21 Jan 2024, 23:38
ވޯޓުލާން ވަންނައިރު ފޯނާއެކު ވަންނަން ބޭނުންވާ ނަމަ، ފޯނު ނިއްވާލައިގެން ވެއްދުން ހުއްދަކުރަން މަޝްވަރާތަކެއް ކުރާނެކަމަށް އިލެކްޝަންސް ކޮމިޝަން (އީސީ)ގެ ރައީސް ފުއާދު ތައުފީގް މިރޭ ވިދާޅުވެއްޖެއެވެ.
އެސްއެސްޓީވީގެ "އަދުގެ ޞަފްހާ" ޕްރޮގްރާމުގައި ވާހަކަ ދައްކަވަމުން ފުއާދު ވިދާޅުވީ، ވޯޓުލާން ދާއިރު މަރުކަޒަށް ފޯނު ނުވެއްދޭ ގަވާއިދަކީ އާންމުންނަށް ވަރަށް އުނގަދޫވާ ގަވާއިދެއް ކަމަށެވެ. އެ ގަވާއިދު ހަދާފައި އޮންނަނީ ފޯނަކުން ވޯޓުގެ ފޮޓޯއާއި ވީޑީއޯ ނެގުން ހުއްޓުވުމަށްކަން އިޝާރާތް ކުރައްވައި އޭނާ ވިދާޅުވީ، ނިއްވާލާފައި އޮންނަ ފޯނަކުން އެފަދަ ކަމެއް ނުކުރެވޭނެ ކަމަށެވެ.
އެހެންވެ، ފޯނު ނިއްވާލުމަށް ފަހު ވޯޓުލާ މަރުކަޒަށް ވެއްދުމާ ގުޅޭގޮތުން ގަނޫނީ ލަފާ ހޯދިދާނެ ކަމަށް އޭނާ ވިދާޅުވިއެވެ.
އޭނާ ވިދާޅުވީ، ވޯޓުލާން މީހުން ގެންދާ ފޯނުތައް ބަލަހައްޓަން ވެސް އޮފިޝަލުން ތިބެން ޖެހޭއިރު، ވޯޓުލާ މަރުކަޒަށް ބޭނުންވާ އޮފިޝަލުން ހޯދުމަކީ ވަރަށް އުނދަގޫ ކަމެއް ކަމަށެވެ.
"އޭގެ އިތުރަށް ކޮންމެ ވޯޓު ފޮށްޓެއް ކައިރީގައި ފޯނު ބަލަހައްޓަން އިތުރަށް އޮފިޝަލަކު ބަހައްޓަން ވެއްޖެއްޔާ އަނެއްކާ ވެސް އިތުރު ކަމެއް އެއައީ. އިތުރު މަސައްކަތްތަކެއް ރާވަން ޖެހޭނެ،" ފުއާދު ވިދާޅުވިއެވެ.
އޭނާ ވިދާޅުވީ، ވޯޓުލާ މަރުކަޒުން ފޯނާ ހަވާލުވާ ނަމަވެސް، ރައްކަތެރިކަމާ އެކު އެ ބަލަހައްޓަން ސިޓީ އުރައަކަށްލާ، އެ ސިޓީ އުރައަށް ނަމްބަރެއް ދީ އަދި އެ ނަމްބަރު ވޯޓުލާ މީހާއަށް ބުނެދިނުން ފަދަ މަަސއްކަތްތަކެއް ކުރަން ޖެހޭނެކަމަށެވެ. އެހެންކަމުން އީސީއަށް ވެސް އެންމެ ލުއިވާނެ ގޮތަށް އަދި ވޯޓުލާ މީހުންނަށް ވެސް އެންމެ ހިތްހަމަ ޖެހޭނެ ގޮތަކަށް މިކަން ވޭތޯ މަސައްކަތް ކުރާނެކަމަށް އޭނާ ވިދާޅުވިއެވެ.
"އެހެންވީމައި ތިކަމާ ގުޅޭގޮތުން [ފޯނު ނިއްވާލައިގެން ވޯޓުލާ މަރުކަޒަށް ވެއްދުން] އަޅުގަނޑުމެން އިލެންޝަންސް ކޮމިޝަންގައި މަޝްވަރާ ކޮށްފައި ހަމަ ބަދަލެއް ގެނެވެން އޮވެއްޖެއްޔާ އެ ބަދަލެއް ގެންނާނަން،" ފުއާދު ވިދާޅުވިއެވެ.
އިންތިޚާބުތަކާ ބެހޭ ގާނޫނުގައި މިހާރު އޮންނަ ގޮތުން އިންތިޚާބުގެ މަރުކަޒަށް ފޯނު ވެއްދޭނީ ހަމައެކަނި މޮނީޓަރުންނާއި އިލެކްޝަންސް ކޮމިޝަނުގެ އޮފިޝަލުންނަށެވެ. އޮބްޒާވަރުންނަށް ވެސް ފޯނު ވެއްދުމުގެ ފުރުސަތެއް ނޯވެއެވެ.
މިކަމުގެ ޝަކުވާ ނިމިދިޔަ ރިޔާސީ އިންތިޚާބުގައި ވެސް ވަރަށް ބޮޑުވިއެވެ. އާންމުންގެ ގިނަ ބަޔަކު ބުނާގޮތުގައި ގެއިން ބޭރަށް ފޯނާ ނުލައި ދިއުމަކީ ވަރަށް އުނދަގޫ ކަމެކެވެ. އަދި މަރުކަޒުގެ ބޭރުގައި ފޯނު ބޭއްވުމަކީ އެންމެ ރައްކާތެރި ގޮތެއް ވެސް ނޫން ކަމަށް އެ މީހުން ބުނެއެވެ.
އަންނަ މާޗު މަހުގެ 17ގައި ބާއްވަން ތާވަލުކޮށްފައިވާ ރައްޔިތުންގެ މަޖިލީހުގެ އިންތިޚާބަށް އީސީން ވަމުން އަންނަ ތައްޔާރީތަކުގެ ތެރެއިން, ވޯޓުލުމަށް ރަޖިސްޓްރީ ވުމުގެ ފުރުސަތު މިއަދުވަނީ ހުޅުވާލައިފައެވެ.