21 Jan 2024, 20:43
އިޓާލިއަން ސެރީއާގައި އޭސީ މިލާން އާއި އުދިނޭސީ ބައްދަލުކުރި މެޗު މިލާންއިން ކާމިޔާބު ކޮށްފިއެވެ.
އުދިނޭސީގެ ދަނޑުގައި ކުޅުނު މިމެޗު މިލާންއިން ކާމިޔާބު ކޮށްފައިވަނީ ތިން ލަނޑު ދެ ލަނޑުންނެވެ. ދެޓީމްގެ ފަރާތުން ވާދަވެރި ކުޅުމެއް ފެނުނު އެ މެޗުގައި މިލާންގެ ފަރަންސޭސި ކީޕާ މައިކް މައިގްނަންއާ ދިމާލަށް އުދިނޭސީގެ ސަޕޯޓަރުން ނަސްލީގޮތުން ދިމާކުރުމާ ގުޅިގެން މައިގްނަން އާއި އެޓީމްގެ އެހެން ކުޅުންތެރިން ދަނޑުން ފައިބައިގެން ދިޔައެވެ. މިކަމާ ގުޅިގެން މެޗު 10 މިނެޓަށް ސަސްޕެންޑް ކުރިއެވެ.
އެ ހާދިސާ ހިނގާފައިވަނީ މިލާންއިން މިމެޗުގެ ފުރަތަމަ ލަނޑު ޖަހައި ލީޑު ނެގިތާ ކުޑައިރުކޮޅެއް ފަހުންނެވެ. މިލާންއިން ކާމިޔާބު ކުރި ފުރަތަމަ ލަނޑު އެޓީމަށް މެޗުގެ 31 ވަނަ މިނެޓްގައި ޖަހައިދިނީ ރުބެން ލޮފްޓަސް ޗީކްއެވެ. މައިގްނަންއަށް މިހާދިސާ ދިމާވުމާއެކު އޭނާ ދަނޑުން ފައިބާފައިވަނީ ރެފްރީގެ ސަމާލުކަމަށް އެކަން ގެނައުމަށްފަހުއެވެ. ނަމަވެސް މިލާންގެ ކުޅުންތެރިންވަނީ އޭގެ 10 މިނެޓްފަހުން އެނބުރި ދަނޑަށް ނިކުމެ މެޗު ފުރިހަމަ ކޮށްފައެވެ.
މިހާދިސާ ހިނގުމާއެކު މިލާން އިން ވަނީ މިކުޅިވަރުގައި ނަސްލީ ތަފާތު ކުރުންތަކަށް އެއްވެސް ޖާގައެއް ނެތް ކަމަށާއި މިލާން ތިބީ މައިގްނަންގެ ފަހަތުގައިކަން ހާމަކޮށް އެކްސްގައި ޖަހާފައެވެ. އަދި މިއާއެކު މިލާންގެ ވާދަވެރި އަދި މިވަގުތު ލީގުގެ އެއްވަނައިގައި އޮތް އިންޓާ މިލާންއިންވަނީ އިންޓާއިން މިލާން އާއެކު މިކަމުގައި ތިބިކަން ހާމަކޮށް އެކްސްގައި ޕޯސްޓެއް ހިއްސާކޮށްފައެވެ.
މިމެޗުގެ ކުޅުން އަލުން ފަށައިގެން އުދިނޭސީއިން ވަނީ މެޗުގެ 41 ވަނަ މިނެޓްގައި މެޗުގެ ނަތީޖާ ހަމަހަމަ ކޮށްފައެވެ. މިލަނޑު އެޓީމަށް ޖަހައިދިނީ ލަޒާ ސަމަޑްޒިޗްއެވެ. އަދި މެޗުގެ 62 ވަނަ މިނެޓްގައި ފްލޯރިއަން ތައުވިން ޖަހާދިން ލަނޑުން އުދިނޭސީއިން ވަނީ މެޗުގެ ލީޑުވެސް ނަގާފައެވެ. މިމެޗުގެ ނަތީޖާ މިލާންއަށް ހަމަހަމަ ކޮށްދިނީ 83 ވަނަ މިނެޓްގައި ބަދަލު ކުޅުންތެރިޔާ ލޫކާ ޔޮވިޗްއެވެ. އަދި މިމެޗުން މިލާން މޮޅުވި ލަނޑު މެޗުގެ އިތުރު ވަގުތުގެ ތިންވަނަ މިނެޓްގައި ޖަހައިދިނީ ނޯއާ އޮކާފޯއެވެ.
މިކާމީޔާބީއާއެކު މިލާން މިހާރު އުޅެނީ ކުޅުނު 21 މެޗުން ލިބިފައިވާ 45 ޕޮއިންޓާއެކު ތާވަލްގެ ތިންވަނައިގައެވެ. އަދި އުދިނޭސީ އުޅެނީ 18 ޕޮއިންޓާއެކު ތާވަލްގެ 17 ވަނައިގައެވެ.