23 Jan 2024, 07:16
ދާދި ފަހުން ކެރިއަރުގެ ފުރަތަމަ ވެބް ސީރީސް ބެލުންތެރިންނާ ހަމައަށް ގެނެސްދިން ޑައިރެކްޓަރު ރޯހިތު ޝެޓީއާއި ބޮލީވުޑްގެ ފިލްމީ ތަރި ޝާހްރުކް ޚާނާ ދެމެދު އެއްވެސް މައްސަލައެއް ޖެހިފައިނުވާ ކަމަށް ރޯހިތު ބުނެފިއެވެ.
ވެބް ސީރީސް "އިންޑިއަން ޕޮލިސް ފޯސް"ގެ ޕްރޮމޯޝަން އިވެންޓެއްގައި ރޯހިތު ބުނެފައިވަނީ ޝާހާ އެކު މުސްތަގުބަލުގައި މަސައްކަތްކުރުމުގެ ފުރުސަތެއް އޮތިއްޔާ އެ ކަމަށް މަރުހަބާ ކިޔާ ކަމަށެވެ.
ޝާހްރުކް ޚާނާއި ރޯހިތު ޝެޓީ އެކީގައި އެންމެ ފުރަތަމަ މަސައްކަތް ކޮށްފައިވަނީ 2013 ވަނަ އަހަރު ރިލީޒްކުރި ފިލްމު "ޗެންނާއި އެކްސްޕްރެސް"ގައެވެ. ބަތަލާ ދިޕިކާ ޕަދުކޯންއާ އެކު ޝާހު ލީޑު ކުޅުނު "ޗެންނާއި އެކްސްޕްރެސް" އަކީ ބޮކްސް އޮފީހުގައި ވަރަށް ބޮޑު ކާމިޔާބީއެއް ލިބުނު ފިލްމެކެވެ. މި ފިލްމަށް ފަހު ރޯހިތާއި ޝާހު ދެން މަސައްކަތް ކުރީ 2015 ވަނަ އަހަރު ރިލީޒްކުރި ފިލްމު "ދިލްވާލޭ"ގައެވެ. ފިލްމު "ދިލްވާލޭ"އަށް ބޮކްސް އޮފީހުގައި ނާކާމިޔާބީއާ ކުރިމަތިވުމުން ވަރަށް ގިނަ ބައެއްގެ ފާޑުކިޔުން ރޯހިތު ޝެޓީއަށް އެ ދުވަސްވަރު އަމާޒުވިއެވެ.
ރޯހިތު އަދި ޝާހްރުކް ޚާން ފިލްމު "ޗެންނާއި އެކްސްޕްރެސް"ގެ ޝޫޓިންގްތެރޭ ބަތަލާ ދިޕިކާ ޕަދުކޯންއާ އެކު-- ފޮޓޯ/ފޭސްބުކް
ރޯހިތު މީޑިއާ އެކު ބޭއްވި ބައްދަލުވުމެއްގައި ފިލްމު "ދިލްވާލޭ"ގެ ނާކާމިޔާބީއާ ގުޅިގެން ނޫސްވެރިން ސުވާލުކުރުމުން ބުނެފައި ވަނީ، ފިލްމު "ޗެންނާއި އެކްސްޕްރެސް"އަކީ ޝާހްރުކްގެ ފިލްމެއް ނޫން ކަމަށާއި އެއީ ބަތަލާ ދިޕިކާގެ ފިލްމެއް ކަމަށެވެ. މިކަމާ ގުޅިގެން ޝާހާއި ރޯހިތުގެ ގުޅުން ގޯސްވެފައިވާ ކަމަށް ވަރަށް ގިނަ ބަޔަކު އޭރު ވެސް އައީ ބުނަމުންނެވެ. އެހެންނަމަވެސް ދާދި ފަހުން ރޯހިތު ވަނީ މި ބަހުސަށް ނިމުން ގެނެސް ދެ މީހުންގެ މެދުގައި އެއްވެސް ކަހަލަ ރުޅިވެރިކަމެއް ނެތްކަމަށް ބުނެފައެވެ.
ފިލްމު "ދިލްވާލޭ"އަށް ފަހު ރޯހިތުގެ އެއްވެސް ފިލްމަކުން ޝާހު ނުފެނުމުގައި އޮތް ހަމައެކަނި ސިއްރަކީ ދެ މީހުން ވެސް ބޭނުންވާފަދަ ފެންވަރު ރަނގަޅު ސްކްރިޕްޓެއް ނުލިބުން ކަމަށް ރޯހިތު ވަނީ ބުނެފައެވެ. އެފަދަ ސްކްރިޕްޓެއް ވާންޖެހޭނީ ފިލްމު "ޗެންނާއި އެކްސްޕްރެސް"އަށް ވުރެ ރަނގަޅު އަދި ވަރުގަދަ ސްކްރިޕްޓަކަށް ކަމަށް ރޯހިތު ވަނީ ބުނެފައެވެ.
ވެބް ސީރީސް "އިންޑިއަން ޕޮލިސް ފޯސް"އަށް ފަހު ރޯހިތުގެ ފިލްމު "ސިންގްހަމް3" މި އަހަރު ބެލުންތެރިންނަށް ގެނެސްދޭން ވަނީ ނިންމާފައެވެ.