21 Jan 2024, 13:54
ދިވެހިރާއްޖޭގެ އިސްތިގުލާލު ދަމަހައްޓައި، އަމާންކަން ދެމެހެއްޓުމުގައި އެހީވާނެކަމުގެ ޔަގީންކަން އެމެރިކާގެ އިންޑޯ ޕެސިފިކް ކޮމާންޑުގެ ކޮމާންޑަރު އެޑްމިރަލް ޖޯން އެކުއިލިނޯ، ރައީސް ޑރ. މުހައްމަދު މުއިއްޒަށް މިއަދު އަރުއްވައިފިއެވެ.
ރައީސް މުއިއްޒާއި ޖޯން ބައްދަލުކުރެއްވީ މިއަދު ރައީސް އޮފީހުގައެވެ.
މި ބައްދަލުވުމުގައި، އެމެރިކާގެ އިންޑޯ ޕެސިފިކް ކޮމާންޑްގެ ކޮމާންޑަރު ވަނީ ރައީސް މުއިއްޒު ވެރިކަމާ ހަވާލުވެ ވަޑައިގަތުމުން މަރުހަބާ ވިދާޅުވެ، ރާއްްޖެއާއި އެމެރިކާއާ ދެމެދު އޮތް ޒަމާންވީ ގުޅުމާ ބެހޭ ގޮތުން ވާހަކަފުޅު ދައްކަވައިފައެވެ.
އަދި، ރައީސް މުއިއްޒު ވަނީ މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)ގެ މުވައްޒަފުންނަށް ތަމުރީނު ފުރުޞަތުތައް ފަހިކޮށްދީ، ރާއްޖެއަށް އެހީތެރިވެދިން ކަމަށްޓަކައި އެމެރިކާއަށް ޝުކުރު އަދާކުރައްވައިފައެވެ.
އެމެރިކާގެ ކޮމާންޑަރު ވަނީ ޑިފެންސް ފޯސްގައި ކެޕޭސިޓީ ބިލްޑިން ހަރުދަނާކުރުމަށް ފުރިހަމަ އެހީތެރިކަމެއް ދެއްވާނެކަން ތަކުރާރު ކުރައްވައިފައެވެ. އަދި، ރާއްޖޭގެ އިސްތިގުލާލު ދަމަހައްޓައިގެން ސުލްހައާއި އަމާންކަން ދެމެހެއްޓުމުގައި ރާއްޖެއަށް އެހީވާނެކަން ކަށަވަރުކޮށްދެއްވިއެވެ.