21 Jan 2024, 08:39
"ރާދިން." މައާލްގެ އަޑުގައި މިފަހަރު ބުނެދޭން ނޭނގޭ އަސަރެއް ވެއެވެ. އެ ހާދިސާގެ ފަހުން އޭނާގެ ނަމުން މައާލް އެފަދަ ގޮތަކަށް ގޮވާލި އެއީ ފުރަތަމަ ފަހަރު ކަމުން ރާދިންއަށްވެސް މައާލްއަށް ބަލައިލެވުނީ ހައިރާންކަމާއެކުގައެވެ.
ދެމީހުންގެ ނަޒަރު ބައްދަލުވުމާއެކު މައާލްއަށް އިރުކޮޅަކު ރާދިންއަށް ބަލަހައްޓައިގެން ހުރެވުނެވެ.
"އައި އެމް ޓަޔާރޑް." ރާދިންއާ ނަޒަރު ވަކިކޮށްލުމަށްފަހު، މައާލް އެންމެ ފަހުން ބުނެލިއެވެ. އޭނާ ހަމަ ހަޤީގަތުގައިވެސް ވަރުބަލިވެއްޖެއެވެ. އިތުރަށް ހިތްވަރުކުރުމުގެ ގާބިލްކަމެއް އޭނާގެ ނެތެވެ. އަމިއްލަ ހިތުގެ އިޙްސާސްތަކަށް ފުރަގަސްދީފައި، އެ ހިތް ހަރު ހިލަގަނޑަކަށް ހަދައިގެން ހުރެ ހުރެ އޭނަ ވަރުބަލިވެއްޖެއެވެ.
"ބަލީތަ؟ ހިނގާ އެތެރެއަށް." ރާދިންއަށް ބުނެވުނެވެ. މައާލް ކުޑަކޮށް އެނބުރިލިއެވެ.
"ރާދިން…. " އަނެއްކާވެސް މައާލް ގޮވާލިއެވެ. އެ ގޮވާލުމުގައިވަނީ ކުރިން ވެސް ހުރި މަޑުމައިތިރި އަސަރެވެ. ވަރުބަލިކަމާއި މަޑުމޮޅިކަން އެ އަޑުން ފާޅުވަމުން ދިޔައެވެ.
"އެއްޗެއް ބުނަން ބޭނުންވީތަ؟" މައާލްގެ މޫނުމަތިން ފާޅުވަމުން ދިޔަ އަސަރުތަކުގެ ސަބަބުން އެ ހިތުގައިވާ އެއްޗެއް ދެނެގަންނަން ރާދިން ނުކުޅެދުނެވެ. އެނގޭހާވެސް އެއްޗަކީ މައާލް ކަމަކާ މެދު ވަރަށް ފުންކޮށް ވިސްނަމުންދާކަމެވެ.
"ވަޓް ހެޕެންޑް؟" މައާލް އެއްޗެއް ނުބުނެ ގިނައިރުވާން ފެށުމުން ރާދިންއަށް ބުނެވުނެވެ. ދެ ވިސްނުމެއްގައި ހުރެފައި އޭނާ މައާލްގެ އަތުގައި މަޑުމަޑުން ހިފައްޓާލިއެވެ. މައާލް އިސްޖަހާލުމަށްފަހު، އިރުކޮޅަކު މަޑުކޮށްލިއެވެ. ރާދިންގެ އަތުގެ ތެރެއިން އޭނާގެ އަތް ދަމައިގަންނާކަށްވެސް މިފަހަރު މައާލް މަސައްކަތެއް ނުކުރެއެވެ. އެކަމުން ރާދިންއަށް ކުޑަ ހަމަޖެހުމެއް ލިބުނެވެ. ހަޤީގަތުގައި މައާލް ހުރީ އޭނާގެ ހިތުތެރޭގައި އެވާ ވާހަކަތައް ރާދިންއާ ހިއްސާކުރާނެ ގޮތެއް ނޭނގިފައެވެ. ވާހަކަ ފަށާނެ ގޮތެއް ވެސް މައާލްއަކަށް ނޭނގުނެވެ. ހިމޭންކަމުގައި ހުރެވުނީ އެހެންވެގެންނެވެ.
"ރާދިން! ކީއްވެތަ އަހަންނާ މެދު އެގޮތަށް ކަންތައް ކުރީ؟" މައާލް އޭނާގެ ހިތުގައިވާ ޝަކުވާތައް ބޭރުކުރަން ފެށިއެވެ. އެއީ މީގެ ކުރިންވެސް މައާލް ރާދިންއާ ކުރިމަތިކުރުވި ސުވާލެކެވެ. ތަފާތަކީ އޭރު އެ ސުވާލުކުރީ ހިތްހަމަ ނުޖެހި ރުޅިއައިސް ހުރެފައިކަމުގައި ވުމެވެ. އަދި އޭރު ރާދިންގެ އެއްވެސް ވާހަކައެއް އަޑު އަހަން މައާލް ބޭނުން ނުވުމެވެ.
