22 Jan 2024, 23:55
ރައްޔިތުންނަށް ލާބައެއް ލިބޭ ކަމެއްގައި އޭނާ ހުރަހަކަށް ނުވާނެ ކަމަށް މާލޭ މޭޔަރު ކަމަށް އިންތިޚާބުވެ ވަޑައިގެން މިރޭ މަގާމުގެ ހުވާ ކުރެއްވި އާދަމް އާޒިމް މިރޭ ވިދާޅުވެއްޖެއެވެ.
މާލޭ ކައުންސިލުގެ މޭޔަރާއި މެންބަރުން ހުވާ ކުރެއްވުމުގެ ޖަލްސާގައި ވާހަކަދައްކަވަމުން، އިދިކޮޅު އެމްޑީޕީއަށް ނިސްބަތްވެވަޑައިގަންނަވާ އާޒިމް ވިދާޅުވީ ރައްޔިތުންނަށް ލާބަވާ އަދި ރައްޔިތުންނަށް ފައިދާވާ ހުރިހާ ކަމެއްގައިވެސް އޭނާ އެއްބާރުލުން ދެއްވާނެ ކަމަށެވެ.
"މާލޭ މޭޔަރު ކަމުގެ މަގަމުގައި ހުރެ އަޅުގަނޑު މަސައްކަތްކުރުން ބޭނުންވަނީ ސަރުކާރަށާއި، ދައުލަތުގެ ހުރިހާ މުއައްސަސާއަކަށް ވެވެން އޮތް އެއްބާރުލުން ދީގެން،" އާޒިމް ވިދާޅުވިއެވެ.
މި ޖަލްސާގައި ވާހަކަދައްކަވަމުން އާޒިމް ވަނީ، މާލޭގެ ރައްޔިތުންނަށް ބޯހިޔާވަހިކަމުގެ މައްސަލަ ހައްލުކޮށްދެއްވުމަށް ރައީސްގެ އަރިހުގައި އެދި، ޚާއްޞަކޮށް މާލެއާ ކައިރިން މިދިޔަ ސަރުކާރުން ގޯތި ދީފައި އޮތް ތަންތަން ތަރައްގީކޮށް އެ ތަންތަނުން ގޯތި ދިނުމަށް އެދިވަޑައިގެންފައެވެ.
އޭނާ ވިދާޅުވީ، މާލެ ރައްޔިތުން އެދެނީ ބްރިޖަކުން ގުޅިފައިވާ އަވަށްތަކަކަށް ދެވޭނެ މަގު ފަހިވާން ކަމަށެވެ.
"އެމީހުން އެދެނީ ހުޅުމާލެ ފޭސް ތިނަކާއި، ގުޅީފަޅާއި، ގިރާވަރުފަޅާއި، އުތުރުތިލަފަޅަށް އަމާޒުވީ އެމްޑީޕީގެ ބޯހިޔާވަހިކަމުގެ ސިޔާސަތާއި އެއްގޮތަށް ކަން ވެގެންދާން. ބްރިޖުން ގުޅާލެވޭ މިތަންތަނުގައި ބޯހިޔަވާހިކަމުގެ ހަޔާތެއް ފަށަން،" އާޒިމް ވިދާޅުވިއެވެ.
މާލޭ މޭޔަރާއި ކައުންސިލުން ހުވާކުރެއްވުމުގެ ރަސްމިއްޔާތުގެ ތެރެއިން--ފޮޓޯ/ މާލޭ ސިޓީ ކައުންސިލް
އޭނާ ވިދާޅުވީ ބޯހިޔާވަހިކަމުގެ މައްސަލައިގެ ސަބަބުން އެތައް ބަޔަކު ކުށުގެ ވެއްޓަށް ހުށަހެޅިގެން ދާކަމަށެވެ. އަދި އެކަމަށް ހައްލެއް އޮތީ ފުރަތަމަ މަރުހަލާގައި ވެސް އެ ތަންތަން ތަރައްގީކޮށްގެން ދަފުތަރުގައި ޖެހިފައިވާ ރައްޔިތުންނަށާއި މާލޭގައި ދިރިއުޅޭތާ އެތައް އަހަރެއްވެފައިވާ ރައްޔިތުންނަށް ގޯތި ދިނުމުން ކަމަށް އޭނާ ވިދާޅުވިއެވެ.
އާޒިމް ވިދާޅުވީ ރައީސްގެ ތަގުރީރުތަކުން އެމްޑީޕީން އުފަންކުރި ލާމަރުކަޒީ ނިޒާމު ހަރުދަނާކުރުމަށް އެ މަނިކުފާނު ވިސްނުންފުޅު ގެންގުޅުއްވާކަން އެނގި، އެ ކޮމިޓްމަނަޓް ރައްޔިތުންނަށް ދެއްވާތީ ވަރަށް އުފާވާ ކަމަށެވެ.
އާޒިމްގެ އިތުރުން، މާލެއަށް އަލަށް ހޮވުނު ތިން ކައުންސިލަރުންނަށް މިރޭ ހުވާލައިދެއްވީ ސުޕްރީމް ކޯޓުގެ ފަނޑިޔާރު މަހާޒު އަލީ ޒާހިރެވެ.
މާލޭ ސިޓީ ކައުންސިލަށް އާ މޭޔަރަކު ހޮވީ އެ މަގާމުގައި ކުރިން ހުންނެވި ރައީސް ޑރ. މުޙައްމަދު މުއިއްޒު ވެރިކަމާ ހަވާލުވެވަޑައިގަތުމުންނެވެ.
މޭޔަރުގެ އިތުރުން، މާފަންނު ދެކުނުގެ ކައުންސިލަރު ޙަސަން ނާޒިމާއި ހެންވޭރު ދެކުނުގެ ކައުންސިލަރު އާމިނަތު ރިޝްފާ އަހުމަދާއި މެދު ހެންވޭރު ދާއިރާގެ ކައުންސިލަރު އަހުމަދު ރިޝްވާން ރަޝީދު ވެސް މިރޭ ވަނީ ހުވާ ކުރައްވައިފައެވެ.
އޭގެ ތެރެއިން ނާޒިމާއި ރިޝްފާ ހޮވުނީ ޕީއެންސީ ޓިކެޓުގައި ވާދަކޮށްގެންނެވެ. ރިޝްވާން ވާދަކުރީ އެމްޑީޕީގެ ފަރާތުން ކަމަށްވީ ނަމަވެސް މިއަދު ވަނީ ޕީއެންސީއަށް ސޮއިކުރައްވައިފައެވެ.