21 Jan 2024, 16:47
ފުވައްމުލަކުގައި އެކްސިޑެންޓުވުމުން ރޭ ދަންވަރުގެ ވަގުތެއްގައި މާލެ ގެނައި މީހާގެ ހާލު ވަރަށް ސީރިއަސް ކަމަށް އައިޖީއެމްއެޗްއިން މިއަދު ބުނެފިއެވެ.
އައިޖީއެމްއެޗްގެ މީޑިއާ އޮފިޝަލަކު "ސަން"އަށް ވިދާޅުވީ އެ މީހާ އޮތީ މިހާރު ވެންޓިލޭޓަރުގައި ކަމަށެވެ.
އެ އެކްސިޑެންޓު ހިނގާފައިވަނީ ފުވައްމުލައް ސިޓީގައި، ބާރު ސްޕީޑުގައި ދުއްވާފައި ދިޔަ ސައިކަލެއް ކޮންޓްރޯލް ނުވެ ގޮސް ފާރެއްގައި ޖެހިގެންނެވެ.
އެ އެކްސިޑެންޓުގެ މައުލޫމާތު ހިއްސާކުރަމުން ފުލުހުން ބުނީ، އެކްސިޑެންޓް ހިނގީ އެ ސިޓީގެ ބޮޑުފަންނު މަގުގައި ރޭ 22:15 ހާއިރު ކަމަށެވެ.
މި އެކްސިޑެންޓުގައިި އަނިޔާވެފައިވަނީ 30 އަހަރުގެ ދިވެހި ފިރިހެނަކަށެވެ.
އޭނާއަށް ފުވައްމުލަކު ހޮސްޕިޓަލުގައި ފަރުވާ ދިނުމަށްފަހު އިތުރު ފަރުވާއަށް ރޭ ދަންވަރު ވަނީ މާލެ ގެނެސްފައެވެ.
މި އެކްސިޑެންޓްގެ މައްސަަލަ ފުލުހުން މިހާރު ދަނީ ތަހުގީގު ކުރަމުންނެވެ.
މީގެކުރިން ވެސް ފުވައްމުލަކުގައި ނުރައްކާތެރި އެކްސިޑެންޓުތައް ހިނގައި މީހުންގެ ފުރާނައަށް ނުރައްކާވެފައި ވެސް އެބަހުއްޓެވެ.
އެކްސިޑެންޓުތައް އެންމެ އާންމު ރަށްރަށުގެ ތެރޭގައި އެ ސިޓީ ހިމެނެއެވެ.