21 Jan 2024, 09:37
އޮސްޓްރޭލިއަން އޯޕަންގެ ހަތަރުވަނަ ބުރުން މި މުބާރާތުގައި ދެވަނައަށް ސީޑް ކުރެވިފައިވާ ސްޕެއިންގެ ކާލޯސް އަލްކަރާޒް ޖާގަ ހޯދައިފިއެވެ.
މި މުބާރާތުގެ ހަތަރު ވަނަ ބުރުން އަލްކަރާޒް ޖާގަ ހޯދާފައިވަނީ ތިންވަނަ ބުރުގައި ޗައިނާގެ ޝޭންގް ޖުންޗެން އާއި ބައްދަލުކުރި މެޗުގައި ޖުންޗެން ތިންވަނަ ސެޓްގައި ރިޓަޔާ ކުރުމުންނެވެ.
ޖުންޗެން ރިޓަޔާ ކުރިއިރު ފުރަތަމަ ދެ ސެޓް އަލްކަރާޒް ފަސޭހަކަމާއެކު 1-6 އަދި 1-6 އިން އޮތީ ކާމިޔާބު ކޮށްފައެވެ. އަދި ތިންވަނަ ސެޓުގައި ވެސް ފުރަތަމަ ގޭމް އޮތީ އަލްކަރާޒް ކާމިޔާބުކޮށްފައެވެ.
ޖުންޗެން މި މެޗު ހުއްޓައިލީ އޭނާގެ ކަނާތު ފައިގެ ފަލަމަސްގަނޑަށް ލިބުނު އަނިޔާއަށް މެޗުގެ ތެރޭގައި ވެސް ފަރުވާ ހޯދުމަށްފަހު ވެސް އިތުރަށް ކުޅެވޭވަރު ނުވުމުންނެވެ.
މިއީ އޮސްޓްރޭލިއަން އޯޕަންގެ ހަތަރުވަނަ ބުރަށް އަލްކަރާޒް ދަތުރުކުރި ފުރަތަމަ ފަހަރެވެ. މެޗަށްފަހު ވާހަކަ ދައްކަމުން އަލްކަރާޒްވަނީ މިއީ މުބާރާތުގައި ކުރިއަށް ދާން އެއްވެސް ކުޅުންތެރިޔަކު ބޭނުންވާނެ ގޮތް ނޫންކަން ހާމަކޮށްފައެވެ.
މިމުބާރާތުގެ ހަތަރު ވަނަ ބުރުގައި އަލްކަރާޒް ބައްދަލުކުރާނީ ސާބިއާގެ މިއޮމީރު ކެޗްމަނޯވިޗް އާއެވެ. ކެޗްމަނޯވިޗް ހަތަރު ވަނަ ބުރުން ޖާގަހޯދީ ތިންވަނަ ބުރުގައި 14 ވަނައަށް ސީޑް ކުރެވިފައިވާ ޓޮމީ ޕޯލާއި ބައްދަލުކުރި މެޗު ތިން ސެޓް ދެ ސެޓުން ކާމިޔާބު ކޮށްގެންނެވެ.
މި މުބާރާތުގެ ހަތަރުވަނަ ބުރުންވަނީ މި މުބާރާތުގައި ތިންވަނައަށް ސީޑް ކުރެވިފައިވާ ރަޝިއާގެ ޑަނީލް މެޑްވެޑޭވް ވެސް ޖާގަަ ހޯދައިފައެވެ. މެޑްވެޑޭވް ހަތަރު ވަނަ ބުރުން ޖާގަހޯދީ ތިންވަނަ ބުރުގައި ކެނެޑާގެ ފެލިކްސް އައުގާ އެލިއަސީމްއާ ބައްދަލުކުރި މެޗު ސީދާ ތިން ސެޓުން ކާމިޔާބު ކޮށްގެންނެވެ.