްދާފައި ހުރީ ސަތަރި ބޭނުންކޮށްގެންނެވެ. ގޭގެ އަސްކަނިދަށުގައި ރޯނެއް ދަމާފައި ހުރިއިރު، އެތަނުގައި އަންނައުނު ހިއްކަން އަޅާފައި ހުއްޓެވެ. ގޭގެ ބޭރުގައި ކުކުޅުތައް ދުވެދުވެފައި އުޅޭތަން ބަލަން އާރިޒް ހުރީ ކުރިއަށް ފިޔަވަޅެއްވެސް އަޅަން ނޭނގިފައެވެ.
އާރިޒް ބަލަން ހުއްޓާ، ލިޝާ ގޮސް ގޭގެ ތަޅުގައި ހިފައިލިއެވެ. ތަޅު ހުރީ ހުޅުވާފައެވެ. ދޮރު ހުޅުވުނު އަޑާއިއެކު ގޮވީ ކުރަކި އަޑެކެވެ. ގޭގެ ތަޅުމުގައި އޮތީ ތަރަފާލު އަޅާފައެވެ. ގެއަށް ވަންނައިރު ދޮރުމަތީގައި ފައިފުއްސެއްގެ ގޮތުގައި ބާއްވާފައި އޮތީ ގޯންޏެކެވެ. ލިޝާ އެތެރެއަށް ވަދެ، ގޭގެ އެކި ދިމަދިމާއަށް ނަޒަރު ހިންގައިލިއެވެ. ސީލިންގެއް ނެތެވެ. ގޭގައި ގެންގުޅޭ ހުރިހާ އެއްޗެއް ބަހައްޓާފައި ހުރީ، މައިގެ ތެރޭގައެވެ. މުސްކުޅި އަންހެނަކާއި ފިރިހެނެއްގެ ދެ ތަސްވީރު ފާރުގައި ހަރުކޮށްފައި ހުރިއިރު، ދެ ތަސްވީރުގައިވެސް ހުރީ މާފަތި އަޅުވާފައެވެ. އެއީ އެގައުމުގައި މީހުން މަރުވުމުން ކުރާ ކަމެކެވެ. މައިގެ ތެރޭގައި ކައްކާނެ އުނދުނަކާއި ގޭސްފުޅިއެއް ހުއްޓެވެ. ކައްކަން ބޭނުންކުރާކަށް ގިނަ ތަށި ތެއްޔެއް ނެތެވެ. ގޭގައި ކޮޓަރިއެއް ނެތެވެ. އެކަމަކު ފާހާނާއެއް ހުއްޓެވެ. އެތަން ބައްދާފައި ހުރީ ފިލާ ޖަހައިގެންނެވެ. ފާހާނާގައި ލާފައި ހުރީ ކަހާލެވޭ ދޮރެކެވެ. ތަޅެއް ނުލެވެއެވެ. ފާހާނާ ތައްޓާއި އިސްކޫރެއްގެ އިތުރުން ބާލިދީއަކާއި ފެންނަގާނެ އެއްޗެއް ފިޔަވާ އިތުރު އެއްޗެއް ފާހާނާގައި ނެތެވެ. ނިދާ އެނދު ހުރީ މައިގެތެރޭގައެވެ. ބޯ ރަޖާގަނޑަކާއި 2 ބާލީސް ފިޔަވާ އިތުރު އެއްޗެއް ނެތެވެ.
އާރިޒް ހުރީ އެތަނަށް އާދެވުނު މޮޔަ ހީވެފައެވެ. ލިޝާއަށް ނުފެންނާނޭހެން ބޭރުގައި ހިއްކަން އަޅާފައި ހުރި ބޮކްސާތައް ނަގާ އެތަނުގައި ހުރި ގޯންޏެއްގެ ތެރެއަށް އަޅާލިއެވެ. އެތަކެތި ފެނުމުން ލިޝާ ހީކުރާނީ އެއީ އޭނާގެ އެއްޗެހި ކަމަށެވެ. ގޭތެރޭގައި ތަރުތީބެއް ނެތްއިރު، ސަޗިން ލާން ގެންގުޅޭ އަންނައުނުތައްވެސް ގޮނޑިތަކުގެ މަތީގައި ހުއްޓެވެ. ގޭތެރެ ފެންނަނީ އެކަނި މީހަކު އުޅޭ ތަނެއްގެ ގޮތުގައެވެ.
