22 Jan 2024, 19:11
ޣައްޒާ (22 ޖަނަވަރީ 2024): އިސްރާއީލުން ޣައްޒާގެ ރައްޔިތުންގެ ނަސްލު ނައްތާލުމަށް ހިންގާ ގަތުލުއާންމުތަކުގައި މިހާތަނަށް ޣައްޒާގެ 100އަށް ވުރެ ގިނަ ދާއީން (އިސްލާމީ ދައުވާއާއި އިސްލާމީ އިލްމު ފަތުރާ މީހުން) ޝަހީދުކޮށް ހާހަކަށް ވުރެ ގިނަ މިސްކިތް ހަލާކު ކޮށްލާފައިވާ ކަމަށް ޣައްޒާގައި ވެރިކަން ކުރާ ހަމާސްގެ ސަރުކާރުން ބުނެފިއެވެ.
ޣައްޒާގެ އިސްލާމީ އަވްގާފް އާބެހޭ ވުޒާރާއިން ބުނިގޮތުގައި ޔަހޫދީ ސިފައިން ޝަހީދުކޮށްލި ދާއީންގެ ތެރޭގައި ދީނީ އިލްމުވެރިންނާއި މިސްކިތްތަކުގެ އިމާމުންނާއި ޚަތީބުންނާއި ގުރުއާނުގެ އިލްމު ފަތުރާ ޙާފިޒުންނާއި މިސްކިތްތަކުގައި ބަންގިގޮވާ މުއައްޒިނުންނާއި ގާރީން ހިމެނެއެވެ.
މީގެއިތުން ޔަހޫދީންގެ ހަމަލާތަކުގައި ޝަހީދުވާމީހުންގެ ހަށިތަކުގެ ބައިތައް ވަގަށް ނެގުމާއި ކައްވަޅުތައް ކޮނެގެން މައްޔިތުންގެ ހަށިތަކާއި ކަށިތައް ނެގުންފަދަ ބޮޑެތި ލާއިންސާނީ ޖަރީމާތައްވެސް އިސްރާއީލު ސިފައިން ޣައްޒާގައި ހިންގަމުން ގެންދާކަމަށް ޣައްޒާގެ އިސްލާމީ އަވްގާފް އާބެހޭ ވުޒާރާ އިން ނެރުނު ބަޔާނެއް ބުނެއެވެ.
ޔަހޫދީ ސިފައިން ޣައްޒާގެ އާންމުންނާ ދެކޮޅަށް ހިންގާ ނަސްލު ނައްތާލުމުގެ ޖަރީމާތަކުގެ ތެރޭގައި ޣައްޒާގެ ދާއީން މެރުމާއި މިސްކިތްތައް ނައްތާލުމުގެ އިތުރުން ޔުނިވާސިޓީތަކާއި ސްކޫލްތަކާއި ތައުލީމު ދޭތަންތަން ބޮންއަޅައި އެތަންތަން ހަލާކުކުރުންވެސް ހިމެނެއެވެ. އިސްރާއީލުންވަނީ ޣައްޒާގެ ހުރިހާ ޔުނިވާސިޓީތަކާއި ކޮލެޖްތަކާއި ސްކޫލްތަކަށް ބޮންއަޅައި އެތަންތަން ހަލާކުކޮށްލާފައެވެ. މީގެތެރޭގައި ޣައްޒާގެ އެންމެ ބޮޑު އިސްލާމިކް ޔުނިވާސިޓީވެސް ހިމެނެއެވެ.
އިސްރާއީލުގެ ހަރުކަށި ވެރިންވަނީ ޣައްޒާއަކީ އެތަނުގެ ރައްޔިތުންނަށް ދިރިނޫޅެވޭ ވަރުގެ ތަނަކަށް ހަދާނެކަމުގެ އިންޒާރު ދީފައެވެ. މީގެއިތުރުން ޣައްޒާއަށް އެޓަމިކް ބޮންއަޅައި ޣައްޒާގެ ހުރިހާ ރައްޔިތުން މެރުމަށްވެސް އިސްރާއީލުގެ ވަޒީރަކުވަނީ ގޮވާލާފައެވެ.
ޣައްޒާގެ ރައްޔިތުންގެ ނަސްލު ނައްތާލުމަށް ހިންގާ ގަތުލުއާންމުތަކުގައި މިހާތަނަށް ޔަހޫދީ އިސްރާއީލުންވަނީ ފަލަސްތީނުގެ 24 ހާހަށްވުރެ ގިނަމީހުން ޝަހީދުކޮށް 63 ހާހަށް ވުރެ ގިނަމީހުން ޒަޚަމްކޮށްލާފައެވެ. އަދި އިސްރާއީލުން ވައްޓާލާފައިވާ އިމާރާތްތަކުގެ ދަށުގައި ވެސް އަށް ހާހަށް ވުރެ ގިނަމީހުން މަރުވެފައިވާކަމަށް ވަނީ ބެލެވިފައެވެ. މި އަށް ހާސް މީހުންގެ ހަށިތައް ފެނިފައިނުވާތީ އެމީހުން ބެލެވިފައިވަނީ ގެއްލިފައިވާ މީހުންގެ ގޮތުގައެވެ.
އިސްރާއީލު ގެންދަނީ ޣައްޒާގައި އިސްރާއީލުން ޙާލުގައި ޖައްސައި މަގުމަތިކޮށްލާފައިވާ މީހުންނަށް އިންސާނީ އެހީ ފޯރުކޮށްދިނުމަށްވެސް ގަސްދުގައި ހުރަސްއަޅަމުންނެވެ. މިހުރިހާ ޖަރީމާތަކާ ގުޅިގެން އިސްރާއީލުގެ މައްޗަށް، ޣައްޒާގެ ރައްޔިތުންގެ ނަސްލު ނައްތާލުމުގެ ދައުވާ ހުށަހެޅިފައިވާއިރު އިސްރާއީލުވަނީ ބައިނަލްއަގްވާމީ އިންސާފުގެ ކޯޓުގެ ކުރިމައްޗަށް ހާޒިރުވެ މިޖަރީމާތަކާމެދު ޖަވާބުދާރީ ވާންޖެހިފައެވެ.
މިހުރިހާ ޖަރީމާތަކެއް ހިންގުމަށް އިސްރާއީލަށް ވާގިވެރިވަނީ އެމެރިކާއާއި ޔޫރަޕްގެ ގައުމުތަކެވެ.