23 Jan 2024, 09:04
އީރާނުގެ ޚާރިޖީ ވަޒީރު، ޙުސައިން އާމިރު އަބްދުﷲ ޙަޔާން އަންނަ ހަފުތާގައި ޕާކިސްތާނަށް ވަޑައިގަތުމަށް ހަމަޖެހިފައިވާ ކަމަށް ޕާކިސްތާނުން ބުނެފިއެވެ.
ޕާކިސްތާނުގެ ޚާރިޖީ ވުޒާރާއިން ނެރުނު ބަޔާނެއްގައި ބުނީ އަބްދުﷲ ޕާކިސްތާނަށް ވަޑައިގަތުމަށް ހަމަޖެހިފައި ވަނީ ޕާކިސްތާނުގެ ޚާރިޖީ ވަޒީރު ޖަލީލު އައްބާސް ޖިލާނީގެ ދައުވަތަކަށް ކަމަށެވެ.
އީރާނުގެ އިސްވެރިއަކު ޕާކިސްތާނަށް ވަޑައިގަތުމަކީ ދެ ގައުމުގެ ދެމެދުގައި މިހާރު އޮތް ހަމަނުޖެހުން އެއްފަރާތްކޮށް ސުލްހަވާން އުޅޭކަމުގެ އިޝާރާތެކެވެ. މި މަހުގެ 26ގެ ކުރިން ދެ ގައުމުގައި ތިބި ސަފީރުން އަނބުރާ މަގާމުގެ މަސްއޫލިއްޔަތާ ހަވާލުމަށް އަންގައިފައިވާނެ ކަމަށް ވެސް ޕާކިސްތާނުގެ ޚާރިޖީ ވުޒާރާއިން ނެރުނު ބަޔާނެއްގައިވެއެވެ.
ދެ ގައުމުގެ ދެމެދުގައި ބަދަލު ކުރި ހަމަލަތަކަކާ ގުޅިގެން ޕާކިސްތަނާއި އީރާނުގެ ގުޅުމަށް ވަނީ ވަރަށް ބޮޑަށް އަސަރުކޮށްފައެވެ.
އީރާނުގެ އިންގިލާބީ ލަޝްކަރުން ޕާކިސްތާނުގެ ބަލޫޗިސްތާން ޕްރޮވިންސްގައި ހަރަކާތްތެރިވާ ޖައިޝް އަލް އަދްލް ނަމަކަށް ކިޔާ ހަތިޔާރުއެޅި ޖަމާއަތަކަށް ހަމަލަދިފައިވަނީ މި މަހުގެ 17ވަނަ ދުވަހުއެވެ.
އެ ހަމަލާގެ ބަދަލުގައި ޕާކިސްތާނުގެ އަސްކަރިއްޔާއިން ވަނީ އީރާނާ ދެކޮޅަށް ވަރުގަދަ ހަމަލާތަކެއް ދީފައެވެ. އީރާނުގެ އަވަށަކަށް ދިން އެ ހަމަލާގައި ހަތަރު ކުޑަކުދިންނާއި ތިން އަންހެނުން ވަނީ މަރުވެފައެވެ. ހަމަލާތަކާ ގުޅިގެން ދެ ގައުމުގެ ސަފީރުން ވެސް ވަނީ ފޮނުވައިލައިފައެވެ.
ދެ ގައުމުގެ ދެމެދެގައި ފެށި، ބަދަލު ހިފުމުގެ ހަޅުތާލުތަކަކީ ފާއިތުވި އަހަރުތަކުގައި ސަރަހައްދީ ރޮނގު ހުރަސްކޮށް ބަދަލުކޮށްފައިވާ އެންމެ ވަރުގަދަ ހަމަލާތަކެވެ.