"ރާދިން ޕްލީޒް… އާންސްވާރ މީ. އައި އެމް ޓަޔަޑް. ޓަޔަރޑް އޮފް އޯލް ދިސް. ތެދަށް އަހަންނަށް ޖަވާބު ދީ. ޕްލީޒް. އަހަރެން މޮޔަވެދާނެ. ހުރިހާކަމަކަށްފަހު އަދި ވެސް އަހަރެންގެ ހިތުން ރާދިންއަށް…. ރާދިންއަށް…" އެހިސާބަށް ބުނެފައި މައާލް ޖުމްލަ މެދު ކަނޑާލި ނަމަވެސް، މައާލް އެބުނަން އުޅޭ އެއްޗެއް ރާދިންއަށް ރަނގަޅަށް ފަހުމްވެއްޖެއެވެ. މައާލްގެ މޫނުމަތިން ހިތާމަ ނޫން އެއްޗެއް ރާދިންއަކަށް ނުފެނުނެވެ. ރާދިން މަޑުމަޑުން މައާލް އޭނާއާ ގާތަށް ދަމާލިއެވެ.
"މައާލްއަށް ހީވޭތަ އަހަރެން މައާލް ދެކެ ލޯބި ނުވާހެން. އަހަރެންގެ ދެލޮލަށް ބަލާލާފަ އެއްފަހަރުވެސް ބުނެބަލަ. މިދެލޮލުން މައާލްއަށްޓަކައިވާ ލޯބި ނުފެނޭތަ؟" ރާދިންވެސް ކޮށްލީ ސުވާލެކެވެ. މައާލް ލޯ މަރާލިއެވެ.
"އަހަރެން ގަބޫލުކުރަމޭ އަހަންނަށް ކުށެއް ކުރެވުނުކަން. އެކަން ރިއަލައިޒް ވީ ހިސާބުން އަހަރެން ސަޖާއާ ދުރުވެއްޖެއިން. މައާލްއަށް ކީއްވެތަ އަހަރެންގެ ވާހަކަ އަޑު ނާހަނީ. ކީއްވެ އެއްފަހަރުވެސް އިތުބާރު ނުކުރީ. އެ ހުރިހާކަމެއްގެ ހަޤީގަތް ކިޔައިދޭން އުޅޭކޮންމެ ފަހަރަކު ކީއްވެ އަހަރެންގެ އަޑު ނާހަނީ. މައާލްއަށް ގަބޫލުނުކުރެވުނަސް، އަހަރެން ސަޖާ ދެކެ ލޯތްބެއް ނުވަން. ކުރިން އަހަރެން ހީކުރިން އެއީ ލޯބިކަން. އެކަމަކު ފަހުން އެނގުނީ އެއީ އަދި ހަޤީޤީ ލޯބި ނޫންކަން." ރާދިންއަށް ބުނެވުނެވެ. އޭނާއަށް މައާލްގެ ކޯތާފަތުގައި އަތް ޖައްސާލެވުނެވެ.
"ދެން ކީއްވެ އޭނަ ރާދިންގެ ދަރިއަކަށް ބަލިވެ އިންނަންވީ؟" މައާލްގެ ދެލޮލުގެ ތެރެއަށް ކަރުނަތައް ޖަމާވިއެވެ. ނުރޯން ހިތްވަރު ކުރިނަމަވެސް، އެ ކަރުނައް އޭނާގެ އެސްފިޔަތަކާ ޖަދަލުކުރުމަށްފަހު، ފައިބައިގެން ހިނގައްޖެއެވެ. އޯގާތެރިކަމާއެކު ރާދިން މައާލްގެ ކަރުނަތައް ފުހެދިނެވެ.
"އައި އެމް ސޮރީ. މައާލްގެ ތި ކަރުނަތަކުގެ ސަބަބަކީ އަހަރެން. އެކަމަކު މައާލްއަށް އެނގޭތަ؟ މައާލްއާ އިންފަހުން އަހަންނަށް މައާލްއާ ސަޖާގެ ތަފާތު ފާހަގަ ކުރެވުނު. އެކީ އުޅެން ފެށީމަ އެނގިއްޖެ ސަޖާ ލޯބިވަނީ އަހަރެން ދެކެ ނޫންކަން. އޭނަ ލޯބިކުރަނީ ފައިސާއާ މުދަލަށްކަން. އެކަން ރިއަލައިޒްވުން ލަސްވުން އެއީ އަހަރެންގެ މައްސަލަ. އެރޭ ވީ ގޮތްވެސް އަހަރެން މައާލްއަށް ކިޔައިދީފާނަން." ރާދިން އެހެން ބުނެފައި މަޑުޖެހިލިއެވެ. މައާލް އިސްޖަހާލައިގެން ހުރިނަމަވެސް، އިތުރު އެއްޗެއް ނުބުނެއެވެ. އަމިއްލަ ފިރިމީހާގެ އެފަދަ ވާހަކައެއް އަޑު އެހުމަކީ އަނތްބަކަށް ކެތްވާނެ ކަމެއް ނޫންނަމަވެސް، މައާލް ހުރީ ރާދިންގެ ވާހަކަތައް އަޑު އަހާށެވެ. މައާލްގެ އެ ހިމޭންކަމުގެ މާނަ ނަގާނެ ގޮތެއް ނޭނގި ހިނދުކޮޅަކު ރާދިންއަށް ހުރެފުނެވެ.
