22 Jan 2024, 07:02
އޮކްޓޫބަރު ހަތްވަނަ ދުވަހު އިސްރާއީލު ފައުޖުތަކުން ޣައްޒާގައި ފެށި ހަނގުރާމައަށް ތިން މަހަށްވުރެ ގިނަ ދުވަސް ފާއިތުވެގެން ގޮސްފައިވާއިރު، އެ ހަނގުރާމައިގެ ޝަހީދުކޮށްލައިފައިވާ މީހުންގެ އަދަދު 25،000 އަށްވުރެ އިތުރުވެއްޖެއެވެ.
ފަލަސްތީނުގެ ސިއްހީ ވުޒާރާއިން ހާމަކޮށްފައިވާ ގޮތުގައި ފާއިތުވި 24 ގަޑިއިރުގެ ތެރޭގައި 170 އަށްވުރެ ގިނަ މީހުން ވަނީ އިސްރާއީލުގެ ހަމަލާތަކުގައި ޝަހީދުކޮށްލައި 300 އަށްވުރެ ގިނަ މީހުން ވަނީ ޒަޚަމުކޮށްލައިފައެވެ. އެއާއެކު މިހާތަނަށް ޣައްޒާއިން ޝަހީދުކޮށްލި މީހުންގެ އަދަދު ވަނީ 25،105 އަށް އުފުލިފައެވެ. ހަމަލާތަކުގައި ޒަޚަމުވީ މީހުންގެ އަދަދު 62،681 ވަނީ އަރައިފައެވެ.
އިސްރާއީލުގެ ޢުދުވާނީ ހަމަލާތަކުގައި މިހާތަނަށް ޝަހީދުކޮށްލައިފައިވާ މީހުންގެ ތެރޭގައި ގިނައީ އަންހެނުންނާއި ކުޑަކުދިންނެވެ.
ހަމަލާތަކުގެ ސަބަބުން މީހުންގެ ފުރާނަ ގެއްލުމުގެ އިތުރުން އެތައް ބަޔަކަށް ވަނީ އެ މީހުންގެ އަމިއްލަ ގެދޮރު ދޫކޮށް ދިއުމަށް މަޖޫބޫރުވެފައެވެ. އެގޮތުން 2.3 މިލިއަން މީހުންގެ އާބާދީއެއް އޮންނަ ޣައްޒާގެ 85 އިންސައްތަ މީހުން ނުވަތަ 1.9 މިލިއަން މީހުންނަށް ވަނީ އެ މީހުންގެ އަމިއްލަ ގެދޮރު ދޫކޮށް ދިއުމަށް މަޖުބޫރުވެފައެވެ.
އޮކްޓޫބަރު ހަތްވަނަ ދުވަހު ޣައްޒާގެ ވެރިކަންކުރާ ހަމާސް ޖަމާއަތުން އިސްރާއީލަށް ހަމަލާ ދިނުމުން ރައްދުގައި ހަމާސްއަށް ހަމަލާދެނީ ކަމަށް ބުނެ އިސްރާއީލުގެ ހަމަލާތައް އަމާޒުކޮށްފައި ވަނީ ޣައްޒާގެ އާންމުންނަށެވެ.
ހަމާސްއިން އިސްރާއީލަށް ހަމަލާދިނީ ފަލަސްތީނު މުސްލިމުންނާ ދެކޮޅަށް އިސްރާއީލުން ހިންގަމުންދިޔަ ލާއިންސާނީ އަމަލުތަކަށް ކެތްނުކުރެވިގެންނެވެ.
އިސްރާއީލުން ޣައްޒާގައި ހިންގަމުންދާ ޖަރީމާތައް ހުއްޓުމަކަށް ގެނެސް މިހާރުން މިހާރަށް ހަނގުރާމަ ހުއްޓައިލުމަށް މުޅި ދުނިޔެއިން ގޮވައިލަމުން އައި ނަމަވެސް ހަމާސްގެ މައްޗަށް ކުރި ނުހޯދެނީސް ހަނގުރާމަ ހުއްޓައިނުލާނެ ކަމަށް އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫ އަންނަނީ ބުނަމުންނެވެ.