22 Jan 2024, 06:43
ސައުތު ސިނަމާގެ ކާމިޔާބު ފިލްމީ ތަރި ރަޝްމިކާ މަންދަންނާގެ ޑީޕްފޭކް ވީޑިއޯއެއް އޭއައި މެދުވެރިކޮށް އުފައްދާ ވައިރަލް ކުރި މައްސަލައިގައި ތުހުމަތުކުރެވޭ މީހުން ނިއު ދިއްލީ ފުލުހުން ހައްޔަރުކޮށްފިއެވެ.
މި މައްސަލައިގައި ތުހުމަތު ކުރެވޭ ބަޔަކު މިދިޔަ އާދީއްތަ ދުވަހު ފުލުހުންގެ ބެލުމުގެ ދަށަށް ގެނައިކަން އިއުލާނު ކުރުމާ ގުޅިގެން ރަޝްމިކާ ވަނީ ދިއްލީގެ ފުހުންގެ ޓީމަށް ވަރަށް ހާއްސަ ޝުކުރެއް ރައްދު ކޮށްފައެވެ.
ދާދި ފަހުން ބޮލީވުޑަށް ތަޢާރަފުވެފައިވާ "ޕުޝްޕާ"ގެ ބަތަލާގެ ޑީޕް ފޭކް ވީޑިއޯތަކެއް އިންޓަނެޓުގައި ދައުރުވާން ފެށީ މިދިޔަ އަހަރުގެ ނޮވެމްބަރު މަހު ތެރޭގައެވެ. އޭއައި މެދުވެރިކޮށް ބަޔަކު މީހުން އުފެއްދި މި ވީޑީއޯއާ ގުޅިގެން ރަޝްމިކާ ވަނީ އެކަމާ ކަންބޮޑުވާކަން ފާޅުކޮށް ފިލްމީ ތަރިންގެ އިއްޒަތަށް އަރައިގަނެ އަބުރު ކަތިލުމުގެ ހައްޤު އެއްވެސް މީހަކަށް ލިބިގެންނުވާ ކަމަށް ބުނެފައެވެ.
ދިއްލީ ފުލުހުން، ބަޔަކު ހައްޔަރުކުރިކަން އިއުލާނުކޮށްފައިވަނީ އެފަދަ ސައިބާ ކްރައިމް އަމަލުތަކާ ދެކޮޅަށް އެކަށީގެންވާ ފިޔަވަޅު އެޅުމަށް ބަތަލާ ގޮވައިލިތާ މާ ގިނަ ދުވަހެއް ނުވަނީހެވެ. ރަޝްމިކާގެ ޑީޕްފޭކް ވީޑިއޯއާ ގުޅިގެން ފިލްމު އިންޑަސްޓްރީގެ ގިނަ ބަޔަކު ވަނީ އޭރު ކަންބޮޑުވުން ފާޅުކޮށްފައެވެ.
ބަތަލާ ރަޝްމިކާގެ ބޮލީވުޑް ފިލްމު "ގުޑްބާއި"ގެ ޕޯސްޓަރެއް -- ފޮޓޯ/ދަ ޓެލެގްރާފްއިންޑިއާ
ދިއްލީގެ ފުލުހުންނަށް ޝުކުރު އަދާކުރަމުން "އެނިމަލް"ގެ ބަތަލާއަށް ތާއީދު ކުރާ ފަރާތްތަކަށް ދިން ހާއްސަ މެސެޖުގައި ބުނެފައި ވަނީ، ސައިބާ ކްރައިމްގެ ޝިކާރައަކަށް ވެފައިވާނަމަ އެކަމާ ދެކޮޅަށް ފިޔަވަޅު އެޅުމަށެވެ.
މީގެ ދެ މަހެއްހާ ދުވަސް ކުރިން ރަޝްމިކާ ލިފްޓަކަށް ވަންނަ މަންޒަރު ދައްކުވައިދިން ވީޑިއޯ އަކީ، ހަގީގަތުގައި އިންޑިއާ-އިނގިރޭސި އިންފުލުއެންސަރެއް ކަމަށްވާ ޒާރާ ޕަޓޭލްގެ ވީޑިއޯއެކެވެ.