22 Jan 2024, 00:29
ފޮރިން މިނިސްޓަރު މޫސާ ޒަމީރުގެ ދައުވަތަކަށް، ޗައިނާގެ ވެރިކަން ކުރާ ކޮމިއުނިސްޓް ޕާޓީގެ އިންޓަނޭޝަނަލް ޑިޕާޓްމަންޓްގެ ނައިބު ވަޒީރު ސަން ހައިޔަން މިއަދު ރާއްޖެ ވަޑައިގެންފިއެވެ.
ވެލާނާ އިންޓަނޭޝަނަލް އެއާޕޯޓުން އޭނާއަށް މަރުހަބާ ވިދާޅުވީ ފޮރިން މިނިސްޓްރީގެ ސްޓޭޓް މިނިސްޓަރު ޝެރީނާ އަބްދުއް ސަމަދެވެ.
އަންނަ އަންގާރަ ދުވަހާ ހަމައަށް ސަން ހަޔަން ކުރައްވާ މި ދަތުރުފުޅަކީ، މިމަހުގެ އަށްވަނަ ދުވަހު ސަރުކާރުގެ އިސްވެރިން ޗައިނާއަށް ކުރެއްވި ދަތުރުފުޅުގައި މިނިސްޓަރު ޒަމީރު ދެއްވި ދައުވަތަކާ ގުޅިގެން ކުރައްވާ ދަތުރުފުޅެކެވެ.
މި ދަތުރުފުޅުގައި އޭނާ ރައީސުލްޖުމްހޫރިއްޔާ، ޑރ. މުހައްމަދު މުއިއްޒާ ބައްދަލު ކުރައްވާނެއެވެ. އަދި މަޖިލީހުގެ ރައީސް މުހައްމަދު އަސްލަމާއި މިނިސްޓަރު ޒަމީރާ ވެސް ބައްދަލު ކުރައްވަން ވަނީ ނިންމަވައިފައެވެ.
މީގެ އިތުރުން، މާދަމާ އދ. މަހިބަދޫގައި ބާއްވާ ހިލޭ އެހީ ހަދިޔާ ކުރުމުގެ ރަސްމިއްޔާތެއްގައި ވެސް ސަން ހައިޔަން ބައިވެރިވެ ވަޑައިގަންނަވާނެއެވެ.
މި ސަރުކާރުން ޗައިނާއާއެކު ދަނީ ގާތް ގުޅުމެއް ބަދަހި ކުރަމުންނެވެ. އަދި ރައީސް ދާދި ފަހުން ޗައިނާއަށް ކުރެއްވި ދަތުރުފުޅުގައި ދެ ގައުމުން ގިނަ ކަންތައްތަކާ ގުޅޭ ގޮތުން މަޝްވަރާކޮށް، ޗައިނާއިން ވަނީ 130 މިލިއަން ޑޮލަރުގެ ހިލޭ އެހީ ރާއްޖެއަށް ދޭން ނިންމައިފައެވެ.