"މައާލް އެއްވެސް ވާހަކައެއް އަޑު އަހަން ބޭނުން ނުވަންޏާ ޖަސްޓް ލެޓް މީ ނޯ. އަހަރެން ހުއްޓާލާނަން." ރާދިން އެހެން ބުނެލާފައި އޭނާގެ ވާހަކަ ކުރިއަށް ގެންދިޔައެވެ.
"ހަނދާންވޭތަ؟ ވިއްސާރަ ރެއަކު އެކުވެރިއަކު ތަނަކަށް ބަދަލުވަނީއޭ ކިޔާފަ އަހަރެން ދިޔައިމެއްނު. އެރޭ އަހަރެން ދިޔައީ އެކުވެރިއެއްގެ ކައިރިއަކަށް ނޫން. އެރޭ އަހަރެން ދިޔައީ ސަޖާ އުޅޭ އެޕާރޓްމެންނަށް." ރާދިންގެ ދުލުން އެކަމަށް އެއްބަސްވި ހިނދު މައާލްގެ ހިތުގެ ހިނގުން ވެސް ހީވީ މަޑުޖެހިލި ހެންނެވެ. ތުންފަތުގައި ދަތް އަޅާލަމުން އޭނާ ރާދިންގެ ވާހަކަތައް އަޑު އަހަން ހުއިރު، މޭގައި ތޫނު ރިހުމެއް އުފެދެމުން ދިޔައެވެ. އެރޭ ހަތަރު ދަމު ރާދިން ހޭދަކުރީ ސަޖާގެ ކައިރީގަ ހެއްޔެވެ؟ އެރޭ ގެއަށް ރާދިން ނައީ ސަޖާގެ ކައިރީގައި ރާދިން މަޑުކުރުމުން ހެއްުޔެވެ؟ އޭނާ އިންތިޒާރުގައި ބައިންދާފައި ރާދިން އެފަދަ ގޮތަކަށް ކަންތައް ކުރަން ވީ ކީއްވެހެއްޔެވެ؟ ހިތުގައި އުފެދުނު ޝަކުވާތަކުގެ ސަބަބުން އޭނާގެ ނަފްސު ކުޑަކޮށް ހަރުކަށިވެލިނަމަވެސް، ރާދިންއާ ދުރަށް ދާކަށް މައާލް ނޫޅުނެވެ.
"ސޮރީ…." މައާލްއަށް އައި ބަދަލުތައް ފާހަގަ ކުރެވުނު ރާދިންއަށް ބުނެވުނެވެ. އެއަށްފަހު އޭނާ އެރޭގެ ހާދިސާ ހިނގިގޮތް މައާލްއަށް ތަފްސީލްކޮށް ކިޔައިދިނެވެ. ސަޖާ އޭނާއަށް ފެންތެއްޓެއް ދިން ކަމަށާއި އެފަހުން ކަންވީގޮތް އޭނާގެ ހަނދާނުގައި ނެތްކަމުގައި ރާދިން ބުންނެވެ. އަދި އެއަށްފަހު، ދެން އޭނާއަށް ހޭލެވުނުއިރު އޮވެވުނު ތަނާއި އޮވެވުނު ގޮތް ރާދިން މައާލްއަށް ކިޔައިދިނެވެ.
"ހުވާކޮށްފަ މި ބުނަނީ މައާލް. އަހަންނަކަށް ނޭނގެ ވީ ގޮތެއް." ރާދިންއަށް ބުނެވުނެވެ. މިހާރު އޭނާއަށްވެސް ވަނީ ވަރަށް ބޮޑަށް އަސަރުކޮށްފައެވެ. މައާލްގެ ހިމޭންކަން ރާދިންއަށް އުނދަގޫކުރަމުން ދިޔުމުގެ ސަބަބުން އޭނާ މައާލްގެ އަތުން އަތް ދޫކޮށްލާފައި ރެއިލިންގައި ހިފައްޓާލިއެވެ.
"މާލްއަށް އަދިވެސް އަހަރެންގެ ވާހަކަ ގަބޫލުނުކުރެވޭތަ؟" މާޔޫސްކަމާއެކު ރާދިންއަށް ދުރުބަލާލެވުނެވެ. މައާލްގެ ފަރާތުން އިތުރު ވާހަކައެއް އަޑު ނީވުމުން އޭނާގެ ހިތަށް ތަދުވިއެވެ. އިތުރަށް ބުނާނެ އެއްޗެއް ނޭނގި ރާދިންއަށްވެސް ހުރެވުނީއެވެ.
"އެރޭ ރާދިންއަށް ނޭނގުނަސް ކަމެއް ހިނގިނަމަ އޭނަގެބަނޑުގައި އެވަނީ ރާދިންގެ…." ޖުމްލަތައް އަތުރާލުން މައާލްއަށް ފަސޭހަކަމަކަށް ނުވެއެވެ. ކޮންމެ ފަހަރަކު ވަކި ހިސާބަކަށް ބުނެފައި އޭނާއަށް ހުއްޓާލެވެނީ އެހެންވެއެވެ.
