22 Jan 2024, 12:57
މާލެ އަތޮޅު ފުނަދޫގައި ހުރި ފިއުލް ފާމް ބަދަލުކުރަން ނިންމައިފައިވަނީ ތިލަފުށިކައިރީ އޮންނަ މާގިރިފަޅަށް ކަމަށް އިންފްރާންޓަކްޗަރު މިނިސްޓަރު ޑރ. އަބްދުﷲ މުއްޠަލިބު މިއަދު ވިދާޅުވެއްޖެއެވެ.
ރައީސް އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމެއްގައި ޕަބްލިކް ޕޮލިސީ ސެކްރެޓަރީ އަބްދުﷲ ނާޒިމް ވިދާޅުވީ، ފުނަދޫގައި ހުރި ފިއުލް ފާމް ބަދަލުކުރުމުގެ ކަންކަން އެސްޓީއޯއާ ހަވާލުކޮށްގެން ކުރިއަށް ގެންދަން އިކޮނޮމިކް ކައުންސިލުން ނިންމައިފައިވާ ކަމަށެވެ.
މި ނިންމުމާއި ގުޅިގެން މާލެ އަތޮޅުގައި މާގިރިފަޅުގެ ނަމުން ނަން ދެވިފައިވާ ދެ ތަނެއް އޮންނާތީ އާންމުންގެ މެދުގައި އޮޅުންތަކެއް ވަނީ އަރައިފައެވެ.
އެހެންވެ، މިނިސްޓަރު މުއްތަލިބު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ފުނަދޫ ފިއުލް ފާމް ބަދަލު ކުރަނީ ތިލަފުށި ކައިރީ އޮންނަ މާގިރިފަޅަށް ކަމަށާއި، އެއީ ޝެރަޓަން މޯލްޑިވްސް ފުލްމޫން ކައިރީ އޮންނަ މާގިރިފަޅު ނޫން ކަމަށެވެ.
ރައީސް ޑރ. މުޙައްމަދު މުއިއްޒު މި މަހުގެ ހަތަރެއްގައި އިފުތިތާހު ކުރެއްވި، ވެލާނާ އިންޓަނޭޝަނަލް އެއާޕޯޓު ތަރައްގީކުރުމުގެ ބިޔަ މަޝްރޫއުގައި ވަނީ ފުނަދޫގައި ހުރި ތެޔޮ ޓޭންކުތައް އެހެން ތަނަކަށް ބަދަލުކުރާނެކަން އިއުލާންކުރައްވާފައެވެ.
އެ ތެޔޮ ޓޭންކުތައް ބަދަލުކުރުމަށް ފަހު، އެ ރަށުގައި ޒަމާނީ ފެންވަރުގެ ފައިނޭންޝަލް ސެންޓަރެއް ތަރައްގީކުރާނެ ކަމަށާއި ކޮންވެންޝަން ސެންޓަރުތަކާއި ހޮޓާތައް ތަރައްގީކުރާނެ ކަމަށް ވެސް އެ މަޝްރޫއުގެ ޕްލޭންގައިވެއެވެ.
ފުނަދޫގައި ތެޔޮ ރައްކާކުރުމަކީ ރައްކާތެރިކަމެއް ނޫން ކަމަށް ބުނެ، މީގެ ކުރިން ބައެއް މީހުން ސޯޝަލް މީޑިއާގައި ކަންބޮޑުވުން ފާޅުކޮށްފައި ވެސް ވެއެވެ.