22 Jan 2024, 08:43
ފަލަސްތީނުގައި އިސްރާއީލުންގެ ކުރިއަށްގެންދާ ލާއިންސާނީ ޖަރީމާތައް ނިމުމަކަށް ގެނެސް، ފަލަސްތީނު މައްސަލަ ހައްލު ނުވަނީސް އިސްރާއީލާ އެކު ރަސްމީ ގުޅުންތަކެއް ނުހިނގާނެ ކަމަށް ސައުދީ އަރަބިޔާގެ އަމީރު ފައިސަލް ބިން ފަރްހާން ވިދާޅުވެއްޖެއެވެ.
އަމީރު އެގޮތަށް ވިދާޅުވީ ސުވިޓްޒަލޭންޑުގައި، މި މަހުގެ 19 ވަނަ ދުވަހު ނިމުނު ދުނިޔޭގެ އިގުތިސާދީ ފޯރަމްގައި 'ސީއެންއެން'އަށް ދެއްވި އިންޓިވިއުއެއްގައެވެ.
"އަހަމެންނަށް ފެންނަމުން މި ދަނީ އިސްރާއީލުން ޣައްޒާ ސުންނާފަތިކުރާތަން. އެއީ، އެއްވެސް ވަރަކަށް ބަލައިގަނެވޭނެ ކަމެއް ނޫން. އެކަން ޖެހޭނީ ހުއްޓަން،" އަމީރު ވިދާޅުވިއެވެ.
އެއާއެކު ޣައްޒާގައި ހިނގަމުންދާ ހަމަނުޖެހުންތައް ކުޑަކުރުމާއި އާންމުން މަރުވުން ހުއްޓުވުމަކީ ސައުދީ އަރަބިއްޔާގެ މުހިއްމު އަމާޒެއް ކަމަށް އަމީރު ފައިސަލް ވިދާޅުވިއެވެ.
އިސްރާއީލާ ސިޔާސީ ގުޅުން ގާއިމު ކުރުމާ ގުޅޭ ގޮތުން ސައުދީ އަރަބިއްޔާއިން ކުރަމުންދިޔަ މަޝްވަރާތައް އަލުން ފަށާނީ ޔަހޫދީން ޣައްޒާގައި ހިންގަމުންދާ ލާއިންސާނީ އުދުވާން ހުއްޓައިލުމުން ކަމުގައި ސައުދީން އެމެރިކާއަށް ކަނޑައަޅައިފައި ހުންނަވާ ސަފީރު އަމީރާ ރީމާ ބިންތު ބަންދަރް ވެސް ވަނީ ވިދާޅުވެފައެވެ.
އިސްރާއީލަކީ ސައުދީން މިއަދާ ޖެހެންދެން ވެސް ބަލައިގަނެފައިވާ ގައުމެއް ނޫނެވެ. ކުރިން 2020 ވަނަ އަހަރު އެމެރިކާއިން އިސްވެ އެކުލަވައިލި އިބްރާހީމް މުއާހަދާގެ ދަށުން ގަލްފުގެ ބައެއް ގައުމުތަކުން އިސްރާއީލާ ސިޔާސީ ގުޅުން ގާއިމު ކުރިއެވެ. ނަމަވެސް އެ ލިސްޓުގައި ސައުދީއެއް ނުހިމެނެއެވެ. އެ މުއާހަދާގެ ދަށުން އިސްރާއީލާ ގުޅުން ގާއިމު ކޮށްފައިވާ ގައުމުތަކުގެ ތެރޭގައި ބަހްރައިނާއި އެކުވެރި އަރަބި އިމާރާތް (ޔޫއޭއީ)އާއި މަޣްރިބު ހިމެނެއެވެ.