"އަހަންނަށް އެކަމެއް ގަބޫލެއް ނުކުރެވޭ… ނޭނގެ ކީއްވެކަމެއް. އޭނަ އަހަންނަށް އޮޅުވާލަނީއޭ ހިތް ބުނަނީ." ރާދިންއަށް ބުނެވުނެވެ.
"ހަޤީޤަތް ފެންނަން އޮތްއިރު ކީއްވެ ރާދިންއަށް އެކަން ގަބޫލުނުކުރެވެނީ؟" މައާލް އަނެއްކާވެސް ސުވާލުކޮށްލިއެވެ.
"އައި ޑޯންޓް ނޯ. އެނގޭހާވެސް އެއްޗަކީ އެކަން ވީ ނަމަވެސް، އެއީ އަހަރެންގެ ރުހުމުގައި ވީކަމެއް ނޫންކަން. ކަން ހިނގައި ދިޔަގޮތް އަހަންނަށް ނޭނގޭކަން. އަދި އަހަރެންގެ ހިތުގައި އޭނާއާ މެދު އެއްވެސް އިޙްސާސްއެއް ނުވާކަން. ލޯބީގެ ކުޑަކުޑަ މިންވަރެއްވެސް އޭނައާ މެދު އަހަރެންގެ ހިތުގައި ނެތް. އަހަރެންގެ ހިތުގެ މިލްކު ވެރިއަކީތީ. މިހިތުގެ ލޯތްބަކީ ތީ. އަހަންނަށް ހަޤީޤީ ލޯބިވެވުނު ފުރަތަމަ ކުއްޖަކީވެސް ތީ. މައާލް އަހަންނާ ވަކި ވިޔަސް، ދުވަހަކުވެސް މިހިތުން މައާލްގެ ލޯބި ފިލައިގެން ނުދާނެ. ތިޔަ ހަނދާންތައް އަހަންނާ ވަތްކެއް ނުވާނެ. އަހަންނަށް އެނގޭ، އަހަންނަށް މައާލްއަށް ވަރަށް ހާރޓް ކުރެވިއްޖެކަން. ވަރަށް ވޭން ދެވިއްޖެކަން. މައާލްގެ ޙަޔާތުގައި މިވާ ހިތްދަތިކަމުގެ ޒިންމާ އަހަރެން ނަގަން ޖެހޭނެކަން. މިހުރިހާކަމެއް އެނގިހުރެވެސް މައާލް އަހަންނާ ދުރުވާން ބޭނުންވަންޏާ އަހަރެން މަޖުބޫރެއް ނުކުރާނަން. މައާލް ބޭނުން ކޮންމެ ގޮތަކަށްވެސް އަހަރެން ކަންތައް ކޮށްދޭން ތައްުޔާރު، އެކަމަކު…" ރާދިން އޭނާގެ ހިތުގައި އަތް އަޅާފައި ވާހަކަ ދައްކަމުން ދިޔައިރު، އެ އަ ޑުގައިވާ އަސަރުތައް މައާލްގެ ހިތާ ހަމައަށް ވާސިލްވާކަށް ގިނައިރެއް ނުނެގިއެވެ. އެ އަޑުން އޭނާއަށްވެސް އަސަރުކޮށްފިއެވެ.
"އެކަމަކު ކޯންޗެއް؟" އަމިއްލަ ހިތުގެ ޙާލު ހަމައަކަށް އަޅުވަން މައާލް ކިތަންމެ މަސައްކަތެއް ކުރި ނަމަވެސް، އެ އަޑުން އޭނާގެ ހިތުގެ ޙާލު ވަޒަން ކުރެވެއެވެ. ކޮންމެވެސް ވަރެއްގެ ނުތަނަވަސްކަމަކާއި ބިރުވެރިކަމެއް އެ އަޑުގައިވެއެވެ.
"ރާއްޖެ ދެވެންދެން އަހަރެން މައާލްއާ އެކި ހުރުމުގެ ފުރުސަތު ދީ. އަހަރެން ބޭނުން މައާލްގެ ކައިރީގައި ހުންނަން. ޕްލީޒް." ރާދިން ބުނެލިއެވެ.
މައާލް ބޯ ޖަހާލިއެވެ. އިތުރު އެއްވެސް ސުވާލެއް ކުރުމެއްނެތި މައާލް އާއެކޭ ބުނުމުން ރާދިން ހައިރާންވެސް ވިއެވެ. އެހެންނަމަވެސް އޭނާ އިތުރު ސުވާލެއް ނުކުރެއެވެ. މައާލްއަށް އެފަދަ ބޮޑު ބަދަލެއް އަންނަން ޖެހުނު ސަބަބެއް އޭނާއަކަށް ނުވިސްނުނެވެ. އޭރު ރާދިންއަށް ނޭނގުނު ކަމަކީ ރާދިންގެ އެ ވާހަކައަށް މައާލް އެއްބަސްވީ ކީއްވެކަމާއި އެކަމުގެ ފަހަތުގައި ފޮރުވިފައިވާ ސިއްރު މައާލްއަށް އެނގޭކަމެވެ. މި ވީ ދުވަސްތަކުގައި އޭނާގެ މައިންބަފައިންނާ ބެހޭގޮތުން ރާދިންއާ މުނީރާ ދެމެދު ދެކެވިފައިވާ ވަރަށް ގިނަ ވާހަކަަތައް މައާލްއަށް އެނގެއެވެ. އޭނާގެ ކައިރީގައި ރާދިން ހުންނަން ބޭނުންވެފައިވާ މިންވަރުވެސް މައާލްއަށް އިޙްސާސްކުރެވެއެވެ. އެ ކުޑަ ކުޑަ ހިތްނަމަ ޖެހުން ރާދިންގެ ފުށުން ނިގުޅައިގަންނަން އޭނާގެ ހިތެއް ބޭނުމެއް ނޫނެވެ. ވަރިއާ މެދު މިވަގުތު ނުވިސްނުމަށް އޭނާގެ ހިތް ގޮވަން ފެށި ގޮވުމަށް މައާލްއަށް އިޖާބަ ދެވުނީ ބޭއިޚްތިޔާރުގައެވެ.
