21 Jan 2024, 06:49
ޕާކިސްތާނުގެ ބަތަލާ ސަނާ ޖާވިދުގެ ކައިވެނީގެ ފޮޓޯތައް ސޯޝަލް މީޑިއާގައި އާއްމުކުރުމާ އެކު ގިނަ ބަޔަކަށް ލިބުނީ ހައިރާންކަމެކެވެ. ސަބަބަކީ ޓީވީ ތަރި ސަނާ ކައިވެނިކޮށްފައިވަނީ މިދިޔަ އަހަރު ރިޓަޔާކުރި އިންޑިއާގެ މަޝްހޫރު ޓެނިސް ކުޅުންތެރިޔާ ސާނިއާ މިރްޒާގެ ފިރިމީހާއާ ކަމަށްވުމުންނެވެ.
ސާނިއާއާއި ޕާކިސްތާނުގެ ކްރިކެޓް ޓީމުގެ ކުރީގެ ކެޕްޓަން ޝުއައިބް މަލިކްގެ 13 އަހަރުވީ ކައިވެނީގައި މައްސަލަތަކެއް ޖެހިފައިވާކަމުގެ އަޑު ފެތުރެމުން އަންނަތާ ވަރަށް ގިނަ ދުވަސްވެއްޖެއެވެ. ނަމަވެސް މިހާތަނަށް ދެމަފިރިން ވަކިވެފައިވާކަން ރަސްމީ ސިފައެއްގައި ދެ މީހުން ކުރެ އެކަކު ވެސް އިއުލާނެއް ނުކުރެއެވެ.
ކުރީގެ ކްރިކެޓް ކުޅުންތެރިޔާ ޝުއައިބް ދެވަނަ ކައިވެންޏެއް ކުރިކަން އިއުލާނު ކުރުމާ ގުޅިގެން ސާނިއާގެ އާއިލާގެ މެންބަރަކު އިންޑިއާގެ މީޑިއާތަކުގައި ބުނެފައި ވަނީ ސާނިއާ ވަނީ ޝުއައިބާ ދެ މީހުންގެ ކައިވެނި ނިމުމަކަށް ގެންނަން ނިންމާފައެވެ.
ޝުއައިބް މަލިކް އަދި ސާނިއާ މިރްޒާ ދެ މީހުންގެ ދަރިފުޅާއެކު-- ފޮޓޯ/ފޭސްބުކް
ސާނިއާއާއި ޝުއައިބް ވަކި ދިރިއުޅުމެއް އުޅެމުން އަންނަތާ ދެ އަހަރު ދުވަސްވެފައިވާ ކަމަށާއި ފަހަކަށް އައިސް ދެ މީހުން އެކީގައި ހަފުލާތަކުން ފެންނަ މަންޒަރު ވެސް ވަރަށް މަދުވެފައިވާ ކަމަށް އިންޑިއާގެ މީޑިއާ ރިޕޯޓުތަކުން ވަނީ ބުނެފައެވެ. ކައިވެނި ކުރިކަން އިއުލާނު ކުރުމުގެ ދުވަސްކޮޅެއް ކުރިން ޝުއައިބް ވަނީ އޭނާގެ އަމިއްލަ އިންސްޓަގްރާމުން ސާނިއާ އަންފޮލޯ ވެސް ކޮށްފައެވެ.
ފަހުގެ ތާރީޚެއްގައި އިންޑިއާ ދުށް އެންމެ މޮޅު އެއް ޓެނިސް ކުޅުންތެރިޔާގެ ކައިވެންޏަށް ފިރިހެން ކުއްޖަކު ލިބިފައިވާއިރު ފަސް އަހަރުގެ ފިރިހެން ދަރިފުޅު ދިރިއުޅެމުން އަންނަނީ ސާނިއާ ގާތުގައެވެ.
ޕާކިސްތާނު ފިލްމީ ތަރި ސަނާ ޖާވިދު-- ފޮޓޯ/ފޭސްބުކް
ޕާކިސްތާނުގެ ޓީވީ ސިލްސިލާތަކުން ބޮޑު މަގުބޫލުކަމެއް ހޯދި ސަނާއާއި ޝުއައިބުގެ ކައިވެންޏާ ގުޅިގެން އިންޑިއާއަށް ނިސްބަތްވާ ގިނަ ބައެއްގެ އިތުރުން އަމިއްލަ ޤައުމުގެ ގިނަ ބަޔަކު ވެސް އަންނަނީ ނުރުހުމުގެ ބަސްތައް ރައްދުކުރަމުންނެވެ.
ސަނާ އެންމެ ފުރަތަމަ ކައިވެންޏެއް ކޮށްފައިވަނީ 2020ވަނަ އަހަރު ޕާކިސްތާނު ލަވަކިޔުންތެރިޔާ އަދި އެކްޓަރު އުމެއިރު ޖެއިސްވާލާއެވެ. އެހެންނަމަވެސް ކައިވެންޏަށް ދެ މަސްވީ ފަހުން ދެ މީހުން ވަކިވިކަން ވަނީ އިއުލާނުކޮށްފައެވެ. ސަނާއާއި ޝުއައިބާ ދެ މީހުންގެ ގުޅުން ފެށުނީ އެކީގައި ގިނަ އިޝްތިހާރުތައް ކުޅެ ބައެއް ޓީވީ ޝޯވްތައް އެކީގައި ކުޅެން ފެށުމާ އެކު ކަމަށް މީޑިއާ ރިޕޯޓުތަކުން ވަނީ ބުނެފައެވެ.