22 Jan 2024, 14:24
ރާއްޖޭގެ ގައުމީ ބޭންކް، ބޭންކް އޮފް މޯލްޑިވްސް (ބީއެމްއެލް)އަށް ޑޮލަރު ލިބުމުގައި ދަތިތަކެއް ކުރިމަތިވެ، އިންޓަނޭޝަނަލް ޓްރާންސްފާ (ޓީޓީ)ތަކަށް ޑޮލަރުން ފައިސާ ހަމަޖައްސަން ދަތިވެއްޖެއެވެ.
ބައެއް ވިޔަފާރިވެރިންނާއި އާންމުންގެ ފަރާތުން އެ ކަމުގެ ކަންބޮޑުވުންތައް އަންނަނީ ހިއްސާކުރަމުންނެވެ. އޭގެ ސަބަބުން މުދާ އެތެރެކުރުމާއި އެ ނޫން ކަންކަމުގައި އެ ވިޔަފާރިވެރިންނަށް ދަތިތަކާ އަންނަނީ ކުރިމަތިވަމުންނެވެ.
މި ކަމާ ގުޅިގެން މީޑިއާތަކަށް މައުލޫމާތު ދެމުން ބީއެމްއެލްގެ ހެޑް އޮފް ޕަބްލިކް ރިލޭޝަންސް މުޙައްމަދު ސަޢީދު ވިދާޅުވީ އެ ބޭންކުން އަބަދުވެސް މަސައްކަތްކުރަނީ އެ ވަގުތަކު ބޭންކަށް ދެވެން ހުރި މިންވަރަކަށް ބަލައި ޑޮލަރުގެ އެހީ ކަސްޓަމަރުންނަށް ދިނުމަށް ކަމަށެވެ.
"ބޭންކް އޮފް މޯލްޑިވްސް އިން އަންނަނީ ރާއްޖޭން ބޭރަށް ފައިސާ ފޮނުވުމަށް ބޭނުންވާ ޑޮލަރު އެވަގުތެއްގައި ބޭންކަށް ދެވެން ހުރި މިންވަރަކަށް ބަލައި ކަސްޓަމަރުންނަށް ޑޮލަރުގެ އެހީތެރިކަން ފޯރުކޮށްދެމުން އެހެން ނަމަވެސް މި އެހީތެރިކަން ބިނާވެފައި އޮންނަނީ ބޭންކުގެ ރިޒާވްގައި ހުރި ޑޮލަރުގެ ނިސްބަތަކަށް،" ސައީދު ވިދާޅުވިއެވެ.
އޭނާ ވިދާޅުވީ ކަސްޓަމަރުންގެ އެކައުންޓްގައި ހުންނަ ޑޮލަރު ބޭނުންކޮށްގެން އިންޓަނޭޝަނަލް ޓްރާންސްފާތައް ކުރެވޭނެ ކަމަށެވެ.
އެގޮތުން ޑެބިޓް ކާޑުގެ ޕްރައިމަރީ އެކައުންޓަކަށް ޑޮލަރު އެކައުންޓް ހަމަޖައްސާފައިވާ ކަސްޓަމަރުންނަށް ދުވާލަކު 3،000 ޑޮލަރުގެ މުއާމަލާތް ކުރެވޭނެ ކަމަށާއި، ބީއެމްއެލް އިންޓަނެޓް ބޭންކިން އަދި މޮބައިލް ބޭންކިން މެދުވެރިކޮށް ޑޮލަރު އެކައުންޓުން އިންޓަނޭޝަނަލް ޓްރާންސްފާ (ޓީޓީ) ކުރެވޭނެ ކަމަށް ވެސް ވިދާޅުވިއެވެ.
މިދިޔަ އަހަރުގެ ފެބްރުއަރީ މަހު ބޭންކުންވަނީ އޭޓީއެމް އަދި ބްރާންޗް މެދުވެރިކޮށް ނެގޭ ޑޮލަރުގެ ލިމިޓް އުވައިލައިފައެވެ. އެ ބަދަލާއެކު މިހާރު ދުވާލަކަށް އޭޓީއެމުން 1،600 ޑޮލަރު ނެގޭނެއެވެ.
މާލެ، ހުޅުމާލެ އަދި ވެލާނާ އިންޓަނޭޝަނަލް އެއާޕޯޓްގައި ބޭންކުގެ ޑޮލަރު އޭޓީއެމް ވަނީ ގާއިމްކޮށްފައެވެ.