ރާދިން މައާލްއާ ކުރިމަތިލިއެވެ.
'ތޭންކްސް ބޭބީ…" ލޯތްބާ އޯގާތެރިކަން އެކުލެވޭ ޖަޒުބާތީ އަޑަކުން ރާދިން ބުނެލުމާއެކު، އޭނާ މައާލްއާ ކުރިމަތިލިއެވެ. މައާލް ގެނެސް އެ އަތުގެ ތެރޭގައި ހައްޔަރުކޮށްލުމަށް އެދި ބޭޤަރާރުވާން ފެށި ރާދިން އޭނާގެ އަމިއްލަ ނަފްސު ކޮންޓްރޯލް ކުރަން މަސައްކަތް ކުރިނަމަވެސް، އެކަން ކުރުމަކީ ކިހާ އުނދަގޫކަމެއްކަން އޭނާއަށް އިޙްސާސްކުރެވުނީ، މައާލްއާއެކުގައިވުމަށް، އެހިތް އޭނާއަށް މަޖުބޫރުކުރަމުން ދިޔައީތީއެވެ. ކުރިއަށް ފިޔަވަޅެއް އަޅާލާފައި އޭނާ މައާލްގެ ގައިގައި ބައްދާލީ މަޑުމަޑުންނެވެ. މައާލް ގެނެސް އެމޭގައި ޖައްސާލުމާއެކު މައާލްގެ ފަން އިސްތަށިގަނޑުގައި ރާދިން، ބޮސް ދިނެވެ. އަތް ތިރިކޮށްލައިގެން ހުރި މައާލް ރާދިންގެ ގައިގައި ހިފައްޓާ ނުލި ނަމަވެސް، މައާލް އޭނާއާ ދުރުވާން ނޫޅުމުން ރާދިންއަށް ކުޑަ އުފަލެއް ލިބުނެވެ. އެ ހަދިސާއަށްފަހު، ފުރަތަމަ ފަހަރަށް ހިނިތުންވުމެއް ރާދިންގެ ތުންފަތްމައްޗަށް ވެރިވިއެވެ. މައާލް ދުރުވާން ނޫޅުމުން އޭނާ އިތުރަށް މައާލް ގަޔާ ލާ ފިއްތާލިއެވެ. ދެމީހުންނަށް އެކަކު އަނެކަކުގެ ހިތުގެ ތެޅުމުގެ އަޑު އިވެމުން ދިޔައެވެ. ހިތް އަވަސްވެ ނޭވާ ފުންވަމުން ދިޔައިރު، އެހާ ދުވަސްފަހުން ރާދިންގެ އަތުގެ ހިމާޔަތް ލިބުމުން މައާލްއަށްވެސް ހުރީ ބުނެދޭން ނޭނގޭ ފަދަ ގޮތްތަކެއް ވެފައެވެ. ރާދިންގެ ހުރިހާ ވާހަކައެއް ގަބޫލުކުރުމަށް އެ ހިތްގޮވަމުން ދިޔަނަމަވެސް، ސަޖާގެ ބަނޑުގައި އެވަނީ ރާދިންގެ ދަރިއެއްކަން އޭނާ ހަނދާން ނައްތާލާނީ ކިހިހެއްހެއްޔެވެ؟ ރާދިން ބީވެގެން ދިޔުމަކީ ބޭނުންވާ ގޮތް ނޫންނަމަވެސް، ސަޖާގެ ބަނޑުގައި ރާދިންގެ ދަރިއަކު ވާނަމަ، އެ ގުޅުން އެގޮތުގައި ދެމި އޮތުމަކީ ނާދިރުކަމެކެވެ. ލޯ މަރާލަމުން މައާލް ފުންނޭވާއެއް ދޫކޮށްލިއެވެ.
