22 Jan 2024, 21:07
ރައްޔިތުންގެ މަޖިލީހަށް މެންބަރުން ހޮވުމަށް ބާއްވާ އިންތިޚާބުގައި, ދަ ޑިމޮކްރެޓްސްއިން ވާދަކުރާނެ ކެންޑިޑޭޓުން ހޮވުމަށް ބާއްވާ ޕްރައިމަރީ އަންނަ މަހުގެ ތިނެކަށް ބަދަލުކޮށްފައިވާކަން އެ ޕާޓީން މިރޭ އިއުލާންކޮށްފިއެވެ.
ދަ ޑިމޮކްރެޓްސްއިން ޕްރައިމަރީ ބާއްވަން އެންމެ ފުރަތަމަ ނިންމީ އަންނަ މަހުގެ 17ގައެވެ. ނަމަވެސް އެ ޕާޓީން މިރޭ ނެރުނު އިއުލާނެއްގައި ވަނީ އެ ތާރީޚު އަވަސްކުރަން ޕާޓީގެ ނެޝަނަލް އެސެމްބްލީން ނިންމާފައިވާ ކަމަށެވެ.
އެހެންވެ، ދަ ޑިމޮކްރެޓްސްގެ ޕްރައިމަރީ ބާއްވާ ތާރީޚު ދިމާވަނީ، އެ ޕާޓީ އުފެއްދި އިސް މެންބަރުން ކުރިން ނިސްބަތްވި ޕާޓީ ކަމަށްވާ އެމްޑީޕީގެ ޕްރައިމަރީ ވެސް އޮންނަ ތާރީޚާއެވެ.
އެމްޑީޕީން ޕްރައިމަރީ ބާއްވާ ތާރީޚު އިއުލާންކުރީ މިދިޔަ ހަފުތާގެ އާދިއްތައިގައެވެ.
ދަ ޑިމޮކްރެޓްސްގެ އިއުލާނުގައިވަނީ އެ ޕާޓީގެ ޕްރައިމަރީއަށް ކުރިމަތިލުމުގެ ސުންގަނޑި ވެސް އަންނަ އާދިއްތަ ދުވަހުގެ 18:00 ނިޔަލަށް އިތުރުކޮށްފައެވެ. އެ ބަދަލާއެކު، މި ޕްރައިމަރީއަށް ކުރިމަތިލުމަށް އެދޭ މެމްބަރުންނަކީ އާދިއްތައިގެ ނިޔަލަށް އެ ޕާޓީގެ ދަފްތަރުގައި ޖެހިފައިވާ މެމްބަރަކަށްވާން ޖެހޭނެކަން އެ އިއުލާނުގައިވެއެވެ.
އެ ޕްރައިަމަރީގައި ވޯޓުލުމުގެ ހައްގު ލިބޭނީ ވެސް އެ ދުވަހުގެ ނިޔަލަށް އެ ޕާޓީގެ ދަފުތަރުގައި ޖެހިފައިވާ މެމްބަރުންނަށްކަން ވެސް އިއުލާނުގައި ފާހަގަކޮށްފައިވެއެވެ.
ދަ ޑިމޮކްރެޓްސްއިން ބުނީ ވޯޓު ދިނުމުގެ ހައްގު ލިބިގެންވާ މެމްބަރުންގެ ވަގުތީ ލިސްޓް އާއްމުކޮށް، ޝަކުވާއަށް ހުޅުވާލާނީ އާދިއްތަ ދުވަހު ކަމަށެވެ. އަދި ޝަކުވާ ހުށަހެޅުމުގެ ފުރުސަތު އަންނަ ހަފުތާގެ ބުދަ ދުވަހުގެ 18:00އާ ހަމައަށް ދިނުމަށް ފަހު ޖެހިގެން އަންނަ ދުވަހު ދާއިމީ ލިސްޓް އިއުލާނުކުރާނެ ކަމަށް އެ ޕާޓީން ބުންޏެވެ.
އެއިއުލާނާއެކުދަ ޑިމޮކްރެޓްސްއިން ވަނީ މިހާތަނަށް ޕްރައިމަރީގައި ވާދަކުރުމަށް އެދި ހުށަހަޅާފައިވާ މީހުންގެ މައުލޫމާތު ވެސް އާންމުކޮށްފައެވެ.
މަޖިލިސް އިންތިޚާބު ބާއްވަން ހަމަޖެހިފައި ވަނީ އަންނަ މާޗު މަހުގެ 17ގައެވެ.