22 Jan 2024, 19:01
އިނގިރޭސިވިލާތުގައި އިންޓަނެޓްގެ ޚިދުމަތްތައް ފުޅާކުރުމަށް ގޫގުލްއިން އެގައުމުގައި އާ ޑޭޓާސެންޓަރެއް ގާއިމު ކުރުމަށް އެއް ބިލިއަން ޑޮލަރު އިންވެސްޓްކުރަން ނިންމައިފިއެވެ.
އިނގިރޭސިވިލާތުގައި އިންޓަނެޓްގެ ޚިދުމަތަށް އޮތް ޑިމާންޑު ފޫބެއްދުމަށް ގޫގުލްއިން ކުރަމުންދާ މަސައްކަތުގެ ދަށުން އާ ޑޭޓާ ސެންޓަރު ގާއިމުކުރަން ނިންމާފައިވަނީ 2020 ވަނަ އަހަރު ގޫގުލް އިން ހޯދި، ލަންޑަންގެ އުތުރުގައި އޮންނަ ވޯލްތަމް ކްރޮސްގައި ކަމަށާއި، އެތަން އެޅުމުގެ މަސައްކަތް މިހާރު ވެސް އަންނަނީ ކުރަމުން ކަމަށް އެކުންފުނިން ވަނީ ބުނެފައެވެ.
ގޫގުލްއިން ނެރުނު ބަޔާނެއްގައި ބުނީ 33 އޭކަރުގެ ބިމުގައި އަޅާ އެ ސެންޓަރުގެ ސަބަބުން އެ ސަރަހައްދުގައި ދިރިއުޅޭ މީހުންނަށް އިމާރާތް ކުރުމުގެ ދާއިރާއިންނާއި ފަންނީ ދާއިރާތަކުން ވަޒީފާ ލިބޭނެ ކަމަށެވެ.
"މި އިންވެސްޓްމަންޓް ނިމުމުން، އިނގިރޭސިވިލާތުގެ އެކި ކަންކޮޅުތަކުގައި ވިޔަފާރިތަކަށް މުހިންމު ކޮމްޕިއުޓް ކެޕޭސިޓީއެއް ގެނެސް، އޭއައި އިނޮވޭޝަނަށް ސަޕޯޓް ލިބި، އިނގިރޭސިވިލާތާއި އެނޫން ގައުމުތަކުގައި ތިބި ގޫގުލް ކްލައުޑް ކަސްޓަމަރުންނާއި ގޫގުލް ބޭނުންކުރާ ފަރާތްތަކަށް އިތުބާރު ހިފޭ ޑިޖިޓަލް ޚިދުމަތްތައް ކަށަވަރުކުރުމަށް މަގުފަހިވެގެންދާނެ،" އެ ކުންފުނިން ބުންޏެވެ.
އިނގިރޭސި ބޮޑުވަޒީރު ރިޝީ ސުނަކް ކުރެއްވި ޓުވީޓެއްގައި ވިދާޅުވީ ގޫގުލްގެ އިންވެސްޓްމަންޓާއެކު، ޔޫރަޕްގެ ޓެކް މާހައުލުގައި އިނގިރޭސިވިލާތް އޮތް ދަރަަޖައާ މެދު ފަހުރުވެރިވާ ކަމަށެވެ.
"މިއީ ޔޫރަޕްގެ އެންމެ ބޮޑު ޓެކް އިގްތިސާދުގެ ގޮތުގައި އިނގިރޭސިވިލާތް ދެމިއޮތުމަށް ލިބޭ ވަރަށް ބާރެއް، މިކަމުގެ ސަބަބުން ރަނގަޅު ވަޒީފާތަކާއި އިނގިރޭސި ވިޔަފާރިތަކަށް އެހީތެރިވުމަށް ބޭނުންވާ އިންފްރާސްޓްރަކްޗާ ގާއިމުވެގެންދާނެ،" އޭނާ ވިދާޅުވިއެވެ.
މި އިންވެސްޓްމަންޓަކީ ލައިޓްނިން-ފާސްޓް އިންޓަނެޓްގެ ބޮޑު ޑިމާންޑު ފުއްދުމުގެ ގާބިލްކަން ލިބިފައިވާ ޑިޖިޓަލް އިންފްރާސްޓްރަކްޗާއެއް ބިނާކުރުމަށް އިނގިރޭސިވިލާތުގެ ސަރުކާރުން ވެފައިވާ ވައުދާ އެއްގޮތްވާ އިންވެސްޓްމަންޓެކެވެ.
މީގެ ދެ އަހަރު ކުރިން އިނގިރޭސިވިލާތުން ޑިޖިޓަލް އިންފްރާސްޓްރަކްޗާ ރަނގަޅު ކުރުމަށް ކުރިއެރުންތަކެއް ހޯދިއިރު އެގައުމުގައިވަނީ ސުޕަފާސްޓް ބްރޯޑްބޭންޑް ކަވަރޭޖް އެގައުމުގެ 97 ޕަސެންޓަށް އިތުރުވެފައެވެ.
އިނގިރޭސިވިލާތުގައި ގޫގުލްއަށް 7،000އަށް ވުރެ ގިނަ މީހުން ވަޒީފާ އަދާކުރާ މިއީ އެ ކުންފުނިން އެގައުމުގައި އިންވެސްޓްކުރި ފުރަތަމަ ފަހަރެއް ނޫނެވެ.
ދެހާސް ބާވީސް ވަނަ އަހަރުވެސް އެ ކުންފުނިން ވަނީ ސެންޓްރަލް ލަންޑަންގެ އެއް ސައިޓަށް ވުރެ ގިނަ ސައިޓް ގަނެފައެވެ. އޭގެ ތެރޭގައި ކޮވެންޓް ގާޑަންގެ އިމާރާތަކާއި، ގޫގުލް އިން އާ އޮފީހެއް ހަދަމުން އަންނަ އަދި އެ ކުންފުނީގެ އޭއައި ކުންފުންޏެއް ކަމަށްވާ ޑީޕްމައިންޑް ވެސް ހުންނަ ތަނާއި ކައިރި ކިންގްސް ކްރޮސްގެ އެހެން ސައިޓެއްވެސް ހިމެނެއެވެ.
ގޫގުލްއަކީ ވާދަވެރި އެހެން ކުންފުނިތަކަށް ވުރެ ކުރީގައި އަބަދުވެސް އޮތުމަށް މަސައްކަތްކުރާ، ދުރުވިސްނުން ގެންގުޅޭ ފުދުންތެރި ގާބިލް ކުންފުންޏެކެވެ.