އިރުގަނޑަކު ދެމީހުންނަށްވެސް ދުރުވެލަން ނޭނގިފައި ތިބެވުނެވެ. ހީވަނީ ދުރުވާން ބޭނުންނުވަނީ ހެންނެވެ. ކިތަންމެ ހިތާމަޔަކާއި ހިތްދަތިކަމެއް ލިބުނު ނަމަވެސް، ލޯބިވާމީހެއްގެ ކައިރީގައި ގިނައިރު ހުންނަން ވެއްޖެ ނަމަ އަމިއްލަ އިޙްސާސްތަކާއި ޖަޒުބާތުތައް ކިޔަމަން ކުރަން އުނދަގޫވާ ފަހަރުތައް މަދެއް ނޫނެވެ. ލޯބީގެ ފުން ކަމާއި ޖަޒުބާތުތަކުގެ ބާރުގަދަކަން އެއީ ވަޒަންކޮށްލަން އެނގޭވަރަށް ވުރެ ފުން އެއްޗަކަށް ވަނީ އެހެންވެއެވެ. ލޯބީގައި އަމިއްލަ ނަފްސުގެ ކޮންޓްރޯލް ވެސް އެމީހާގެ އަތުން ގެއްލޭތީއެވެ. ސިކުނޑިއަށް ވުރެ ހިތުގެ ގޮވުންތަކަށް އިޖާބަ ދެވޭތީއެވެ. ރާދިންއާ މައާލްއަށްވެސް ވެފައިވަނީ އެފަދަ ގޮތެކެވެ.
އެންމެ ފުރަތަމަ ދުރުވެލީ މައާލްއެވެ.
"ތެންކިއު" ރާދިން ޝުކުރުއަދާކުރިއެވެ.
"ތެންކިއު ފޯ ލިސެނިން ޓު މީ. ތެންކިއު ފޯ ގިވިން މީއަ ޗާންސް ޓު އެކްސްޕްލެއިން މައިސެލްފް." މައާލް އެއްޗެއް ނުބުނުމުން ރާދިން އިތުރުކޮށްލިއެވެ.
"ރާދިން، މައާލް ދެކުދިން މިތާތަ؟" އޭގެ އިރުކޮޅެއްފަހުން ދެމީހުންނަށްވެސް ސިހުން ލިބުނީ ޓެރެސްއަށް އެރި މުނީރު ފެނުމުންނެވެ.
"ބައްޕާ…" ދެމީހުންނަށް އެއްފަހަރާ މުނީރަށް ގޮވާލެވުނީ އެ މޫނުމަތިން ހާސްކަން ފެނުނީތީއެވެ.
މުނީރު މައްޗަށް އެރިއިރު، ރާދިންއާ މައާލްއާ ދެމީހުން ވާހަކައެއް ދައްކާތީ މަޑުކޮށްލަން ވެސް އޭނާ އުޅުނެވެ. އެހެންނަމަވެސް ވިސްނާލުމަށްފަހު، މުނީރު އެމީހުންނަށް ގޮވާލީ ކަމުގެ މުހިންމުކަމުންނެވެ.
"ރާދިން ފޯނު ނުނަގައިގެން ދެންމެ ފުލުހުންގެ އިދާރާއިން ބައްޕައަށް ގުޅި." އެ ދެމީހުންނާ އަރާ ހަމަކޮށްލަމުން މުނީރު ބުނެލިއެވެ. ރާދިން ފޯނު ނަގާ ބަލައިލުމާއެކު، އޭނާއަށް ލިބިފައިވާ ދެ މިސްކޯލު ފެނުނެވެ. ފޯނު ސައިލެންޓުގައި އޮތުމުން ގުޅިކަން ނޭނގުނީއެވެ.
"ކިހިނެއްވީ އަނެއްކާ؟" ރާދިންއަށް ސުވާލުކޮށްލެވުނެވެ. ރޭގަނޑު ފުލުހުން އެގޮތަށް ގުޅާނީ ބޮޑުކަމެއް ވުމުންކަން ރާދިންއަށް ވިސްނެއެވެ.
"ފުއާދު، ފުއާދު ފެނިއްޖެ." މުނީރު ބުނެލިއެވެ. އެއަށްފަހު، ފުލުހުންގެ ފަރާތުން އޭނާއަށް ލިބުނު މައުލޫމާތުވެސް މުނީރު ހިއްސާކޮށްލިއެވެ. ފުއާދު އަތުލައިގަނެވުނީ މިއަދު ޚަބަރުން އަޑު އިވުނު ބޯޓުން ކަމުގައި އޭނާއަށް ޔަޤީންކުރެވުނީ ފުލުހުންގެ ވާހަކައިގެ މައްޗަށް ބިނާކޮށެވެ. އެގޮތުން ފުއާދު އަތުލައިގަތީ މަސްތުވާތަކެއްޗާއެކު ފުރަން އުޅުނު ދޯންޏަކުންކަމުގައި ފުލުހުން އޭނާގެ ކައިރީގައި ބުންޏެވެ.
"އޭގެ އިތުރުން އެއްވެސް މައުލޫމާތެއް ނުދޭ. އެމީހުން ބުނީ އެކޮޅަށް ހާޟިރުވާން ވީމަ އަންގާނެކަމަށް." މުނީރު ދާން ހިނގައިގަތުމުން މައާލްވެސް މުނީރުގެ ފަހަތުން ހިނގައިގަތެވެ. ރާދިންވެސް އެއްޗެއް ނުބުނެ ޖެކެޓްގެ ޖީބަށް އަތް ޖަހާލައިގެން ހުރެ އެމީހުންގެ ފަހަތުން ހިނގައިގަތެވެ. އޭރު އޭނާގެ ނަޒަރު ހުރީ މައާލްއަށް ހުއްޓިފައެވެ.
