23 Jan 2024, 07:32
އެފްރިކާ ކަޕް އޮފް ނޭޝަންސް (އެފްކޮން)ގައި ގިނީން ހޯދި މޮޅާ އެކު އެ ގައުމުގައި ކުރިއަށްގެންދިޔަ އުފާފާޅުކުރުމުގެ ތެރެއިން ހަ ސަޕޯޓަރަކު މަރުވެއްޖެއެވެ.
އެކަން ހިނގާފައިވަނީ މިދިޔަ ހުކުރު ދުވަހު އެފްކޮންގައި ގެމްބިއާ އަތުން 1-0ގެ ނަތީޖާއަކުން މޮޅުވި މެޗަށް ފަހު، ގިނީގެ ވެރިކަން ކުރާ ކޮންކްރީގައި ކުރިއަށްގެންދިޔަ އުފާފާޅުކުރުންތަކުގެ ތެރެއިންނެވެ.
ގިނީގެ ފުޓުބޯޅަ ފެޑެރޭޝަނުން ބުނެފައިވާ ގޮތުގައި، އުފާފާޅުކުރުންތަކުގެ ތެރޭގައި ސަޕޯޓަރުން ވެހިކަލްތަކުގައި މަގުތަކަށް ނުކުމެ، ގިނަ އަދަދެއްގެ މީހުން ކާރުތައް ދެއްވަމުން ދިޔަ އިރު، އެ ކާރުތަކުގެ މަތީގައި ތިބެ ވެސް ވަނީ އުފާފާޅުކުރުންތައް ކުރިއަށްގެންގޮސްފައެވެ.
ރިޕޯޓުތައް ބުނާގޮތުގައި، ހަ ސަޕޯޓަރަކު މަރުވެފައިވަނީ އުފާފާޅުކުރުމުގެ ތެރެއިން ބާރު ސްޕީޑުގައި ދުއްވާފައިދިޔަ ދެ ކާރެއް ޖެހިގެންނެވެ. އެ އެކްސިޑެންޓާ ގުޅިގެން އިތުރު ބަޔަކަށް ވެސް އަނިޔާވެފައިވާ ކަމަށް ރިޕޯޓުތައް ބުނެއެވެ.
އެ ހާދިސާތަކާ ގުޅިގެން ގިނީގެ ފުޓުބޯޅަ ފެޑެރޭޝަނުން ވަނީ އުފާފާޅުކުރުންތައް ކުރިއަށްގެންދިއުމުގައި ސަމާލުކަން ދިނުމަށް އިލްތިމާސްކޮށްފައެވެ. އަދި, އަމިއްލަ ފުރާނައަށް ގެއްލުން ނުވާނެ ގޮތަށް އަދި އާއިލާތަކަށް ހިތާމައާ ކުރިމަތިލާން ނުޖެހޭނެ ގޮތަަކަށް އުފާފާޅުކުރުމަށް ވަނީ ގޮވާލައިފައެވެ.
އެފްކޮންގައި ގެމްބިއާ އަތުން ގިނީ ހޯދި މޮޅަކީ ތާރީހީ މޮޅެކެވެ. އެ ގައުމުގެ ސަޕޯޓަރުންނަށް އެ މޮޅު މުހިންމުވަނީ އެއީ 2012 ވަނަ އަހަރުން ފެށިގެން އެފްކޮންގައި ގިނީން ކުޅުނު 15 މެޗުން ހޯދި ތިންވަނަ މޮޅަށްވާތީއެވެ.
އެ މޮޅާއެކު މި އަހަރުގެ އެފްކޮންގައި ހޯދި ހަތަރު ޕޮއިންޓާ އެކު ގިނީ ވަނީ 'ގްރޫޕު ސީ'ގެ ދެވަނައަށް ޖެހިލައިފައެވެ. ދެ ޕޮއިންޓުގެ ފަރަގަކާ އެކު އެއްވަނައިގައި އެންމެ ފަހުގެ ޗެމްޕިއަން ސެނެގާލް އޮތްއިރު، ގިނީގެ ފަހަތުން ތިންވަނައިގައި އޮތީ ފަސް ފަހަރު މުބާރާތް ކާމިޔާބުކޮށްފައިވާ ކެމަރޫނެވެ. ގިނީގެ ފުރަތަމަ މެޗުގައި އެ ޓީމުން ވަނީ 1-1ގެ ނަތީޖާއަކުން ކެމަރޫން ހިފަހައްޓައިފައެވެ.
އައިވަރީ ކޯސްޓުގައި ކުރިއަށްގެންދާ އެފްކޮންގެ ގްރޫޕު ސްޓޭޖުގައި ގިނީ އިން ކުޅޭ ފަހު މެޗުގައި އެޓީމު ނުކުންނަން ޖެހޭނީ ސެނެގާލްއާ ދެކޮޅަށެވެ. އެ މެޗު ކުޅުމަށް ހަމަޖެހިފައިވަނީ ރާއްޖޭގަޑިން މިރޭ 10:00 ގައެވެ.