22 Jan 2024, 06:58
ޕްރައިމަރީ ގްރޭޑްތަކަށް ކިޔައިވައިދޭ ޗައިނާގެ ސްކޫލެއްގައި ރޯވެ، 13 ކުދިން މަރުވެއްޖެއެވެ.
ޗައިނާގެ ދައުލަތުގެ މީޑިއާ، ސީސީޓީވީ ޗައިނާއިން ރިޕޯޓުކޮށްފައިވާ ގޮތުގައި އެ ގައުމުގެ ހަނާން ޕްރޮވިންސްގައި ހުންނަ އެ ސްކޫލްގައި އަލިފާން ރޯވުމުގެ ސަބަބުން މަރުވެފައި ވަނީ އެ ސްކޫލްގެ ގްރޭޑް ތިނެއްގައި ކިޔަވަމުންދިޔަ ކުދިންތަކެކެވެ. އެ ހާދިސާގައި ޒަޚަމުވި އެއް ކުއްޖަކަށް ހޮސްޕިޓަލްގައި ފަރުވާދެމުން އަންނަ ކަމަށް ވެސް ސީސީޓީވީން ބުނެއެވެ.
ސްކޫލްގެ ވަށައިގެން ފުލުހުން ވަނީ ކޯޑަން ޖަހާފައެވެ. އަލިފާން ރޯވި ސަރަހައްދުގައި ގާތްގަޑަކަށް 30 ކުދިން ތިއްބެވެ.
ހުކުރު ދުވަހު ހެނދުނު ހިނގި އެ ހާދިސާއާ ގުޅިގެން އެ ތަނުގެ މެނޭޖަރު ވަނީ ހައްޔަރުކޮށްފައެވެ.
ސްކޫލްގައި ރޯވާން ދިމާވި ސަބަބެއް އަދި ސާފެއްނުވެއެވެ. ނަމަވެސް ޗައިނާގެ ކަމާ ބެހޭ ފަރާތްތަކުން އަންނަނީ އެކަން ތަހުގީގުކުރަމުންނެވެ.
ޗައިނާގެ ވެރިރަށް ބެއިޖިންގައި މިދިޔަ އޭޕްރީލް މަހު ވެސް ވަނީ ނުރައްކާތެރި އަލިފާނުގެ ހާދިސާއެއް ހިނގައިފައެވެ. އެ ހާދިސާގައި 29 މީހުން ވަނީ މަރުވެފައެވެ.