ބޮޑުކޮޓަރިއަށް ގޮސްފައި މުނީރު ސޯފާގައި އިށީނުމުން މައާލްއާ ރާދިންއާ ދެމީހުންވެސް އިށީނދެލިއެވެ. މުނީރު އެ ދެމީހުންނަށް ބަލާލާފައި ވާހަކަ ދެއްކިއެވެ.
"ހެންރީގެ އަންހެނުންގެ ޙާލަތު ބައްޕަ ބެލިން. އޭނަގެ ޙާލު ވަރަށް ދެރަ. އައިސީޔޫގަ އޮތީ. އެގޮތަށް އަޅާލާނެ މީހުން ނެތިފަ ތިބޭ މީހުން ބެލެހެއްޓުމަށް ޗެރިޓީ މެދުވެރިކޮށް އެހީތެރިވާ ބަޔަކާ ބައްޕަ ވާހަކަ ދައްކައިފިން. އެމީހުން ބުނީ އެކަން ކުރާނެ ވާހަކަ." މުނީރު އެ ވާހަކަ ބުނެލުމުން ރާދިންއާ މައާލްއާ ދެމީހުން ކުރެ އެކަކުވެސް އެއްޗެއް ނުބުނެއެވެ.
"އޭގަ އެލިޒެތްގެ ކުށެއް ނެތުމުންނާ އިތުރު މީހަކު ނެތުމުން ބައްޕަ އެގޮތަށް ނިންމީ." މުނީރު އިތުރުކޮށްލިއެވެ.
"ބައްޕައަށް ފެންނަ ގޮތަކަށް ކަންތައްތައް ގެންދިޔައިމަ ހަމަ ރަނގަޅުވާނެ. އަޅުގަނޑުގެ ނެތް މައްސަލައެއް." ފުރަތަމަ ވާހަކަ ދެއްކީ ރާދިންއެވެ. އޭނަގެ ފަހުން މައާލްވެސް އެގޮތާ އެއްބަސްވިއެވެ. ރާދިން އޭނާގެ ބޮލުގައި ހިފައްޓާލާފައި މޫނަށް ގޮތެއް ހަދާލުމުން މުނީރު ސުވާލުކޮށްލިއެވެ.
"ބޮލުގަ ރިއްސަނީތަ؟"
"ކުޑަކޮށް. ބޭސްވެސް ކައިގެން މިއުޅެނީ. އެހެންވެ ހެނދުނު ދިޔަގޮތަށް ފަހުން ނާދެވުނީ. މިހާރު ހީވަނީ އަނެއްކާ ބޮލުގެ ރިހުން ބޮޑުވާހެން. ދާންވީ ކަންނޭނގެ ދެން ދާން އަވަހަށް. ގޮސް ނިދާލީމަ އޯކޭ ވެދާނެ ކަންނޭނގެ." ރާދިން ބުނެލިއެވެ.
"ޑްރައިވަރާއެކީތަ އައީ؟" މުނީރު ދެވަނަ ސުވާލެއް ކޮށްލިއެވެ.
"ނޫނޭ. އެކަނި. ޑްރައިވަރު ބަލިވެ އުޅެނީ.... އެހެން މީހަކު ހޯދަން ދެން ނޫޅުނީ." ރާދިން ޖަވާބު ދިނެވެ.
"ބޮލުގަ ރިއްސާފަ ހުރެގެން ކާރު ދުއްވުން ރައްކާތެރިއެއް ނުވާނެ. މިގޭގައި މަޑުކޮށްލަންވީނު. ބޭސްކައިގެން އަރާމުކޮށްލީމަ ކަންނޭނގެ ދެން ރަނގަޅުވާނީ." މުނިރު އެހެން ބުނުމުން ރާދިންއަށް ބަލާލެވުނީ މައާލްއަށެވެ. ދެމީހުންގެ ނަޒަރު ސީދާވެލުމާއެކު، ރާދިން ވާހަކަދެއްކިއެވެ.
"އެ އޯކޭވާނެ. މާ ބޮޑުވަރެއް ނުވާނެކަންނޭނގެ" އޭނަ ބުނެލިއެވެ. މުނީރުގެ އަޑުންނާ އެމޫނުމަތިން ކަންބޮޑުވުން ފާޅުވީ ބޮލުގަ ރިއްސާފައި ހުރެ އެހާ ފިނިއިރު ރާދިންއެކަނި ފޮނުވަން އޭނާގެ ހިތް ބިރުގަންނާތީއެވެ. އެކަން މައާލްއަށް ފާހަގަ ކުރެވި އޭނަ ވާހަކަ ދެއްކީ ރާދިން މަޑުނުކުރަން އެ އުޅެނީ އޭނާގެ ސަބަބުންކަން އެނގޭތީއެވެ. އަދި އިތުރަށް މުނީރަށް ނުތަނަވަސްކަން ދޭން ބޭނުން ނުވާތީއެވެ.