ލިޝާގެ ވިސްނުން ތަފާތެވެ. އާރިޒް ހީކުރިގޮތާއި ހިލާފަށް އޭނާ ހުރީ ދެރަވެފައެވެ. އާރިޒް އުޅެމުންދާ ހިތްދަތި ދިރިއުޅުން ފެނި އޭނާގެ ހިތުގައި ހަމްދަރުދީ އުފެދުނެވެ. މަންމައާއި ބައްޕަވެސް ނިޔާވެފައިވާތީ، އާރިޒް ކިހާ އެކަނިވާނޭ ހެއްޔެވެ؟ އެގައުމުގައި ފައިސާ ހޯދުމަކީ ކިހާ ބުރަ އަދި ވޭނީ ކަމެއްކަންވެސް ލިޝާއަށް ވިސްނެއެވެ. އެކަނި ދިރިއުޅޭއިރު، އެތައް ގޮންޖެހުމަކާއި ކުރިމަތިވާނެއެވެ. އާރިޒް ކިހާ ކެތްތެރި ހެއްޔެވެ؟ އެހުރިހާ ކަމަކާއިއެކުގައިވެސް ލިޝާފަދަ ނިކަމެއްޗަކަށް އަޅާލަން އެހުރީ ތައްޔާރަށެވެ.
ލިޝާ ފުރަތަމަވެސް ފެށީ ގޭތެރެ ސާފުކުރާށެވެ. އޭގެ ފަހުގައި ގޭގައި ހުރި ހަނޑުލާއި އަލުވި ބޭނުންކޮށްގެން ބަތް ކެއްކިއެވެ. އާރިޒް ހުރީ އިށީންނަންވެސް ނޭނގިފައެވެ. ލިޝާގެ ތަރުތީބުކަމާއި ގެވެހިކަން ފެނި އަޖައިބުވެފައެވެ. އެފަދަ އަންހެންކުއްޖަކު އޭނާގެ މުޅި ހަޔާތުގައިވެސް ނުދެކެއެވެ. ޝަކުވާއެއް ނުކުރެއެވެ. މައްސަލައެއް ނުޖައްސައެވެ. ނެތްމޮޅެއް ހޯދުމަކަށް ނޭދެއެވެ. އާރިޒަށް މުޅީންވެސް ފެނިފައިވަނީ މުއްސަނދިކަމަށް ލޯބިކުރާ އަންހެންކުދިންނެވެ.
"ހިނގާ ކާން..." ދެ ތަށްޓަށް ބަތް އެޅުމަށްފަހު އެއް ތަށި އާރިޒަށް ދިއްކޮށްލަމުން ލިޝާ ބުންޏެވެ. "ފަހުން އަދި ވަރަށް މީރު އެއްޗެއް ކައްކަދޭނަން..."
އެއްވެސް ޝަކުވާއެއްނެތި އާރިޒް ބަތްތަށި ކައި ހުސްކޮށްލިއެވެ. އެހާ ގިނައިން އޭނާ ކެއި އެއީ ފުރަތަމަ ފަހަރެވެ. އަބަދުވެސް ހަށިގަނޑަށް ބަލައިގެން އުޅޭ އާރިޒް މިއަދު ކެއީ އޭނާ ދުވަހަކުވެސް ކައިފައިނުވާފަދަ ކެއުމެކެވެ. ލިޝާގެ ގެވެހިކަމާއި، ހިތްހެޔޮކަން އެ ކެއުން ކާން އާރިޒްގެ ހިތް އޭނާއަށް މަޖުބޫރުކުރީއެވެ.
(ނުނިމޭ)