21 Jan 2024, 10:54
ފުވައްމުލައް ސިޓީގައި، ބާރު ސްޕީޑްގައި ދުއްވާފައި ދިޔަ ސައިކަލެއް ކޮންޓްރޯލް ނުވެ ގޮސް ފާރެއްގައި ޖެހި, ރޭ ހިނގި ނުރައްކާތެރި އެކްސިޑެންޓެއްގައި އަނިޔާވި މީހަކު އިތުރު ފަރުވާއަށް މާލެ ގެނެސްފިއެވެ.
އެ އެކްސިޑެންޓުގެ މައުލޫމާތު ހިއްސާކުރަމުން ފުލުހުން ބުނީ، އެކްސިޑެންޓް ހިނގީ އެ ސިޓީގެ ބޮޑުފަންނު މަގުގައި ރޭ 22:15 ހާއިރު ކަމަށެވެ.
މި އެކްސިޑެންޓުގައިި އަނިޔާވެފައިވަނީ 30 އަހަރުގެ ދިވެހި ފިރިހެނަކަށެވެ.
އޭނާއަށް ފުވައްމުލަކު ހޮސްޕިޓަލުގައި ފަރުވާ ދިނުމަށްފަހު އިތުރު ފަރުވާއަށް ރޭ ދަންވަރު ވަނީ މާލެ ގެނެސްފައެވެ.
އެ އެކްސިޑެންޓް ހިނގީ ބާރު ސްޕީޑުގައި ދުއްވައިފައި ދިޔަ ސައިކަލެއް ކޮންޓްރޯލް ނުވެ، ފާރެއްގައި ޖެހިގެން ކަމަށް މިހާތަނަށް ބެލި ބެލުމުން އެނގިފައިވާކަމަށް ވެސް ފުލުހުން ވަނީ ބުނެފައެވެ.
މި އެކްސިޑެންޓްގެ މައްސަަލަ ފުލުހުން މިހާރު ދަނީ ތަހުގީގު ކުރަމުންނެވެ.
މީގެކުރިން ވެސް ފުވައްމުލަކުގައި ނުރައްކާތެރި އެކްސިޑެންޓުތައް ހިނގައި މީހުންގެ ފުރާނައަށް ނުރައްކާވެފައި ވެސް އެބަހުއްޓެވެ.
އެކްސިޑެންޓުތައް އެންމެ އާންމު އެއް ސިޓީގެ ތެރޭގައި އެ ސިޓީ ހިމެނެއެވެ.