"އެ…އެ ތެދެއް… މަޑު… މަޑުކޮށްލަންވީނު." ބަސްތައް އުނދަގުލުން އަތުރާލާފައި މައާލް ބުނެލިއެވެ. ރާދިން މަޑުކުރަން ނިންމީ މައާލް އެހެން ބުނީމައެވެ. މުނީރު ނޯކަރު ކުއްޖަކަށް ގޮވާލާފައި ތިރިން ކޮޓަރިއެއް ރާދިންއަށް ތައްޔާރުކޮށްލުމަށް ބުނެލިއެވެ.
ކޮޓަރި ތައްޔާރުވުމުން، ރާދިން، ބޭސް ކައިގެން ގޮސް ޖައްސާލިއެވެ. ބޮލުގެ ރިހުމަށް ލުއި ލިބޭހެން ހީވާން ފެށުމުން އޭނާ ފޯނު ނަގާ ފޯނާ ކުޅެން ފެށިއެވެ. ރާދިންއަށް އެތަކެއް އިރަކު އެހެން އޮވެވުނެވެ.
ނިދަން އޮށޯވެ އޮތް މައާލްއަށް ނިދޭގޮތެއް ނުވިއެވެ. އޭނާއަށް ވިސްނެނީ ރާދިންއާ މެދުގައެވެ. އެންމެފަހުން ނޯވެވިގެން ތިރިއަށް ދާން މައާލް މިސްރާބުޖެހިއެވެ. ސިޑިން ފައިބައިގެން ގޮސް ރާދިންއަށް ޚާއްސަކުރެވިފައިވާ ކޮޓަރީގެ ދޮރުކައިރީގައި ހުއްޓުމަށްފަހު އޭނާ މަޑުޖެހިލިއެވެ. ދެވިސްނުމެއްގައި ހުރި މީހެއްފަދައިން ހުރުމަށްފަހު އެންމެފަހުން މައާލް ދޮރު ހުޅުވާލިއެވެ.
ދޮރު ހުޅުވާލި އަޑަށް ފޯނަށް ބަލަހައްޓައިގެން ހެވިފައި އޮތް ރާދިން ސިއްސައިގެން ދިޔައެވެ. އޭނާ ބަލާލިއިރު، މައާލް ހުރީ ދޮރުމަތީގައެވެ. ހިނިއައިސްފައި އޮތް ރާދިންގެ ނަޒަރު މައާލްއާ ސީދާ ވުމާއެކު، އޭނާ ފުންމައިގެން ތެދުވިއެވެ.
"ސޮރީ. އޯކޭ ތޯ ބަލާލީ." ލަސްލަހުން ބުނެލުމަށްފަހު، މައާލް ދޮރުޖެހިއެވެ. ދެންމެ ވީކަންތައް މާނަކުރާނެ ގޮތެއް ނޭނގި ރާދިންއަށް އޮވެވުނެވެ.
ދުވެފައި ކޮޓަރިއަށް ދިޔަ މައާލް އެނދުގައި އިށީނެވެ. ރާދިން އެހާ ވަރުން ހެވިފައި ބަލަން އޮތީ ކޯންޗެއްބާއޭ މައާލްގެ ހިތަށް އެރިއެވެ. އޮށޯއިން ނަމަވެސް، ދެންވެސް އޭނާއަށް ނިދޭގޮތެއް ނުވިއެވެ. ރާދިން ނިދާހާއިރު ކޮށްފައި އަނެއްކާވެސް މައާލް ގޮސް އެކޮޓަރީގެ ދޮރު ހުޅިވާލިއެވެ. މިފަހަރު އިހުނަށްވުރެ މަޑުންނެވެ. ނަސީބަކުން ރާދިން އޮތީ ނިދާފައެވެ. އޭނާ މަޑު ފިޔަވަޅުތަކެއްގައި ގޮސް އެނދުކައިރީ ހުއްޓި ރާދިންއަށް ބަލާލިއެވެ. ނިދާފައި އޮތްނަމަވެސް، އޭނާއަށް އަސަރުކުރިއެވެ. ހިތުގެ ތެޅުން އަވަސްވިއެވެ. މޭމަތީގައި ބާއްވާލެވިފައިވާ ފޯނަށް ނަޒަރު ހިންގާލުމާއެކު، ރާދިންއަށް ނިދުނީ ފޯނާ ކުޅެން އޮވެފައިކަން މައާލްއަށް ޔަޤީން ކުރެވުނެވެ. ފޯނު ނަގާ ސައިޑް ކަބަޑު މަތީގައި ބާއްވަން އުޅެފައި ވެސް ހިތަށް އެރި އެއްޗަކުން ރާދިންގެ ފޯނު ހުޅުވަން އޭނާ އުޅުނެވެ. ފޯނު ހުޅުވެނީ ކޯޑު ނޫނީ ފިންގަޕްރިންޓް ޖަހައިގެންނެވެ. މައާލް މަޑުމަޑުން، ވަރަށް ފަރުވާތެރިވެ ހުރެ ރާދިންގެ ޕިންގަރޕްރިންޓުން ފޯނު ހުޅުވާލާފައި ބަލާލުމާއެކު، ފެނުނު އެއްޗަކުން ހައިރާންކަމާއެކު ރާދިންއަށް ބަލާލެވުނެވެ.
(ނުނިމޭ)