22 Jan 2024, 00:40
ފްރެންޗް ކޫޕް ޑި ފްރާންސް ފުޓްބޯޅަ މުބާރާތުގެ ފަހު 16 ޓީމްގެ ބުރުން ޕެރިސް ސެއިންޓް ޖާމެއިން ޖާގަ ހޯދައިފިއެވެ.
މިމުބަރާތުގެ ފަހު 16 ޓީމްގެ ތެރެއިން ޕީއެސްޖީ ޖާގަހޯދީ ފަރަންސޭސި ތިންވަނަ ޑިވިޝަނަށް ނިސްބަތްވާ އޯލިއަންސްއާ ބައްދަލުކުރި މެޗު ހަތަރު ލަނޑު އެއްލަނޑުން ކާމިޔަބު ކޮށްގެންނެވެ.
ޕީއެސްޖީގެ ފަރާތުން މޮޅު ކުޅުމެއް ފެނުނު އެ މެޗުގައި އެޓީމްގެ އެންމެ މުހިންމު ކުޅުންތެރިޔާ ކަމަށްވާ ކިލިއަން އެމްބާޕޭ ވަނީ މުހިންމު ދައުރެއް އަދާކޮށްފައެވެ. މިގޮތުން މިމެޗުގައި ޕީއެސްޖީއިން ޖެހި ހަތަރު ލަނޑުގައިވެސް އޭނާގެ ހިއްސާ އޮތެވެ.
މިމެޗުގެ ފުރަތަމަ ލަނޑު މެޗުގެ 16 ވަނަ މިނެޓްގައި ޖަހައި ޕީއެސްޖީއަށް ލީޑު ނަގައިދިނީ އެމްބާޕޭއެވެ. އަދި މިމެޗުގައި ޕީއެސްޖީގެ ދެވަނަ ލަނޑު މެޗުގެ 63 ވަނަ މިނެޓްގައި ލިބުނު ޕެނަލްޓީއަކުން ކާމިޔާބު ކޮށްދިނީވެސް އެމްބާޕޭއެވެ. މިއާއެކު މިސީޒަންގައި އޭނާ ކުޅުނު 26 މެޗުގައި މިވަނީ 28 ލަނޑު ކާމިޔާބު ކޮށްދީފައެވެ.
މިމެޗުގައި ޕީއެސްޖީގެ ތިންވަނަ ލަނޑު އެމްބާޕޭ ތަނަވަސްކޮށްދިން ފުރުސަތެއްގައި ޖަހައިދިނީ ގޮންކާލޯ ރާމޯސްއެވެ. މިމެޗުގައި އޯލިއަންސް އިން ކާމިޔާބު ކުރި ހަމައެކަނި ލަނޑު މެޗުގެ 86 ވަަނަ މިނެޓްގައި އެޓީމަށް ކާމިޔާބު ކޮށްދިނީ ނިކޮލާ ސެއިންޓް ރުފްއެވެ. މިމެޗުގައި ޕީއެސްޖީގެ ފަހު ލަނޑު މެޗުގެ 88 ވަނަ މިނެޓްގައި ޒުވާން ކުޅުންތެރިޔާ ސެނީ މަޔޫލޫ ޖަހާފައިވަނީވެސް އެމްބާޕޭ ތަނަވަސްކޮށްދިން ފުރުސަތަކުންނެވެ.
މިމުބާރާތުގައި ނީސް އާއި ބޯޑޯ ބައްދަލުކުރި މެޗު ތިން ލަނޑު ދެ ލަނޑުން ކާމިޔާބުކޮށް ނީސްއިންވެސްވަނީ މިމުބާރާތުގެ ފަހު 16 ޓީމްގެ ތެރެއިން ޖާގަހޯދައިފައެވެ. އަދި މޮނާކޯ އާއި ރޮޑޭޒް ބައްދަލުކުރި މެޗު ތިން ލަނޑު އެއްލަނޑުން ކާމިޔާބުކޮށް މޮނާކޯވެސް ވަނީ 16 ޓީމްގެ ތެރޭގައި ހިމެނިފައެވެ.