22 Jan 2024, 14:14
ހުޅުމާލޭ ދެވަނަ ފިޔަވަހީގައި އޮންނަ އަތިރިމަތީ ނުގަވާއިދުން ޖަހާފައިހުރި ލަކުޑި ހަޓުތައް ނެގުން ފަސްކޮށް، ދާއިމީ ހައްލެއް ހޯދުމުގެ މަސައްކަތް ފަށައިފިއެވެ.
އެ ސަހަރުގައި ތަރައްގީކޮށްފައި ހުރި ހިޔާ ފުލެޓުތަކާ ދިމާލުން ބޭރުގައި ހަޓުތައް ހަދައިގެން ގިނަ ބަޔަކު އަންނަނީ ވިޔަފާރިކުރަމުންނެވެ. އެކަމަކު، އެއީ އެގޮތަށް ވިޔަފާރިކުރަން ދޫކޮށްފައިހުރި ބިންތަކެއް ނޫނެވެ.
ގިނަ އަދަދެއްގެ މީހުން އާބާދުވެފައިވާ ހިޔާ ފުލެޓުތަކާ ދިމާލުން، ކުޑަކުދިން ހިތްހަމަ ޖައްސާލާށާއި ހަވީރު ނުކުމެލަން ވެސް އޮންނަ އަތިރިމަތި މިހާރު އޮތީ އެއްކޮށް ލަކުޑި ހަޓުތަކުން ފުރާލައިފައެވެ. ހަޓުތައް ހަދައިގެން އެ ތަންތަނުގައި މީހުން އަންނަނީ ވިޔަފާރިކުރަމުންނެވެ.
ހުޅުމާލޭ ދެވަނަ ފިޔަވަހީ އަތިރިމަތީ ޖަހާފައި ހުރި ލަކުޑި ހަޓެއް: އެ ހަޓުތައް ނަގަން މީގެ ކުރިން އެޗްޑީސީން ވަނީ އަންގާފައި -- ސަން ފޮޓޯ؛ އިންފިނިޓް މޮމެންޓްސް/ މުހައްމަދު މާވީ
މީގެ ކުރިން ހައުސިން ޑިވޮލޮޕްމަންޓު ކޯޕަރޭޝަން (އެޗްޑީސީ)ން ވަނީ އެ ހަޓުތައް ނަގަން ވެސް އަންގައިފައެވެ.
އެގޮތުން، މިދިޔަ އަހަރުގެ ނޮވެމްބަރު މަހުގެ 16 ވަނަ ދުވަހު ވެސް އެޗްޑީސީން ވަނީ އެ ހަޓުތައް އެ މަހު 25ގެ ކުރިން ނަގަން އަންގައިފައެވެ. އަދި، އެ މުއްދަތުގައި ހަޓުތައް ނުނަގައިފި ނަމަ، އެ ކުންފުނިން އެ ތަންތަން ސާފުކޮށް ހަޓުތައް ނަގާނެ ކަމަށް ވެސް އޭރު ބުނެފައިވެއެވެ.
އެކަމަކު، އެޗްޑީސީގެ މީޑިއާ އޮފިޝަލް އަލީ މަޝާރު މިއަދު 'ސަން'އަށް ވިދާޅުވީ، އާ މެނޭޖްމަންޓުގެ ވިސްނުމާ އެކު އެ ހަޓުތައް ނެގުން އިހަށް މަޑުޖައްސާލާފައިވާ ކަމަށެވެ. އަދި، އެ މައްސަލައަށް ދާއިމީ ހައްލެއް ހޯދުމުގެ މަސައްކަތް މިހާރު އެ ކުންފުނިން ކުރަމުން އަންނަ ކަމަށް އޭނާ ވިދާޅުވިއެވެ.
ހުޅުމާލޭ ދެވަނަ ފިޔަވަހީގައި ޖަހާފައި ހުރި ލަކުޑި ހަޓުތައް: މި ތަންތަނުގައި އާންމުކޮށް ވިއްކައި އުޅެނީ ކާބޯތަކެތި -- ސަން ފޮޓޯ: އިންފިނިޓް މޮމެންޓްސް/ މުހައްމަދު މާވީ
"އެ ތަނުގައި ކިއޯސްކްތަކެއް ބަހައްޓައި، އުސޫލެއްގެ ތެރެއިން ކިއޯސްކްތައް ދޫކުރެވޭނެ ގޮތެއް ކަނޑައަޅައި ކިއޯސްކްތައް ހެދުމުގެ މަސައްކަތް އަންނަނީ ކުރަމުން،" އޭނާ ވިދާޅުވިއެވެ.
އެހެންވެ، ހަޓުތައް ނެގުމުގެ މަސައްކަތް އަލުން ފަށާނީ އެ ސަރަހައްދުގައި އެގޮތަށް ވިޔަފާރި ކުރެވޭނެ ދާއިމީ ހައްލެއް ހޯދުމަށް ފަހުގައި ކަމަށް މަޝާރު ވިދާޅުވިއެވެ.
ހުޅުމާލޭ ދެވަނަ ފިޔަވަހީގައި ޖަހާފައި ހުރި ލަކުޑި ހަޓުތައް: އެ ހަޓުތައް ނަގާނީ ދާއިމީ ހައްލެއް ހޯދާފައި ކަމަށް އެޗްޑީސީން ވަނީ ބުނެފައި -- ސަން ފޮޓޯ: އިންފިނިޓް މޮމެންޓްސް/ މުހައްމަދު މާވީ
ފާހަގަކޮށްލެވޭ ގޮތުގައި އޭގެ ތެރެއިން ބައެއް ހަޓުތަކުގައި ތިބެނީ ވެސް ބިދޭސީންނެވެ. އެ ހަޓުތައް ކައިރީގައި ގޮނޑިއާއި މޭޒުތައް ޖަހައިގެން ވެސް ބައެއް މީހުން ދަނީ ވިޔަފާރިކުރަމުންނެވެ.
އާންމުކޮށް، އެ ސަރަހައްދުގައި ހަޓުތައް ހަދައިގެން ވިޔަފާރިކުރަމުން އަންނަނީ އެ ފުލެޓުތަކުގައި ދިރިއުޅޭ މީހުންނެވެ. އެ ތަންތަނުގައި އާންމުކޮށް ވިއްކަނީ އެކި ބާވަތްތަކުގެ ކާބޯތަކެއްޗެވެ.