21 Jan 2024, 09:17
ޖަރުމަނު ބުންޑާސް ލީގާގައި ބޮރޫޝިއާ ޑޯޓްމުންޑާއި އެފްސީ ކުން ބައްދަލުކުރި މެޗު ޑޯޓްމުންޑުން ކާމިޔާބު ކޮށްފިއެވެ.
ކުންގެ ދަނޑުގައި ކުޅުނު މި މެޗު ޑޯޓްމުންޑުން ކާމިޔާބު ކޮށްފައިވަނީ 0-4ގެ ނަތީޖާއަކުންނެވެ. ދެ ޓީމުގެ ފަރާތުން ވާދަވެރި ކުޅުމެއް ފެނުނު މި މެޗުގައި ގިނައިރު ޑޯޓްމުންޑުން ބޯޅަ ގެންގުޅުނު ނަމަވެސް ގިނަ ހަމަލާ އުފެއްދީ ކޯންއިންނެވެ.
މި މެޗުގައި ޑޯޓްމުންޑްއިން ކާމިޔާބުކުރި ފުރަތަމަ ލަނޑު ޖަހައި ލީޑު ނެގީ މެޗުގެ 12ވަނަ މިނެޓްގައެވެ. މި ލަނޑު އެ ޓީމަށް ކާމިޔާބުކޮށްދިނީ ޑޮންޔެލް މާލެންއެވެ.
މި ލަނޑު ޖެހުމާއެކުހެން ދަނޑަށް ކުޅިބަލަން ވަދެ ތިބި ދެ ޓީމުގެ ސަޕޯޓަރުންވަނީ ޖަރުމަނު ފުޓްބޯޅަ އެސޯސިއޭޝަނާ ދެކޮޅަށް ހިތްހަމަ ނުޖެހުން ފާޅުކުރުމުގެ ގޮތުން ދަނޑުމައްޗަށް ރަން ކުލައިގެ ކަރުދާސް ލައިފައިވާ ޗޮކްލެޓް ދަނޑުމައްޗަށް އުކައިފައެވެ.
ދަނޑުމައްޗަށް އުކި ޗޮކްލެޓް ކޮއިންތައް ނެގުމުގައި ދެ ކުލަބްގެ ކުޅުންތެރިން ވެސްވަނީ އެހީތެރިވެދީފައެވެ. ބުނެވޭ ގޮތުގައި 12ވަނަ މިނެޓް މި ކަން ކުޅި ބެލުންތެރިން ކޮށްފައިވަނީ އެއީ ސަޕޯޓަރުންނަކީ 12ވަނަ ކުޅުންތެރިޔާކަން ދައްކުވައިދިނުމުގެ ގޮތުންނެވެ.
މި މެޗުގެ އިތުރުން އެހެން ބައެއް މެޗުތަކުގައި ވެސް ސަޕޯޓަރުންވަނީ އެ ފަރާތްތަކުގެ ހިތްހަމަނުޖެހުން ފާޅު ކޮށްފައެވެ. އަދި މި ކަމުގެ ސަބަބުން މި ހުރިހާ މެޗެއް ވެސްވަނީ އިރުކޮޅަކަށް މެދުކަނޑައިލަން ޖެހިފައެވެ.
މި މެޗުގެ ފުރަތަމަ ހާފުގައި އިތުރު ލަނޑެއް ފެނިގެން ގޮސްފައެއް ނުވެއެވެ. މި މެޗުގައި ޑޯޓްމުންޑްގެ ދެވަނަ ލަނޑު މެޗުގެ 58ވަނަ މިނެޓްގައި ލިބުނު ޕެނަލްޓީއަކުން ކާމިޔާބު ކޮށްދީ އެ ޓީމުގެ ލީޑު ފުޅާކޮށްދިނީ ނިކްލަސް ފުލްގްރޫގްއެވެ.
މެޗުގެ 61ވަނަ މިނެޓްގައި ޑޯޓްމުންޑްގެ ތިންވަނަ ލަނޑު ޖަހައިދިނީ ފުރަތަމަ ލަނޑު ވެސް ކާމިޔާބު ކޮށްދިން މާލެންއެވެ. އަދި ފަހު ލަނޑު މެޗުގެ އިތުރު ވަގުތުގައި ޖަހައިދިނީ ޔޫސުފާ މޮއުކޯކޯއެވެ.
މި ކާމިޔާބީއާއެކު ޑޯޓްމުންޑް މިހާރު އުޅެނީ ކުޅުނު 18 މެޗުން ލިިބިފައިވާ 33 ޕޮއިންޓާއެކު ތާވަލްގެ ފަސް ވަނައިގައެވެ. އަދި ކުން އުޅެނީ 11 ޕޮއިންޓާއެކު ތާވަލްގެ 17 ވަނައިގައެވެ.