22 Jan 2024, 17:23
އިންގްލިޝް ޕްރިމިއާ ލީގުގައި ތާވަލްގެ އެއްވަނައިގައި އުޅޭ ލިވަޕޫލާއި އޭއެފްސީ ބޯންމޯތު ބައްދަލުކުރި މެޗު ކާމިޔާބުކޮށް ލިވަޕޫލުން ތާވަލްގައި ފަސް ޕޮއިންޓްގެ ލީޑެއް ނަގައިފިއެވެ.
ބޯންމޯތުގެ ދަނޑުގައި ކުޅުނު މިމެޗު ލިވަޕޫލުން ކާމިޔާބު ކޮށްފައިވަނީ ހަތަރު ލަނޑު ސުން ލަނޑުންނެވެ. ދެޓީމްގެ ފަރާތުން ވާދަވެރި ކުޅުމެއް ފެނުނު މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދަފައިވަނީ ލިވަޕޫލްއިންނެވެ.
މިމެޗުގެ ފުރަތަމަ ހާފުގައި ލިވަޕޫލުން މޮޅު ކުޅުމެއް ދެއްކި ނަމަވެސް އެޓީމަށް މިހާފުގައި ލަނޑެއް ކާމިޔާބު ކުރެވޭގޮތެއްނުވިއެވެ. މިހާފުގައި ބޯންމޯތުންވަނީ ވަރަށް ރަނގަޅަށް ޑިފެންޑް ކޮށްފައެވެ. މިމެޗުގެ ފުރަތަމަ ހާފާ ޚިލާފަށް ދެވަނަ ހާފަށް ލިވަަޕޫލުން ނުކުތީ ބޯންމޯތުގެ ޑިފެންސް ފޫއަޅުވާލުމަށްޓަކައި ޓީމްގެ ކުޅުމަށް ބައެއް ބަދަލު ގެނެސްގެންނެވެ. ނަތީޖާ އަކަށްވީ ދެވަނަ ހާފުގެ ކުޅުން ފެށިތާ ހަތަރު މިނެޓްގެ ތެރޭގައި އެޓީމުން ލަނޑު ޖަހައި މެޗުގެ ލީޑު ނެގުމެވެ. މިލަނޑު އެޓީމަށް ކާމިޔާބު ކޮށްދިނީ ޑާވިން ނޫނޭޒްއެވެ.
މިމެޗުގައި ލިވަޕޫލްގެ ދެވަނަ ލަނޑު މެޗުގެ 70 ވަނަ މިނެޓްގައި ޖަހައިދިނީ ޑިއޮގޯ ޖޮޓާއެވެ. އަދި މިލަނޑު ޖެހިތާ ނުވަ މިނެޓް ފަހުން ޖޮޓަވަނީ ލިވަޕޫލްގެ ތިންވަނަ ލަނޑު ޖަހައިދީފައެވެ. މިމެޗުގައި ލިވަޕޫލްގެ ފަހު ލަނޑު މެޗުގެ އިތުރު ވަގުތުގެ ތިންވަނަ މިނެޓްގައި ޖަހައިދިނީ ފުރަތަމަ ލަނޑުވެސް ޖަހައިދިން ނޫނޭޒްއެވެ. މިމެޗުގައި މީގެއިތުރުން ވެސް ލަނޑު ޖަހާނެ ފުރުސަތު ލިވަޕޫލަށް ލިބުނެވެ. އަދި ބޯންމޯތަށްވެސް މިހާފުގައި ލަނޑު ޖަހާނެ ރަނގަޅު ފުރުސަތު ލިބުނު ނަމަވެސް އެފުރުސަތުތަކުގެ ބޭނުން ހިފޭގޮތެއްނުވިއެވެ.
މިމެޗުގައި ލިވަޕޫލްގެ މުހިންމު ބައެއް ކުޅުންތެރިންވަނީ އަނިޔާއާއި ގައުމީ ޓީމަށް ކުޅެން ދޫކޮށްފައިވުމުގެ ސަބަބުން، ޓީމާ ދުރުގައެވެ.
މިކާމިޔާބީއާއެކު ލިވަޕޫލް މިހާރު އުޅެނީ ކުޅުނު 21 މެޗުން ލިބިފައިވާ 48 ޕޮއިންޓާއެކު ތާވަލްގެ އެއްވަނައިގައި ފަސް ޕޮއިންޓްގެ ލީޑަކާއެކުއެވެ. ނަމަވެސް ދެވަނައިގާ އުޅޭ އެންމެ ފަހުގެ ޗެމްޕިއަން މެންޗެސްޓާ ސިޓީ ނުކުޅެ އޮތް މެޗު ކާމިޔާބު ކޮށްފި ނަމަ މިފަރަގު ދެ ޕޮއިންޓަށް ކުޑަވުން ގާތެވެ. އަދި ބޯންމޯތު އުޅެނީ 20 މެޗުން ލިބިފައިވާ 25 ޕޮއިންޓާއެކު ތާވަލްގެ 12 ވަނައިގައެވެ.