21 Jan 2024, 10:30
ދިވެހި ފުލުހުންގެ ޚިދުމަތުން ތަހުގީގުކޮށް ނިންމައި، ނަމަވެސް ތަހުގީގުތަކުގައި ފުލުހުން ވެފައި ހުރި އިހުމާލުގެ ސަބަބުން ޝަރީއަތުގެ މަރުހަލާގައި ކުށްވެރިން ދޫވާން މެދުވެރިފައިހުރި މައްސަލަތައް އަލުން ބަލައި، އޮޑިޓެއް ހެދުމުގެ މަސައްކަތް ކުރަމުން އަންނަ ކަމަށް ފުލުސް ކޮމިޝަނަރު އަލީ ޝުޖާއު ވިދާޅުވެއްޖެއެވެ.
މަސްތުވާތަކެތި އެތެރެކުރުން ފަދަ ބޮޑެތި މައްސަލަތަކުގައި ހެއްކާއެކު ހައްޔަރުކުރާ ބޮޑެތި ކުށްވެރިން ޝަރީއަތުގެ މަރުހަލާގެ ތެރެއިން ދޫވުމަކީ މިހާރު ދިމާވާ އެންމެ ބޮޑު އެއް މައްސަލައެވެ.
އެއީ އެ ފަދަ މައްސަލަތަކުގައި ފުލުހުންކުރާ މަސައްކަތުގެ ނަތީޖާ ނުނެރެވި، މުޅި މަސައްކަތް އަލުން ފަށަންޖެހޭ އެއް ސަބަބެވެ. އަދި ބޮޑެތި ކުށްތަކަށް އަރައިގަންނަ ކުށްވެރިން މުޖުތަމައުއަށް ދޫވާ ސަބަބު ވެސް މެއެވެ.
މަގާމާ ހަވާލުވެލެއްވުމަށްފަހު "ސަން"އަށް ދެއްވި އެންމެ ފުރަތަމަ އެކްސްކްލޫސިވް އިންޓަވިއުގައި މި މައްސަަލައާ ގުޅިގެން ޝުޖާއު ވިދާޅުވީ، އާންމު ގޮތެއްގައި ފާހަގަވާ އެއް ކަމަކީ މައްސަލަތަކުގައި ފުލުހުން ފުރިހަމަކުރަންޖެހޭ އިޖުރާތްތަކެއް ފުރިހަމަ ނުކުރުމުން ކުށްވެރިން ދޫވެފައިހުރިކަން ކަމަށެވެ. އެއީ ހިތާމަކުރާ ކަމެއްކަމަށް ވެސް ސީޕީ ވިދާޅުވިއެވެ.
ފުލުސް ކޮމިޝަނަރު އަލީ ޝުޖާއު "ސަން"އަށް ދެއްވި އެންމެ ފުރަތަމަ އެކްސްކްލޫސިވް އިންޓަވިއު: ޝުޖާއު ވިދާޅުވީ ކުށްވެރިން ދޫވާ ސަބަބުތައް ދެނެގަތުމުގެ މަސައްކަތް ކުރަމުން އަންނަކަމަށް -- ފޮޓޯ: އިންފިނިޓް މޯމެންޓްސް/ މުޙައްމަދު ޝާތިއު އަބްދުﷲ
"ފުލުހުންގެ ފަރާތުން އެ ގޮތަށް ހެދޭ މިސްޓޭކްތައް ނޫނީ ފުލުހަކު އަޅުގަނޑުމެން އޮޕަރޭޝަނެއް ހިންގައި ހިންގުމުގައި ނޫނިއްޔާމުން މީހަކު ނަގައި ނެގުމުގައި ނޫނިއްޔާމުން އަދި ތަނެއް ފާސްކުރާ ފާސްކުރުމުގައި، އަޅުގަނޑުމެންގެ ތެރޭ ހެދިފައި ހުރި އިޖުރާތްތަކަށް ނުވަތަ ގާނޫނުތަކުގައި ލިޔެވިފައި ހުރި ގޮތް ނޫން ގޮތަކަށް ހިނގައިފައިހުރި ކޭސްތަކުގެ އޮޑިޓެއް އަޅުގަނޑުމެން އެބަ ހަދަން،" ސީޕީ ވިދާޅުވިއެވެ.
ޝުޖާއު ވިދާޅުވީ އެ ފަދަ އޮޑިޓެއް ހެދުމުގެ ބޭނުމަކީ އެ ފަދަ މައްސަލަަތަކުގައި ހުރި މައްސަލަތައް ދެނެގަނެ އެކަން ތަކުރާރު ނުކުރުމަށް ޓަކައި ކުރެވެން ހުރި ކަންކަން ދަސްކުރުންކަމަށެވެ.
އަދި އޮޑިޓުތަކުގެ ތެރެއިން ވަކިވަކި ފުލުހުންގެ މައްސަލަ ފާހަގަވާނަމަ އެ ފުލުހެއްގެ މައްސަލަ ވެސް އުސޫލުގެ ތެރެއިން ބަލާނެކަމަށް ޝުޖާއު ވިދާޅުވިއެވެ.
"ވަކިވަކި ފުލުހުންގެ އިހުމާލު އޮވެއްޖެޔާ އެ ފުލުހުންގެ އެ މައްސަލަތައް އޮންނަ އުސޫލުގެ ތެރެއިން އަޅުގަނޑުމެން ބަލާނަން. އެހެންނަމަވެސް މީގެ ޕޮއިންޓަކީ، އަޅުގަނޑުމެން ޔަގީންކޮށް އަރުވަން ބޭނުންވަނީ އަޅުގަނޑުމެން ފުލުހުން މި ކުރާ މަސައްކަތް މި ދެންނެވި ޕްރޮފެޝަނަލް ކުރުމަށް ޓަކައި ބޭނުންވާ ވަރަށް ގިނަ މައުލޫމާތުތައް ލިބޭނެ މި ދެންނެވި އޮޑިޓުތަކުގެ ނަތީޖާއިން،" އޭނާ ވިދާޅުވިއެވެ.
ޝުޖާއު ވިދާޅުވީ ފުލުހުން ހިންގާ ތަހުގީގުތައް ފުރިހަމަކުރުމަކީ ޚާއްސަ ސަމާލުކަމެއް ދީގެން ކުރާނެ ކަމެއް ކަމަށެވެ. އަދި އެފަދަ ކަމެއް ހިނގުމުގެ ފުރުސަތު ވީހާ ވެސް ހަނިކުރުމަށް ކުރެވެން ހުރި ކަންކަން ކުރައްވާނެކަމަށް ޝުޖާއު ވިދާޅުވިއެވެ.
މި ފަހުން ވެސް މަސްތުވާތަކެތީގެ ބޮޑު މައްސަލައެއްގައި ހިމެނޭ އިސް މީހަކު ޝަރީއަތުގެ މަރުހަލާގެ ތެރެއިން ވަނީ ދޫވެފައެވެ. އާންމު ގޮތެއްގައި މިފަދައިން ދޫވަނީ ފުލުހުން ހިންގާ ބޮޑެތި ތަހުގީގުތަކުގެ ތެރެއިން ގިނަ ދުވަސްތަކަކަށް އެ ފަދަ ކުށްވެރިންގެ ހަރަކާތްތައް ބެލުމަށްފަހު، ހައްޔަރުކޮށް ޝަރީއަތަށް ހުށަހަޅާ ހިސާބުންނެވެ.