22 Jan 2024, 12:50
ކުރިއަށް އޮތް ރައްޔިތުންގެ މަޖިލީހުގެ އިންތިޙާބުގައި ވޯޓު ދިނުމުގެ ހައްޤު ލިބިފައިވާ މީހުންގެ ލިސްޓަށް، ޖުމުލަ 746 ޝަކުވާ ލިބިފައިވާ ކަމަށް އިލެކްޝަންސް ކޮމިޝަން (އީސީ)ން މިއަދު ބުނެފިއެވެ.
ވޯޓާސް ލިސްޓަށް ލިބުނު ޝަކުވާތަކުގެ ތަފުސީލު އީސީގެ ނައިބު ރައީސް އިސްމާއިލް ހަބީބް މިއަދު ވަނީ "ސަން"އާ ހިއްސާ ކުރައްވައިފައެވެ. އެގޮތުން، އެންމެ ގިނަ ޝަކުވާ ލިބިފައިވަނީ ވޯޓުލުމުގެ ހައްޤު ލިބިގެންވާ މީހުންގެ އެޑްރެސް ބަދަލުވެގެންނެވެ. އެއީ، ޖުމުލަ 450 ޝަކުވާއެވެ.
މަރުވެފައި ތިބި މީހުންގެ ނަން ލިސްޓުގައި ހިމެނިގެން 225 ޝަކުވާ ލިބިފައިވާއިރު، ވޯޓު ދިނުމަށް ކަނޑައެޅިފައިވާ އިންތިޚާބީ ދާއިރާ ބަދަލުވެގެން 40 ޝަކުވާ ހުށަޙަޅައިފައިވެއެވެ.
މީގެ އިތުރުން، ވޯޓު ދިނުމުގައި ހައްޤު ލިބި، ލިސްޓުގައި ނަން ނުހިމެނިގެން ފަސް ޝަކުވާ އަދި އައިޑި ކާޑުގެ މައުލޫމާތު ބަދަލުވެގެން އެއް ޝަކުވާ ހުށަހަޅައިފައިވެއެވެ.
މަޖިލީހުގެ އިންތިޚާބު އަންނަ މާޗު މަހުގެ 17ގައި ބޭއްވުމަށް އީސީން ވަނީ ނިންމައިފައެވެ.
އީސީން މިހާރު ވަނީ މި އިންތިޚާބުގައި ލޯފަން މީހުންނަށް އެހެން މީހެއްގެ އެހީއާނުލައި ވޯޓުލެވޭނެ އިންތިޒާމު ހަމަޖެއްސުމަށް، އެ މީހުން ވޯޓުލުމަށް ރަޖިސްޓްރީވުމުގެ ފުރުސަތު ހުޅުވާލައިފައެވެ.
މަޖިލިސް އިންތިޚާބުގައި ވޯޓުލުމުގެ ހައްގު ލިބިފައިވާ މީހުންގެ އަދަދު 284،327 މީހުންނަށް އަރާއިއިރު އޭގެ ތެރޭގައި ހިމެނެނީ 14،5162 ފިރިހެނުންނާއި 139،165 އަންހެނުން ކަމަށް އީސީން ބުންޏެވެ.
މި އިންތިޚާބުގައި 93 ދާއިރާއަކުން ރައްޔިތުންގެ މަޖިލީހުގެ 20 ވަނަ ދައުރަށް މެންބަރުން އިންތިޚާބު ކުރާނެއެވެ.