22 Jan 2024, 15:39
މި މަހުގެ ކުރީކޮޅު ރައީސް ޑރ. މުހައްމަދު މުއިއްޒު ޗައިނާއަށް ކުރެއްވި ދަތުރުފުޅުގައި، ދެ ގައުމުގެ ދެމެދު ސޮއިކުރެވުނު އެއްބަސްވުންތަކަށް އަމަލީ ސިފަ ގެނައުމާ ގުޅޭގޮތުން ،މިއަދު މަޝްވަރާކޮށްފިއެވެ.
މި މަޝްވަރާ ކުރެވުނީ އެ ގައުމުގެ ކޮމިއުނިސްޓް ޕާޓީގެ އިންޓަނޭޝަނަލް ޑިޕާޓްމަންޓްގެ ނައިބު ވަޒީރާއި މިއަދު ރައީސް އޮފީހުގައި ބޭއްވުނު ބައްދަލުވުމެއްގައެވެ.
ރައީސްގެ ފުރަތަމަ ރަސްމީ ދަތުރުފުޅުގައި ޗައިނާއަށް ވަޑައިގަތީ އެ ގައުމުގެ ރައީސް ޝީ ޖިންޕިންގެ ދައުވަތަކަށެވެ.
އެ ދަތުރުފުޅުގައި ދެ ގައުމުގެ މެދުގައި 20 އެއްބަސްވުމެއްގައި ސޮއިކޮށްފައިވާއިރު އޭގެ ތެރޭގައި ދެ ގައުމުގެ ގުޅުން ސްޓްރެޓީޖިކް ޕާޓްނާޝިޕަކަށް ހެދުމުގެ އެކްޝަން ޕްލޭނެއް ވެސް ހިމެނެއެވެ.
އެގޮތުން މިއަދު ބޭއްވުނު ބައްދަލުވުމުގައި ދެ ގައުމުގެ ދެމެދު ސޮއިކުރެވުނު އެއްބަސްވުންތައް ތަންފީޒުވެގެން ދިއުމަށް އެދިވަޑައިގަންނަވާކަމަށް ރައީސް ވިދާޅުވިއެވެ.
އެގޮތުން، ރާއްޖެއާއި ޗައިނާއާ ދެމެދު ކުރާ ސީދާ ވައިގެ ދަތުރުތައް ޗައިނާގެ އިތުރު ސިޓީތަކަށް ފުޅާކުރެވިދާނެ ގޮތްތަކާ ގުޅޭގޮތުން މަޝްވަރާކުރެއްވިއެވެ.
މި ބައްދަލުވުމުގައި ކޮމިއުނިސްޓް ޕާޓީގެ ނައިބު ވަޒީރު ފާހަގަކުރެއްވި ގޮތުގައި ޗައިނާގެ ރައީސް ޝީ ޖިން ޕިންގެ ވެރިކަމުގެ ދަށުން ޗައިނާގެ ކަމާގުޅޭ ހުރިހާ އިދާރާތަކުން ރާއްޖެއާ ގުޅިގެން މަސައްކަތްކުރުމަށް ތިބީ ތައްޔާރަށެވެ.
އެއާއެކު، ރައީސް މުއިއްޒު ވަނީ ރާއްޖެއަށް ޗައިނާއިން ފަހިކޮށްދެއްވާ ތަމްރީނުގެ ފުރުސަތުތަކާއި ދެއްވާ އެއްބާރުލުން ފާހަގަކުރައްވައި ޝުކުރު އަދައިކުރައްވައިފައެވެ.
މި ބައްދަލުވުން ނިންމަވައިލެއްވީ، ދެ ގައުމުގެ ދެމެދު ހުރި ގުޅުންތައް ކުރިއަށް އޮތް ތަނުގައި ވެސް އިތުރަށް ބަދަހިކޮށް، ގުޅިގެން މަސައްކަތް ކުރުމުގެ ޝައުގުވެރިކަން ފާޅުކުރަމުންނެވެ.